12
Ana Onga manunungud sa Aldaw nin Pagpapadiskanso
(Marcos 2:23-28; Lukas 6:1-5)
1 Usad na Aldaw nin Pagpapadiskanso, napaagi sira Jesus sa tanuman nin trigo. Napoponaw yo sakanyang manga disipolo kaya nanggoro sira nin manga trigo ag nagkaun. 2 Kaso makita adi nyo manga Pariseo, sinabi nira ki Jesus, “Ki'ta ana manga disipolo mo! Nigibo sira nya ipibawal na gibowun kin Aldaw nin Pagpapadiskanso.” 3 Piro sinabi ni Jesus sa sakanda, “Indi ninyo nabasa yo ginibo ni David ag nyo manga kaiba niya kaso maponaw sira? 4 Lominuug iya sa baguy nin Dios ag kominaun nin tinapay na inatang sa Dios, kina pinakaun man niya yo sakanyang manga kaiba, maski ipibawal na kaunun nin siisay man ta ana manga padi sana ana pweding komaun nyadi. 5 Ag ono indi pa man ninyo nababasa sa Kasogoan ni Moises na kada aldaw nin Aldaw nin Pagpapadiskanso, ana manga padi sa simbaan nagibalgar man sa kasogoan manunungud sa aldaw na adi, piro di sira nagkakasala? 6 Pisabi ko sainyo, agko dididi ngowan na mas orog kisa sa templo. 7 Kin naiisyan kinta'na ninyo ana muyang sabiyun nya nasasabi sa Kasoratan, ‘Bukung ana sainyong manga atang ana muya ko, kindi ana pagigin maiirakun ninyo.’ Indi kinta'na ninyo piosgaran ana manga taong uda kasa'lan. 8 Dail ta ana Agin nin Tao amo ana agko podir na magsabi kin ono ana kinakaipowan na gibowun sa Aldaw nin Pagpadiskanso.”
Ana Lalaking Paralisado ana Usad na Kamut
(Marcos 3:1-6; Lukas 6:6-11)
9 Ominalin si Jesus sa logar na adto ag pominonta sa usad na simbaan nin manga Judio. 10 Agko adto usad na lalaking paralisado ana usad na kamut. Agko man adto manga Pariseo ag nagkapirang tao na nagianap nin rason tanganing agko maisawut ki Jesus. Kaya nag-onga sira, “Ipitogot daw sa Kasogoan na magparaay kin Aldaw nin Pagpapadiskanso?” 11 Sominimbag si Jesus, “Alimbawa agko usad sa sainyo na agko karnirong natikrag sa bobon sa Aldaw nin Pagpapadiskanso, papaba'yan sana daw adi ninyo? Siyempre, aa'wasun ninyo adi, bukung amo? 12 Piro mas orog na maalaga ana tao kisa sa karniro! Kaya ipitogot nya Kasogoan na gomibo nin maraay sa Aldaw nin Pagpadiskanso.” 13 Kina, sinabiyan ni Jesus yo lalaking paralisado yo kamut, “Iunat mo ana saimong kamut.” Inunat man niya yo sakanyang kamut ag naraay adi ag naging pariyo nyo sa loyo. 14 Ominalin man yo manga Pariseo ag nag-osip-osip sira kin panaon ipapapaguraan si Jesus.
15 Piro isi ni Jesus yo plano nyo manga Pariseo, kaya ominalin iya adto. Kadakul yo manga sominonod sa sakanya, ag pinaraay niya yo nga'min na agko pimati. 16 Piro tinogonan niya sirang indi ipagpaisi sa iba kin siisay iya. 17 Nangyari adi tanganing magibo yo sinabi nyadto nin Dios sa paagi ni Propita Isaias:
18 “Monadi ana pinili kong sorogoon.
Namumu'yan ko iya ag ikinaoogma.
Itatao ko sakanya ana sa'kun na Espirito,
ag ipapaayag niya ana ostisya sa manga nasyon na ana manga tao pwedi nang magin matanos sa atobangan nin Dios.
19 Indi iya makikiroro, maloway kin makiosip,
ag indi marurungug ana sakanyang boses sa dagan.
20 Indi niya ipapakaraut ana manga maloloya ana pagtood o papaba'yan ana manga nauu'dan na nin paglaom.
Indi iya nisokoon anggan sa manggana ana ostisya.
21 Ag ana nga'min na tao nilaomon sa sakanya.”
Si Jesus ag si Satanas
(Marcos 3:20-30; Lukas 11:14-23)
22 Kina, agko dinara yo manga tao ki Jesus na usad na lalaking bota ag ngola ta sinaniban adi nin dimonyo. Pinaraay ni Jesus yo lalaki, kaya nakakita ag nakasabi na adi. 23 Nagngalas yo nga'min na nakakita nyadi, kaya naionga nira, “Amo na gayud adi ana agin ni hading David?” 24 Kaso marungug adi nyo manga Pariseo, sinabi nira, “Si Satanas na pamayo nya manga mararaut na espirito ana nagtao sa sakanya nin kapangyariyan na magpalayas nin maraut na espirito.” 25 Isi ni Jesus yo sakandang piisip, kaya sinabi niya sa sakanda, “Kin ana manga tao sa usad na kahadian nagiralabanlaban, marurumpag ana kahadian na aan. Bagaan man ana mangyayari sa usad na siyodad o baguy na ana manga niistar, niralabanlaban. 26 Kaya kin si Satanas mismo ana nagipalayas sa sakanyang nasasakupan, pikalaban niya ana sadiri niya! Kaya papaonong makapagpadagos ana sakanyang kahadian? 27 Kin ako nagipalayas nin manga maraut na espirito sa paagi ni Satanas, siisay man ana nagtao nin kapangyariyan sa manga disipolo ninyo tanganing magpalayas man nin mararaut na espirito? Sira na mismo ana nipatonay na nasasala kamong maraay! 28 Kin nipalayas ako nin manga mararaut espirito sa paagi nin Espirito nin Dios, muyang sabiyun ominabot na sa sainyo ana paghahadi nin Dios.”
29 “Indi pweding lu'gun nin paraonas ana baguy nya makusug na tao kin indi nawna niya adi maikaguud. Piro kin magu'ran na niya, pwedi na niyang onasan ana baguy nyadi.”
30 “Ana indi nikampi sa sa'kun, tomang sa sa'kun, ag ana indi nitabang sa sa'kun na magtipon, nagikayat. 31 Pisabi ko sa sainyo na ana nga'min na kasa'lan, pati ana pagbasangbasang sa Dios mapapatawad, piro ana pagbasangbasang sa Espirito Santo, indi mapapatawad. 32 Ana siisay man na magsabi nin maraut tomang sa Agin nin Tao, mapapatawad, piro ana siisay man na magsabi nin maraut tomang sa Espirito Santo, indi mapapatawad magpakinaono pa man.”
Nabibisto ana Kaoy sa Bonga Nyadi
33 “Nabibisto ana kaoy sa bonga nyadi. Kin maraay ana kaoy, maraay man ana bonga nyadi. Kin maraut ana kaoy, maraut man ana bonga nyadi. 34 Baga kamo manga lai nin agas! Paono kamo makapagsasabi nin maraay atang maraut kamo? Ta kin ono ana luug nya poso nya usad na tao, amo ana nilowas sa ngoso niya. 35 Ana maraay na tao nagisabi nin maraay, ta pono nin karaayan ana sakanyang poso. Piro ana maraut na tao, nagisabi nin maraut, ta pono nin kara'tan ana sakanyang poso. 36 Pisigoro ko sainyo sa Aldaw nin Pag-ookom, maninimbagan ana kada usad sa manga uda kamtangan na sasabiyun na isinabi niya. 37 Ta papatawarun o padodosaan kamo basi sa manga isinabi ninyo.”
Inayatan si Jesus nin Sinyalis Alin sa Langit
(Marcos 8:11-12; Lukas 11:29-32)
38 Kina, rominani ki Jesus yo nagkapirang paratoro nin Kasogoan ag nagkapirang manga Pariseo, sabi nira, “Maestro, pwedi daw tabi na paki'tan mo kami nin milagro alin sa langit?” 39 Sominimbag si Jesus, “Kamong manga taong maraut ag uda pagtood sa Dios! Nagianap kamo nin sinyalis piro uda ibang ipapakita sainyo kindi yo milagrong nangyari ki Propeta Jonas kaso o'nang panaon. 40 Kin papaonong si Jonas nasa luug nin tuyan nyo dakuung isra sa luug nin tolong aldaw ag tolong ga'bi, bagaan man ana mangyayari sa sa'kun, ako na Agin nin Tao, tolong aldaw ag tolong ga'bi man sa irarum nin raga. 41 Sa Aldaw nin Pag-ookom, nitindugun ana manga tagaNinive tanganing kondenarun ana manga tao sa panaon na adi, ta nagsuwsuw sira kaso mangadal sa sakanda si Jonas, ag ngowan pisabi ko sainyo monadi na ana mas orog pa ki Jonas! 42 Sa aldaw na aan, nitindugun man ana Reyna nin Sheba tanganing kondenarun ana enerasiyon na adi, ta nagbiyai iya alin pa sa kaarayong logar, tanganing magrungug sa kadonongan ni Solomon. Ag ngowan, kaiba na ninyo ana mas orog pa ki Solomon, piro indi ninyo muyang magrungug sa sakanya.”
Ana Pagbalik nya Maraut na Espirito
43 “Kin ana maraut na espirito nagilowas sa usad na tao, nagiponta aan sa manga raging na raga tanganing omanap nin mapapadiskansowan. Piro kin uda iya matorakan, 44 sasabiyun niya sa sadiri, ‘Maraay pa logod bomalik ako sa baguy na inalinan ko.’ Ag kin pagbalik niya maabotan niya adi na uda niistar, malinig ag pakaraay yo nga'min, 45 kina yo maraut na espiritong adi, nianapun nin pito pang espirito na mas maraut kisa sa sakanya. Nilu'gun sira sa taong adto ag adto niistarun. Kaya mas lalo pang nagin maraut yo kamutangan nyo taong adto kisa sa dati. Arug man nyaan ana magigin kamutangan nya maraut na tao sa panaon na adi.”
Yo Ina ag manga Ipatngod ni Jesus
(Marcos 3:31-35; Lukas 8:19-21)
46 Miyentras na nisabi pa si Jesus sa manga tao, nag-abot yo sakanyang ina ag manga ipatngod. Niugat sira sa lowas ta muya nira iyang makaosip. 47 Agko nagsabi sakanya, “Nasa lowas yo saimong ina ag manga ipatngod, ag muya ika nirang makaosip.” 48 Sominimbag si Jesus, “Siisay ana sa'kun na ina ag manga ipatngod?” 49 Itinoro niya yo sakanyang manga disipolo ag sominabi, “Amo adi ana sa'kun na ina ag manga ipatngod. 50 Ta ana siisay man na nisonod nya kamu'yan nya sa'kun na Ama sa langit amo kong ina ag manga ipatngod.”