9
Pinaraay ni Jesus yo Usad na Lalaking Paralisado
(Marcos 2:1-12; Lukas 5:17-26)
1 Lominonad sira Jesus sa bangka, ag nagbalyo sa loyong lawud. Pag-abot adto nagdagos si Jesus sa sadiri niyang banwaan. 2 Kaso adto na iya, agko manga taong nagdara sakanya nin paralitiko na nakabatang sa saday na batangan. kaso makita ni Jesus yo sa kandang pagtood, sinabi niya sa paralisado, “Agin ko, kusugan mo ana saimong buut! Ana saimong manga kasa'lan pinatawad na.” 3 Kaso marungug adi nyo paratoro nin Kasogoan, sinabi nira sa sakandang sadiri, “Pibasangbasang nya taong adi ana Dios.” 4 Piro isi ni Jesus kin ono yo piisip nira kaya sinabi niya, “Taynga ta niisip kamo nin maraut? 5 Arin daw ana mas pasil sabiyun, ‘Pipatawad na ana manga kasa'lan mo,’ o ‘Tomindug ika ag somamput?’ 6 Ngowan patotonayan ko sainyo na ana Agin nin Tao agko kapangyariyan na magpatawad nin manga kasa'lan didi sa kina'ban.” Kaya sinabi ni Jesus adto sa paralisado, “Tomindug ika, daraun mo ana saimong pibatangan, ag samput na.” 7 Kaya nagtindug yo lalaki ag nagsamput. 8 Kaso makita adi nyo manga tao, natakot sira ag nag-omaw sa Dios dail ta nagtao iya nin arug nyading kapangyariyan sa manga tao.
Bina'no ni Jesus si Mateo
(Marcos 2:13-17; Lukas 5:27-32)
9 Kaso nagiagi na si Jesus parayo sa logar na adto, nakita niya yo usad na parasingil nin bowis na ana pangaran Mateo, nakauga adi sa logar kin sa'ri sira nagikolekta nin bowis. Sinabiyan iya ni Jesus, “Somonod ika sa'kun.” Kaya nagtindug si Mateo ag sominonod sakanya. 10 Abang nipangga'bi si Jesus kaiba yo sakanyang manga disipolo adto sa baguy ni Mateo, dakul na manga kaiba niyang parasingil nin bowis ag manga taong ipitoring na makasa'lan yo nag-abot, ag nagkaun na kasabay ni Jesus ag nyo manga disipolo niya. 11 Kaso makita adi nyo manga Pariseo, nag-onga sira adto sa manga disipolo ni Jesus, “Taynga ta ana sainyong maestro nakikikaun sa manga parasingil nin bowis ag iba pang manga makasa'lan.” 12 Narungug adi ni Jesus ag iya na ana sominimbag, “Ana agko manga kamatian among nangangaipo nin parabolong, bukung ana manga uda kamatian. 13 Sabi pa niya, pag-urup-urupa daw ninyo kin ono ana muyang sabiyun nyadi, ‘Bukung ana manga atang ninyo ana pima'wut ko kindi ana magin maiirakun kamo.’ Ta nagpadidi ako bukung tanganing ba'nowun ana manga taong matanos sa sakandang sadiring pagkita, kindi ana manga makasa'lan.”
Kaongaan manunungud sa Pag-ayono
(Marcos 2:18-22; Lukas 5:33-39)
14 Kina nagrani ki Jesus yo manga disipolo ni Juan na Parabunyag ag sominabi, “Kami ag ana manga Pariseo pirming nagiayono. Taynga ta ana saimong manga disipolo indi nagiayono?” 15 Sominimbag si Jesus, “Mapepwedi man daw na magmundu ana manga bisita sa kasa'lan abang kaiba pa nira ana nobiyo? Piro magiaboton ana panaon na koko'non ana nobiyo sakanda, saka na sana sira magiayonowun.”
16 “Da siisay man na nagitalak nin ba'gong tela sa gasi nin usad na lomang bado, ta mabubutung nyadi ana tinalakan, ag mas lalo pang nidakuuun ana gasi. 17 Uda man nagipalis nin ba'gong alak sa lomang anit na pibutangan nin alak, ta kin bagaan ana gibowun, mabobosi aan; maoowa ag masasayang ana alak, ta mararapak ana anit na pilu'gan. Ana ba'gong alak kinakaipowan ipalis sa bago man na anit na lulu'gan tanganing pariyong indi masayang.”
Binoway yo Agin nin Opisiyal ag Pinaraay yo Usad na Babayi
(Marcos 5:21-43; Lukas 8:40-56)
18 Abang pisabi ni Jesus ana manga bagay na adi, ominabot yo usad na nipamayo nin manga Judio ag naglood sa atobangan niya na nagsabi, “Kakaguraan pa sana tabi nyo agin kong babayi; piro kin mag-iba ika sa'kun ag iruun mo ana saimong kamut sakanya, maboboway iya.” 19 Kaya nagtindug si Jesus ag nag-iba sakanya, ag yo sakanyang manga disipolo. 20 Miyentras na niagi sira, nagrani sa talikoran ni Jesus yo usad na babaying dosing taon nang pipararogo, ag inapowas niya yo gayad nyo sakanyang bado. 21 Dail sinabi niya sa sakanyang sadiri, “Maru'tan ko sana ana bado niya mararaay ako.” 22 Nagkiling si Jesus ag kaso makita yo babayi, sinabi niya, “Agin ko, pakusugun mo ana saimong buut! Pinaraay ika nya saimong pagtood.” Nyadto man sana naraay yo babayi.
23 Kaso omabot si Jesus adto sa baguy nyo nipamayo, nakita niya yo manga paratogtog nin plawta ag yo kadakul na manga taong malariribok. 24 Sinabiyan sira ni Jesus, “Lomowas kamo nga'min! Buku man na guraan ana agin kindi natotorog sana!” Kaya pinagngiritan nyo manga tao si Jesus. 25 Kaso mapalowas na yo manga tao, nagluug si Jesus sa kwarto, kinaputan niya yo kamut nyo agin ag nagbowat adi. 26 Ana barita manunungud sa pangyayaring adto, ominukup sa bilog na banwaan.
Pinaraay ni Jesus yo Dowang Lalaking Bota
27 Bina'yan ni Jesus yo logar na adto, abang niagi iya agko sominonod sakanyang dowang bota. Nagiparauyaw sira nin bagadi, “Kairakan mo kami. Ika na agin ni David!” 28 Pagluug ni Jesus adto sa baguy na sakanyang piistaran, rominani sakanya yo dowang bota. Kina inonga sira ni Jesus, “Ono nagitood kamo na kaya ko kamong paraayun?”
“Amo tabi Kagorangnan.” simbag nira.
29 Kaya inapowas ni Jesus yo sakandang manga mata, kina sinabi, “Mangyayari sainyo ana muya ninyo, basi sa sainyong pagtood.” 30 Ag nakakita na yo dowang bota. Maigpit na tinogonan sira ni Jesus na di nira ipagpamarita ana bagay na adi dawa kiisay. 31 Piro kaso makaalin na yo dowa, ipinamarita nira sa bilog na logar na adto yo nga'min na ginibo sakanda ni Jesus.
Pinaraay ni Jesus yo Usad na Lalaking Ngola
32 Kaso paalin na sira Jesus, dinara sakanya nin nagkapirang tao yo usad na lalaking ngola ta pisaniban nin maraut na espirito. 33 Pinalayas ni Jesus yo maraut na espirito, kaya nakapagsabi na yo ngola. Nagngalas yo manga tao pagkakita nyadi ag sinabi nira, “Dawa kasoono indi pa nangyari ana bagading pangyayari sa bilog na Israel” 34 Piro yo manga Pariseo man sominabi, “Ana prinsipe nin manga maraut na espirito among nagtao sakanya nin kapangyariyan na magpalayas nin manga maraut na espirito.”
Kinairakan ni Jesus yo manga Tao
35 Linibot ni Jesus yo manga banwaan ag baryo. Nagtoro iya sa manga simbaan, ipinangadal ana Maraay na Barita manunungud sa paghahadi nin Dios, ag pinaraay niya yo nga'min na agko ilang, onoman ana sakandang kamatian. 36 Kaso makita niya yo kadakul na tao, nairak iya sakanda dail ta kadakul nya sakandang problima ag uda maayatan nin tabang. Baga sira manga karnirong uda sadiring pastor. 37 Kaya sinabiyan niya yo sakanyang manga disipolo, “Kadakul nyana popoloton, piro kaagbay nya parapolot. 38 Kaya ngani mangadyi kamo sa kagsadiri nyana popoloton na magpadara iya nin manga trabaador sa kaomaan niya.”