20
Ana manga Trabador sa Obasan
1 Sinabi pa ni Jesus sakanda, “Ana paghahadi nin Dios maipapariyo sa bagadi; Usad na aldaw, kaamay pang naglowas ana usad na kadsadiri nin obasan tanganing manganap nin manga trabador. 2 Kaso makakita iya nin manga trabador, nagkaoyon sira na tatangranan niya nin tamang tangran para sa usad na aldaw na trabao, kina pinaponta niya sira sa sakanyang obasan. 3 Kaso alas nuebe na nin pita, lominowas iya otro ag nakakita iya nin kalalakiyan na nakaistambay sana sa plasa. 4 Sinabi man niya sa manga adi, ‘Magtrabao kamo sa obasan ko ag babayaran ko kamo kin ono ana dapat.’ 5 Kaya nagpaadto man sira sa obasan. Kaso alas dose na sa odto, naglowas na naman iya ag agko pa nakitang nagkapirang tao. Pinatrabao man niya sira. Arug man nyaan yo sakanyang ginibo kaso alas tres na nin apon. 6 Kaso alas sinko na nin apon, lominowas iya otro ag nakakita pa nin ibang lalaking nakaistambay. Inonga niya ana manga adi, ‘Taynga kamo ta niparatindug sana didi sa bilog na mag-apon na uda pigibo?’ 7 ‘Uda tabi kaya nagitao sa'mun nin trabao,’ sabi nyo manga lalaki. ‘Pomonta kamo sa obasan ko ag magtrabao.’ sabi niya sakanda. ”
8 “Kaso pasinarum na, sinabiyan nyo kadsadiri nyo obasan yo katiwala niya, ‘Ba'noon mo na yo manga trabador ag tangranan na sira. Mo'naun mong tangranan yo namawring nagtrabao, ag ipamawri mo yo namo'na.’ ” 9 “Pagrani nyadtong nagpoon magtrabao nin alas singko nin apon, tinangranan sira nin para sa usad na aldaw. 10 Kaso nagrani man yo manga nao'nang nagtrabao, inuna nirang mas dakul yo bayad sakanda kaysa adto sa namawring nagtrabao; piro pariyo man sana yo tangran sakanda nga'min. 11 Pakakoko nira nyo bayad, nagreklamo sira sa kadsadiri. 12 Sabi nira, ‘Yo manga namawri usad na oras sana man nagtrabao, piro kami mag-apong nagtrabao ag nagtius nin init nin aldaw, taynga ta pariyong kantidad sana ana bayad sa'mun?’ 13 Nagsimbag yo kadsadiri sa usad sakanda, ‘Amigo, indi ko ika dinaya. Buku nagkaoyon kita na tatangranan ko kamo nin para sa usad na aldaw na trabao.’ 14 ‘Ko'non mo ana bayad mo ag somamput na ika. Desisyon ko na ta'wan nin pariyong bayad yo namawri saimong nagtrabao. 15 Bukung agko ako poder sa muya kong gibowun sa sa'kun na sintabo? O naiibug ika ta mabuut ako sakanda?’ ”
16 Pakatapos sinabi ni Jesus sa sakanda, “Bagaan man ana mangyayari sa mawring aldaw. Agko manga minos ngowan na magigin orog, ag agko manga orog ngowan na magigin minos.”
Pangtolong Sinabi ni Jesus anunungud sa Sakanyang Kagra'nan
(Marco. 10:32-34; Lukas. 18:31-34)
17 Abang nibaklay sira si Jesus paponta sa Jerusalem, isinoway niya yo doging disipolo sa manga tao ag sinabiyan sira. 18 “Nitokarun kita sa Jerusalem. Adto itatao ana Agin nin Tao sa manga nipamayo sa manga padi ag paratoro nin Kasogoan. Oosgaran nira ako nin kagra'nan, 19 ag itatao iya sa manga Hentil tanganing pagtoyatoyaun, ampakun, ag ipako sa kros. Piro sa ikatolong aldaw maboboway ako otro.”
Ana Pimawut nya Usad na Ina
(Mc. 10:35-45)
20 Ana sugud ni Zebedeo na ina ni Santiago ag Juan, nagrani ki Jesus kaiba yo dowa. Lominood adi sa atobangan ni Jesus ta agko iya muyang ayatun. 21 Inonga iya ni Jesus, “Ono ana kaipowan mo?”
Nagsimbag iya, “Kin pwedi tabi, kin nihadi na ika, itogot mo logod na omuga ana dowa kong agin sa kaabay mo, ana usad sa saymong too, ag ana usad sa saymong wala.”
22 Piro sinimbag sira ni Jesus, “Di ninyo isi kin ono ana piayat ninyo. Kaya daw ninyong tiusun a manga kasakitan na titiusun ko?”a
“Amo tabi! Kaya tabi namun,” simbag nira. 23 Nagsabi si Jesus, “Titiusun man talaga ninyo ana manga kasakitan na titiusun ko, piro buku ako ana nipiliun kin siisay ana niugaun sa too o sa wala ko, dail ta agko na nyaan tinaga'man ana sa'kun na Ama.”
24 Kaso marungug nyo sampolong disipolo kin ono yo piayat nira, nagasa sira sa mag-ipatngod. 25 Kaya bina'no sira ni Jesus ag sinabiyan, “Isi ninyo na sa kina'ban na adi ana manga hadi agko podir sa manga nasasakupan nira, ag ana gosto nira among nasosonod. 26 Piro buku bagaan ana kinakaipowan mangyari sainyo. Imbis ana siisay man sainyo na muyang magin orog kinakaipowan magin sorogoon. 27 Ana siisay man na muyang magin lidir, kinakaipowan magin sorogoon nya nga'min. 28 Arug nya Agin nin Tao, indi iya nagpadidi sa kina'ban,tanganing pagserbiyan kindi tanganing magserbi, ag itao ana boway niya tanganing balokatun ana dakul na tao.”
Pinaraay ni Jesus yo Dowang Botang Lalaki
(Marcos 10:46-52; Lukas 18:35-43)
29 Kaso paalin na si Jesus ag yo mga disipolo niya sa Jerico, sinondan sira nyo kadakul na tao. 30 Agko dowang lalaking bota na nakauga sa gilid nin dagan. Kaso marungug nira na niliisun na si Jesus, nag-uyaw sira, “Kagorangnan,b Agin ni David,+30 Agin ni David: Amo adi ana ba'no nin manga Judio sa Mesias o Cristo dail sa paniniwala na alin iya sa lai ni David. Mairak tabi ika sa'mun!”
31 Piro sinawi sira nyo manga tao ag sinabiyang di pakaribok. Piro lalo pa nirang kinusugan yo pag-uyaw, “Agin ni David! Mairak ika sa'mun!” 32 Nagpondo si Jesus sa pag-agi, bina'no ag inonga sira. “Onong muya ninyong gibowun ko sainyo?” 33 “Kagorangnan, muya tabi namun na makakita!” 34 Nairak si Jesus sa dowa ag inapowas yo sakandang mata. Nyadto man sa nakakita sira ag sominonod ki Jesus.