11
Si Jesus ag si Juan na Parabunyag
(Lukas7:18-35)
1 Kaso matogonan na ni Jesus yo dosi niyang disipolo, nag-alin iya sa logar na adto tanganing magtoro ag ipangadal ana Maraay na Barita sa manga kaaraning banwaan.
2 Si Juan man na Parabunyang nakakarsil nyo panaon na adto, kaso marungug niya yo manga pigibo ni Jesus, sinogo niya yo sakanyang manga parasonod, 3 tanganing ongaun si Jesus, “Ono ika na tabi ana pilaoman namun na niaboton o mag-ugat pa kami nin iba?” 4 Yo simbag ni Jesus sa sakanda, “Bomalik kamo ki Juan ag sabiyun ninyo sa sakanya ana sainyong narungug ag nakita: 5 Nakakakita na ana manga bota, nakaagi na yo manga pilay, naraay yo manga pudpurun, nakakarungug yo manga bungug, naboway otro yo manga guraan, ag ipipangadal sa manga pobre ana Maraay na Barita. 6 Paladan ana taong indi nidowadowa sa sa'kun.”
7 Kaso makaalin na yo manga parasonod ni Juan, sinabiyan ni Jesus yo manga tao manunungud ki Juan, “Kaso magponta kamo ki Juan sa kalangtaran, ono yo pilaoman ninyong makita? Usad na taong arug sa tambo na pipalidpalid nin parus? 8 Ono nagponta kamo adto tanganing makita yo usad na taong niso'wut nin maoyay na bado? Ana manga taong maoyay ana so'wut sa palasyo ninyo makikita. 9 Nagponta kamo adto tanganing makita ana usad na propita, bukung amo? Amo usad iyang propita. Ag pisabi ko sa sainyo, orog pa iya sa usad na propita. 10 Ta si Juan ana pisabi nya Banal na Kasoratan kaso sabiyun nin Dios, ‘Ipapadara kong o'na saimo yo sa'kun na sogo tanganing ianda ana aagyan mo.’ 11 Sa kaostowan pisabi ko sainyo, uda taong ipinamundag na mas orog pa ki Juan. Piro mas orog sakanya yo pinakaminos sa manga taong nagipasakup sa paghahadi nin Dios. 12 Poon kaso mangadal si Juan anggan ngowan, nagipirit ana manga tao na magpasakup sa paghahadi nin Dios. 13 Ta bago pa omabot si Juan, ipinaisi na nyo nga'min na propita ag nya Kasogoan ni Moises ana manunungud sa paghahadi nin Dios. 14 Kin nitood kamo sa sakandang manga ipinaisi, si Juan na talaga ana Elias na pilaoman ninyong niaboton. 15 Kamong manga nirungug, kinakaipowan ninyong pag-isipan kin ono ana sainyong narungug.a
16 Sa onong bagay ko maipapariyo ana manga tao sa panaon ngowan? Pariyo sira nya manga agin na nagiyamun sa plasa ag pisabi sa manga kayamun nira. 17 ‘Tinogtogan namun kamo nin maogma, piro di man kamo nibayle! Nikanta kami nin mapunguw na kanta, piro di man kamo niiribi!’ 18 Kaso nagpadidi si Juan na nagiayono ag indi nagiinom nin alak, pisabi nira, ‘Pisaniban iya nin maraut na espirito.’ 19 Ngowan na nagpadidi man yo Agin nin Tao, na nagikaun ag nagiinom, ana pisabi nira, ‘Ana taong adi kaangap at boratsiro, ag kaibaiba niya ana manga parasingil nin bowis, ag nya manga makasa'lan.’ Piro ana kadonongan nin Dios napapatonayan sa boway nya manga ominako nyadi.”
Patanid sa manga Banwaan na Indi Nibakli
20 Pakatapos nyadi, tina'manan ni Jesus yo manga banwaan na ginibowan niya nin kadakul na ngangalasan, ta indi sira nagbakli ag indi nagtalikod sa sakandang manga kasa'lan. 21 Sinabi niya, “Kairakirak kamong tagaCorazin! Kairakirak kamo na tagaBetsaida! Ta kin sa Tiro ag Sidon ginibo yo manga ngangalasang ginibo ko sainyo, uguy na kinta'na sirang nagsoro'wut nin sako at nag-uruga sa abo tanganing ipakitang nibakli na sira. 22 Kaya tandaan ninyo na sa Aldaw nin Pag-oosgar, mas mabugat na padosa ana sasapoon ninyo kisa sa manga tagaTiro ag tagaSidon. 23 Ag kamo man na manga tagaCapernaum, pisabuut ninyo na tata'wan kamo nga'min nin pag-omaw maski adto sa langit. Indi! Ititikrag kamo sa logar nin manga guraan! Ta kin sa Sodoma nangyari yo manga ngangalasang ginibo sainyo, nipadagos pa kinta'na yo logar na adto anggan ngowan. 24 Piro pisabyan ko kamo, sa Aldaw nin Pag-oosgar, mas mabugat yo padosang sasapoon ninyo kisa sa manga tagaSodoma.”
Agko Kapaingaloan ki Jesus
25 Nyo oras na adto sinabi ni Jesus, “O Ama, Kagorangnan nin langit ag raga, pipasalamatan ko ika ta ilinuum mo ana manga bagay na adi sa manga madodonong ag sa manga matatali piro ipinaintindi mo sa manga uda inadalan na agko buut arug sa agin. 26 Amo tabi Ama, ta amo adi ana kabu'tan mo.”
27 Kina, sinabi niya sa manga tao, “Itinao sa sa'kun nya sa'kun na Ama ana nga'min na bagay. Uda siisay man na nakakabisto sa Agin kindi ana Ama, ag uda man nakakabisto sa Ama kindi ana Agin ag ana siisay man na mumu'yun na paayagan nya Agin.”
28 “Romani kamo sa sa'kun, kamo nga'min na napapagal ag nabubu'gatan sa sainyong pipa'san, ta tata'wan ko kamo nin kapaingaloan. 29 Somonod kamo sa manga ipisogo ko ag makatuud kamo sa sa'kun, dail ta ako mabuut, ag agko mapagkombabang buut, ag makakaanap kamo nin kapaingaloan. 30 Dail ta madaling sonodon ana sa'kun na manga kasogoan, ag magaan ana sa'kun na ipipaggibo.”