13
Parabola manunungud sa Ibaibang Klase nin Raga
(Marcos 4:1-9; Lukas 8:4-8)
1 Nyo aldaw man sanang adto, lominowas nin baguy si Jesus ag nagponta sa gilid nyo lawud ag nag-uga adto. 2 Pinalibotan iya nyo kadakul na tao, kaya lominonad iya sa usad na bangka ag adto ominuga, abang yo manga tao man adto sa gilid nyo dagat. 3 Nangadal iya nin manga bagay-bagay sa paagi nin manga parabola. Sabi niya,
“Agko usad na taong nagtanum nin bini. 4 Abang nisabwag iya, agko nagkapirang manga bini yo natikrag sa gilid nyo dagan, ominabot yo manga bayong ag pinagparatoka yo manga bining adto. 5 Agko man manga bining natikrag sa kababatowan na agbay sana yo raga, madali yo pagtobo nyo bini dail ta maimpis sana yo raga. 6 Piro kaso masi'lagan nin aldaw nagkaurugang sana, dail ta indi nakaogat nin ararum. 7 Agko man manga bining natikrag sa ragang agko matodok na tuuk. Nagrambong nyo manga tuuk ag nata'guban yo manga tominobong bini. 8 Piro yo bining natikrag sa tobang na raga namonga; yo iba mananggatos, yo iba saysenta, agko man tigtatrayntang topasi yo kada uwuy.
9 Kamong manga nirungug, kinakaipowan ninyong intindiyun ana sainyong narungug.”a
Ana Katoyowan nya manga Parabola
(Marcos 4:10-12; Lukas 8:9-10)
10 Kina, rominani ki Jesus yo manga disipolo niya ag nag-onga, “Taynga tabi ta manga parabola ana pigamit mo sa pagitoro sa manga tao?”
11 Sominimbag si Jesus, “Itinao na sa sainyo ana kadonongan na maisiyan ana manga ilum manunungud sa paghahadi ni Dios, piro sa iba indi. 12 Dail ana taong nisonod sa narungug niyang kaostowan, tata'wan pa nin mas dakul na pagkaintindi. Piro ana taong indi nisonod sa kaostowan, maski ana agbay niyang naiintindiyan koko'non pa sakanya. 13 Kaya ana rason kin taynga ako nagigamit nin parabola sa pagitoro ko sa sakanda, tanganing maski man nikita sira indi nakakapiyar, ag nagirungug piro indi nakakaintindi. 14 Kaya nagigibo sa sakanda ana propesiya ni Isaias na sominabi:
‘Magrungug man kamo nin magrungug, indi kamo makakaintindi,
ag toma'naw man kamo nin toma'naw, indi kamo makakakita.
15 Dail ta makisil ana poso nyading manga taong adi;
tinagu'ban nira ana sakandang manga talinga,
ag ipinirung nira ana sakandang manga mata.
Kin indi kinta'na nira ginibo ana manga adi, kinta'na nakakita, nakarungug, ag nakaintindi sira ag magbalik buut sa'kun,
tanganing paraayun ko sira.’
16 Kaya paladan kamo, dail ta nakakakita kamo ag nakaintindi! 17 Pisabi ko sainyo, kadakul na propita ag matatanos na tao nyadto yo nagma'wut na makakita ag makarungug nya manga nakikita ag narurungug ninyo ngowan, piro indi adi nangyari sa sakandang panaon. ”
Ipinaliwanag ni Jesus yo Parabola manunungud sa Paraoma
(Marcos 4:13-20; Lukas 8:11-15)
18 “Runggun ninyo ana muyang sabiyun nyading parabolang adi manunungud sa paraoma. 19 Ana manga nagirungug sa sasabiyun manunungud sa kahadian nin langit piro indi adi inintindi, arug sira nya manga bini na natikrag sa gilid nyo dagan. Nag-abot yo dimonyo ag inaguw yo nakatanum sa poso nira. 20 Yo manga bini na natikrag sa kababatowan amo adtong manga taong nagrungug nin sasabiyun nin Dios ag maogma ading inako tolos. 21 Piro indi adi nakatanum sa sakandang poso kaya indi sira nagpadagos. Pag-abot nyo manga kadipisilan o manga pag-oosig dail sa sasabiyun nin Dios na sakandang inako, tolos sirang nagitalikod sa sakandang pagtood. 22 Yo bini man na natikrag sa matodok na katutuukan, amo yo manga taong nagirungug nin sasabiyun nin Dios, piro dail sa manga kaa'ditan sa boway na adi, ag pagma'wut na yomaman, yo sasabiyun nin Dios indi namonga sa sakandang boway. 23 Piro yo bini na natikrag sa maraay na raga, yo manga taong nirungug nya sasabiyun nin Dios ag naiintindiyan adi. Namonga adi nin dakul sa sakandang boway, ana iba sanggatos, ana iba saysenta ag ana iba man traynta.”
Parabola manunungud sa manga Tuuk sa Trigowan
24 Nag-estoriya si Jesus nin usad pang parabola sa sakanda, “Ana paghahadi nin Dios nakakaparyo sa usad na paraoma na nagsabwag nin maraay na bini sa oma niya. 25 Piro usad na ga'bi abang nitorog yo nga'min, ominabot yo kalaban niya ag nagsabwag nin manga maraut na tuuk adto sa trigowan, kina ominalin. 26 Kaso tominobo na yo manga trigo ag nagkabonga, tominonga man yo manga maraut na tuuk. 27 Kaya rominani yo manga sorogoon sa kagsadiri nyo oma ag sominabi, ‘Among, buku tabing maraay na bini yo itinanum ninyo? Sa'ri daw alin ana manga tominobong tuuk na aan?’ 28 Sominimbag iya, ‘Usad na kalaban ana kagibo nyadi.’ Inonga iya nyo manga sorogoon niya, ‘Ono, muya mo tabing gaboton namun ana manga tuuk na aan?’ 29 ‘Indi!’ simbag nyo paraoma. ‘Baka sa paggabot ninyo nin manga tuuk, pati ana manga trigong kaabay makadamay. 30 Paba'yan sana ninyong pariyong tomalobo anggan sa tigpolotan. Pagpolot, sasabiyun ko sa manga parapolot na o'naun na nawna nirang gaboton ana manga tuuk, ag tiponon tanganing soloon. Kina ipapapolot ko ana trigo ag ipapasaray sa tambobong ko.’ ”
Parabola manunungud sa To'wang nin Mostasa
(Marcos 4:30-32; Lukas 13:18-19)
31 Padagos na nangadal si Jesus sa paagi nin manga parabola, sabi niya sakanda, “Ana kahadian nin Dios pariyo nya usad na to'wang nin mostasa na itinanum sa oma niya. 32 Amo adi ana pinakasaday sa intirong to'wang, piro kin adi itanum ag tomalobo, nagigin mas ataas adi kisa sa ibang manga tanum na golay, na baga poonkaoy ana taas, kaya pisawagan nin manga bayong ana manga sanga nyadi.”
Ana Parabola nin Lebadora
33 Inistorya pa ni Jesus yo usad pang parabola, “Ana kahadian nin Dios maipapariyo sa usad na babaying nagbutang nin lebadora sa tolong otsabang arina anggan na lumubag ana bilog na minasa.”
Ana Pagamit ni Jesus nin manga Parabola
(Marcos 4:33-34)
34 Itinoro ni Jesus sa manga tao yo manga bagay na adi sa paagi nin manga parabola, uda iya sinabi sa sakanda na indi gominamit nin parabola. 35 Ginibo niya adi tanganing magibo yo sinabi nin propita:
“nagisabiyun ako sa sakanda sa paagi nin manga parabola,
Ipapaisi ko sa sakanda ana manga bagay na naluluum poon pa kaso lalangun ana kina'ban.”
Ana Muyang Sabiyun nyo Parabola manunungud sa manga Tuuk sa Trigowan
36 Kina, bina'yan ni Jesus yo manga tao ag nagluug sa baguy. Rominani yo manga disipolo niya ag sinabi sa sakanya, “Paliwanagan man tabi sa sa'mun yo muyang sabiyun nyo parabola manunungud sa manga maraut na tuuk sa oma.” 37 Sominimbag si Jesus, “Ana Agin nin Tao among nagsabwag nyo maraay na bini. 38 Ana oma amo ana kina'ban. Yo maraay na bini amo ana manga taong nagpasakup sa kahadian. Ana mararaut na tuuk amo man yo manga sakup ni Satanas. 39 Yo kalaban na nagsabwag nin manga maraut na tuuk, uda iba kindi yo dyablo. Ana pagpolot amo ana kataposan nya kina'ban, ag yo manga parapolot amo ana manga angel. 40 Kin papaonong pinagtipon yo manga tuuk ag sinolo, bagaan man ana mangyayari sa kataposan nya kina'ban. 41 Sosogoon nya Agin nin Tao ana manga anghel niya tanganing tiponon ag alinun sa kahadian niya ana nga'min na paragibo nin maraut. 42 Iuumut sira sa ornowan na nagikalayo, kin sa'ri mananangis sira ag nagiragutun ana sakandang manga ngipun. 43 Ana manga matanos nagiliwanagun na baga aldaw sa kahadian nya sakandang Ama. Kaya kamong manga nirungug, kinakaipowan ninyong pag-isipan adi!”
Parabola manunungud sa Nasasaray na Kayaman
44 Sinabi pa ni Jesus, “Ana Kahadian nin Langit nakakapariyo sa nakatalbung na kayaman sa usad na oma. Nakali adi nyo usad na tao, kina tina'guban otro. Naogma iyang maraay kaya ipinabakal niya yo nga'min niyang pagsorosadiri tanganing bakalun yo omang adto.”
Parabola manunungud sa Perlas
45 “Ana kahadian nin langit nakakapariyo sa usad na negosyante na nagianap nin mararaay na klase nin perlas. 46 Kaso makatorak iya nin usad na makantidad na perlas, ipinabakal niya yo nga'min niyang pagsorosadiri ag binakal yo perlas na adto.”
Parabola manunungud sa Pokot
47 “Ana Kahadian nin langit mapapariyo man sa usad na pokot na ibinontog sa dagat kina nakarakup nin manlainlain na klase nin isra. 48 Kaso napono na yo pokot, ginoyod adi nyo manga paraisra sa gilid nyo dagat. Tinangkas nira yo manga isra sa pokot, kina linain yo manga maraay na klase ag ibinutang sa banyera, piro yo manga maloyang klase inumut nira. 49 Bagaan man ana mangyayari sa kataposan nya kina'ban. Niaboton ana manga anghel ag ilalain ana manga makasa'lan sa manga matanos. 50 Kina, iuumut ana manga makasa'lan sa niludab na kalayo. Adto mananangis sira ag nagiragutun ana sakandang manga ngipun.”
51 Inonga ni Jesus yo sakanyang manga disipolo, “Ono naiintindiyan ninyo ana manga bagay na adi?” “Amo tabi,” simbag nira. 52 Ag sinabi ni Jesus sa sakanda, “Kaya ngani, ana kada paratoro nin kasogoan na napangadalan manunungud sa paghahadi nin Dios, nakakapariyo sa usad na kagbaguy na nagbotbot nin manga ba'go ag loma na kagamitan alin sa pisarayan niya.”
Indi Inako si Jesus sa Nazaret
(Marcos 6:1-16; Lukas 4:16-30)
53 Kaso maisabi na ni Jesus ana manga parabolang adi, ominalin iya sa logar na adto, 54 ag dominagos iya sa sadiring banwaan. Pag-abot niya adto, nangadal iya sa sakandang baguy sambaan, nagngalas sakanya yo manga kaimanwa niya. Sabi nira, “Sa'ri daw kominoko nin kadonongan ana taong adi? Paono daw iya nakakagibo nin manga ngangalasan? 55 Bukung amo adi yo agin nin panday? Bukung si Maria ana sakanyang ina, ag sira si Santiago, si Jose, si Simon ag si Judas ana sakanyang manga ipatngod na lalaki? 56 Ag bukung didi man sa'tun nakaistar yo manga ipatngod niyang babayi? Sa'ri daw talaga iya nakatuud nyading manga bagay na adi?” 57 Indi nira muyang magtood sa sakanya. Kaya sinabi ni Jesus sa sakanda, “Ana usad na propita ipigalang dawa sa'ring logar, pwera sa sadiri niyang banwaan ag pamilya.” 58 Kaya indi gominibo si Jesus nin kadakul na milagro adto dail sa kau'dan nira nin pagtood sakanya.