21
Nagluug sa Jerusalem sa Jerusalem
(Marcos 11:1-11; Lukas19:28-40; Juan12:12-19)
1 Kaso arani na sira si Jesus sa Jerusalem, nagpondo sira adto sa Bokid nin manga Olibo arani sa banwaan nin Betfage.a Pinamo'na ni Jesus yo dowa niyang disipolo. 2 Ag sinabing, “Magponta kamo sa sonod na bariyo. Makikita ninyo adto ana usad na torilyong kabayo na nakaguud, kaiba ana ina nyadi. Obaran ninyo ana manga adi ag daraun didi sa'kun. 3 Kin agko tumuyaw sainyo, sabiyan ninyong, ‘Kaipowan ana manga adi nin Kagorangnan,’ ag indi man kamo nyaan sasayo'man ag ipapadara tolos aan sainyo.”
4 Nangyari adi tanganing magibo yo sabi nin Propeta:
5 “Sabiyan ninyo ana manga tagaSion na niabot na ana sainyong hadi!
Mapagkombaba iya ag nakalonad sa usad na asno,
sa usad na torilyong ogbon nin kabayo.”
6 Kaya pominaadto yo manga disipolo ag ginibo yo sinabi ni Jesus. 7 Dinara nira yo asno ag yo torilyong ogbon nyadi ki Jesus. Pakatapos inapinan adto nyo sakandang manga alikbuy, ag naglonad si Jesus didi.
8 Kadakul na manga tao yo naglatag nyo sakandang manga alikbuy sa tinampo, miyentras na yo iba ominutuw nin manga sangang kawoy ag ibinutang man sa tinampo. 9 Yo manga taong sa mo'naan ag sa mawriyan ni Jesus niuruyaw ning bagadi, “Viva sa Agin ni David! Paladan ana niabot sa pangaran nin Kagorangnan! Viva sa kaitaasan!”
10 Pagluug ni Jesus sa Jerusalem, naribok yo bilog na siyodad, ag nag-orongaan yo manga tao, “Siisay ana taong adi?”
11 Sominimbag yo manga taong kaiba ni Jesus, “ Amo adi si Jesus na propeta na tagaNazaret nin Galilea. ”
Ana Paglinig sa Templo
(Marcos 11:15-19; Lukas 19:45-48; Juan 2:13-22)
12 Lominuug si Jesus sa templo nin Dios ag sinobol yo nga'min na nitinda ag parabakal adto. Pinabalintok niya yo manga lamisa nyo parabalyo nin sintabo ag yo manga u'gan nyo manga paratinda nin salampating piatang sa templo. 13 Sinabi niya sakanda, “Pisabi nin Diyos sa Kasoratan, ‘Ana sa'kun na baguy, baguy na pangadyian.’ Piro ginibo ninyo ading logar nin manga maonas!”
14 Pominonta ki Jesus adto sa templo yo manga pilay, ag manga bota, ag pinaraay niya sira. 15 Piro nagasa yo manga namamayo nin manga padi ag manga paratoro nin Kasogoan kaso makita nira yo manga nakakangalas na manga bagay na ginibo ni Jesus, ag kaso marungug nira na maski yo manga agin niuyaw adto sa templo nin, “Viva sa Agin ni David!”
16 Kaya inonga nira si Jesus, “Narungug mo kin ono ana pisabi niyading manga agin?”
“Amo,” simbag ni Jesus, “Ono, indi ninyo nabasa ana manga sasabiyun na adi sa Kasoratan,
‘Tinoroan mo, O Dios, ana manga agin ag ana manga nisoso pa na mag-omaw saymo.’ ” m
17 Bina'yan sira ni Jesus ag lominowas sa siyodad. Pominonta iya sa Betania ag adto na nagpaga'bi.
Isinompa ni Jesus yo Kawoy na Higera
Marcos 11:12-14, 20-24
18 Kinaugmaan, kaso pabwelta na si Jesus adto sa siyodad, naponaw iya. 19 Nakakita iya nin usad na poon nin igos sa gilid nyo aagyan ag rinaniyan niya adto. Piro uda iya nakitang bonga kindi manga dawun sana. Kaya sinabi niya adto sa poon nin igos, “Indi na ika makakapamonga anggan pa man!” Nyadto man sana tolos naugang yo kaoy.
20 Kaso makita adto nyo sakanyang manga disipolo, nagngalas sira, “Napapaono ta bigla na sanang naugang yo kawoy na igos?” yo onga nira.
21 Nagsimbag si Jesus, “Sa kaostowan pisabiyan ko kamo, kin agko kamo pagtood ag uda pagdowadowa, buku sanang ana ginibo ko sa igos na adi ana magigibo ninyo, kindi mapagbubutan man ninyo ading bantuy na ‘Omalin ika ag pomonta ika sa dagat,’ mangyayari aan. 22 Kin kamo tomood, mapapasainyo ana onoman na ayatun ninyo sa pangadyi.”
Ana Onga manunungud sa Kapangyariyan ni Jesus
(Marcos11:27-33; Lukas 20:1-8)
23 Nagponta si Jesus sa templo, ag miyentras na nitoro iya, rominani sakanya yo manga nipamoon nin manga padi ag yo manga namamayo sa manga Judio ag nag-onga. “Kiisay na kapangyariyan mo pigibo ana manga bagay na adi? Siisay ana tominao saimo nya kapangyariyan na aan?”
24 Sinimbag sira ni Jesus, “Ongaun ko man kamo, ag kin masimbag ninyo, sasabiyun ko man kin kiisay na kapangyariyan pigibo ko ana manga bagay na adi. 25 Sa'ri alin yo kapangyariyan ni Juan sa pagbunyag, sa Dios o sa manga tao?”
Nagdiriskotiran sira, “Kin sabiyun tang alin sa Dios, sasabiyun niyang, ‘Kin alin sa Dios taynga ta di kamo nagtood ki Juan?’ 26 Kin sabiyun ta man na alin sa manga tao, baad kin onong gibowun sa'tun nya manga tao, ta pitood nya manga tao na si Juan usad na propeta nin Diyos.” 27 Kaya yo simbag nira ki Jesus, “Indi namun isi.”
Sinabiyan man sira ni Jesus, “Kin amo aan, indi ko man sasabiyun sainyo kin siisay ana nagtao sa'kun nin kapangyariyan tanganing gibowun ko ana manga bagay na pigibo ko.”
Ana Parabola nin Mag-ipatngod na Lalaki
28 Sinabi pa ni Jesus sakanda, “Sa pag-una ninyo ono ana gostong sabiyun nya estoriyang adi? Agko usad na tao na agko dowang agin na lalaki. Sinabiyan niya yo subang, ‘Agin, magtrabao ika adto sa obasan ngowan na aldaw.’ 29 Sominimbag yo subang na agin, ‘Di ko muya.’ Piro pagtauntaun nagbago yo isip ag nagtrabao adto sa obasan. 30 Rinaniyan man nyo ama yo maori ag amo man yo sinabi. Sominimbag yo maori, ‘Amo tabi Itay.’ piro indi man pominaadto sa obasan. 31 Arin sa dowa yo nagsonod sa ama?”
Sominimbag sira, “Yo subang.”
Sinabiyan sira ni Jesus, “Sa kaostowan pisabiyan ko kamo, mamomo'na pa sainyong makaluug sa Kahadian nin Dios ana manga parasingil nin bowis ag manga maraut na babayi. 32 Ta pominadidi si Juan na Parabunyag sa pagtoro sainyo nya tamang dagan piro indi ninyo muyang tomood sakanya. Ana manga parasingil nin bowis, ag manga maraut na babayi tominood sakanya. Piro kamo maski nakita na ninyo adi, indi pa nanggad kamo nagbakli ag indi tominood sakanya.”
Parabola nin Maraut na Paratanum
(Marcos 12:1-12; Lukas 29:9-19)
33 Nagsabi pa si Jesus sakanda “Runggun ninyo ana usad pang parabola: Agko usad na kadsadiri nin raga na nagtanum sa sakanyang obasan, inagad niya adi, ag naggibo nin gilingan nin obas. Nagtogrok pa iya nin usad na bantayan. Kina, ipinaarkila niya ana obasan na adi sa manga paratanum niya, kina, nagponta iya sa ibang logar. 34 Kaso ominabot na yo gorosiyan, sinogo niya yo sakanyang manga sorogoon na magponta adto sa manga paratanum, tanganing ko'non yo kairasan niya nyo mga bonga. 35 Piro rinakup nyo manga paratanum niya yo manga sorogoon. Sinorosontok nira yo usad, ginuraan yo usad ag pinagparabato yo usad pa. 36 Nagsogo dayaday yo kadsadiri nin mas dakul na dorogoon, piro amo man dayaday yo ginibo sakanda nyo manga paratanum. 37 Sa kaorooltimowi, sinogo na nyo kadsadiri yo sakanyang agin. Inuna niya na gagalangan na nira ana sakanyang agin. 38 Piro kaso makita nyo manga paratanum yo agin nyo kadsadiri nin obasan, nagsabi ana manga adi, ‘Amo adi yo agin nyo kadsadiri, mari kamo ta gura'nun ta iya tanganing mapasa'tun ana mamanaun niya!’ 39 Kaya pinugul nira yo agin ag ginodgod palowas sa obasan ag ginuraan.
40 Ngowan, kin magbalik na yo kadsadiri nyo obasan, ono sa pag-una ninyo ana sakanyang gigibowun sa manga paratanum na adi?”
41 Sominimbag sira, “Sigoradong gugura'nun niya adtong manga maraut na paratanum na adto, kina ipaaarkila niya a sakanyang obasan sa iba na tataong magtao nya kairasan sakanya sa kada panaon nin tiggosi.”
42 Sinabiyan sira ni Jesus, “Ono indi pa basang ninyo nabasa ana parting adi sa Kasoratan?
Ana batong inindian nin manga paratogrok nin bilding,
amo ana nagin pasu'naran.
Gibo adi nin Kagorangnan,
ag usad ading ngangalasan sa sa'tun na pagkita!”
43 “Kaya pisabiyan ko kamo: ‘Aalinun sainyo ana kahadian nin Dios ag itatao sa usad na nasyon na makakatao nin maninigong bonga.’ ” 44 (Ana siisay man na matikrag sa batong adi mapupusa, ag siisay man na matikragan nya batong adi maroronot na baga na alpog.)b