19
Ana Toro ni Jesus manunungud sa Pagsoway
(Marcos 10:1-12)
1 Pakatapos ipangadal ni Jesus ana manga bagay na adi, ominalin iya sa Galilea ag pominonta sa probinsiya nin Judea sa loyo nyo Salog nin Jordan. 2 Kadakul na tao yo nagsonod sa sakanya, ag pinaraay niya sira sa sakandang manga kamatian.
3 Agko manga Pariseo na nagponta sa sakanya tanganing testingun iya, “Ono, ipitogot nya Kasogoan na sowayan nya lalaki ana sugud niya maski sa onong rason?” 4 Sominimbag si Jesus, “Taynga, indi pa ninyo nabasa sa Kasoratan na sa kapino'nan pa sana, kaso lalangun nin Dios ana kina'ban, ‘ginibo niya ana tao na lalaki ag babayi.’ a 5 ‘Dail nyadi, baba'yan nya lalaki ana sakanyang ama ag ina, ag magiibanun sirang dowa. Ag sirang dowa magigin usad.’ b 6 Buku na sirang dowa kindi usad na sana. Kaya indi dapat pagsowayun nin tao ana pinag-usad nin Dios.” 7 Nag-onga otro yo manga Pariseo, “Piro taynga sinabi ni Moises na pweding sowayan nya lalaki ana sugud niya, basta ta'wan niya adi nin kasoratan nin pakikipagsoway?”c 8 Nagsimbag si Jesus sakanda, “Itinogot aan ni Moises sainyo dail sa kakisilan nya sainyong manga payo. Piro buku aan ana katoyowan nin Dios sa kapino'nan. 9 Kaya pisabi ko sainyo, kin sowayan nya lalaki ana sugud niya sa onoman na rason pwera sa sekswal na imoralidad, ag kina, magsugud iya nin iba, nagkasala iya nin pananambay. [Ag ana magsugud sa babaying sinowayan, nagkasala man nin pananambay.]”
10 Sinabi nyo manga disipolo ki Jesus, “Kin bagaan palan tabi ana pagsugud, maraay pang indi na sana magsugud.” 11 Sominimbag si Jesus, “Indi maaako nya nga'min ana torong adi, pwera na sana yo manga taong tina'wan nyadi. 12 Agko manlainlain na rason kin taynga ta ana iba indi nisugud. Ana iba ipinangagin na talagang baog. Ana iba indi nakapagsugud ta tinoyong kinapon. Ag agko man iba na indi muyang magsugud dail sa pagpapaalaga nira sa kahadian nin Dios. Kin kaya adi nya siisay man, indi na iya magsugud.”
Binendisyonan ni Jesus yo manga Saraday na Agin
(Marcos 10:13-16; Lukas 18:15-17)
13 Agko manga taong nagdara nin manga saraday na agin ki Jesus tanganing iruun yo sakanyang kamut bilang pagbindisyon sa sakanda. Piro sinawi sira nyo manga disipolo ni Jesus. 14 Sinabi ni Jesus sa manga disipolo niya, “Paba'yan ninyong romani sa sa'kun ana manga agin. Indi ninyo sira pagpugulan, ta ana manga pariyo nira, kaiba sa kahadian nin Dios.” 15 Pakatapos niyang ru'nan nin kamut ag bendisyonan yo manga agin, ominalin na iya.
Ana Lalaking Mayaman
(Marcos 10:17-31; Lukas 18:18-30)
16 Agko man usad na lalaking nagrani ki Jesus ag nag-onga, “Maestro, ono tabi ana maraay kong gibowun tanganing magkaagko boway na uda kapondowan?”
17 Sominimbag si Jesus, “Taynga ta pionga mo sa sa'kun kin ono ana maraay? Usad sana ana maraay, ag uda iba kindi ana Dios. Kin gosto mong magkaagko nin boway na uda kapondowan sonodon mo ana manga ipisogo.” 18 “Arin tabi sa manga adi?” onga nyo lalaki. Sominimbag si Jesus, “Indi ika mangguraan, indi ika manambay, indi ika mangonas, indi ika mag-ambog sa pagtestigo mo. 19 Ag igalang mo ana saimong ama ag ina, d ag mamu'yan mo ana kapwa mo arug nya pagkamuya mo sa saimong sadiri.”e
20 Sinabi nyo lalaki, “Nagibo ko na tabi ana nga'min na aan. Ono pa tabi ana kolang sa sa'kun?”
21 Sominimbag si Jesus, “Kin muya mong uda kakolangan sa atobangan nin Dios, somamput ika ag ipabakal mo ana manga pagsorosadiri mo, ag ipanao mo ana sintabo sa manga pobre. Ag magkakaagko ika nin kayamanan sa langit. Kina, bomalik ika ag somonod sa sa'kun.” 22 Kaso marungug adto nyo soltiro, ominalin iyang mamundu, dail ta malayaman niya.
23 Kaya sinabi ni Jesus sa manga disipolo niya, “Pisabi ko sainyo, kadipisil para sa usad na mayaman ana mapaiba sa kahadian nin Dios. 24 Mas pasil pa sa usad na kamelyo ana mag-agi sa lobot nin ragom kisa sa mayaman na magpasakup sa paghahadi nin Dios.” 25 Nabigla yo manga disipolo pagkarungug nyadto, kaya nag-onga sira, “Kin arug nyaan siisay sana ana makakaligtas?”
26 Kinita sira ni Jesus ag sinabi, “Imposible adi sa tao, piro sa Dios ana nga'min posible.”
27 Sominabi si Pedro, “Papaono man tabi kami? Bina'yan na namun yo nga'min tanganing somonod saimo. Onoman ana makokoko namun?” 28 Sominimbag si Jesus, “Pisabi ko sa sainyo ana kaostowan, niaboton ana aldaw na baba'gowun nin Dios ana kina'ban, ag ako na Agin nin Tao niugaun sa sa'kun na trono. Ag kamong manga disipolo ko niugaun man sa dosing trono tanganing osgaranf ana dosing tribo nya Israel. 29 Ag nga'min na nagbaya nya sakandang baguy, manga ipatngod, manga gorang, manga agin, o manga raga dail sa sa'kun, niakoon nin mas dakul pa kisa sa sakandang manga bina'yan, ag niakoon man iya nin boway na uda kapondowan. 30 Piro omaaboton ana panaon na ana manga orog ngowan magigin minos, ag ana minos magigin orog.”