14
Yo Pagkagraan ni Juan na Parabunyag
(Marcos 6:14-29; Lukas 9:7-9)
1 Kaso panaon na adto, nabari'tan ni Herodes na nipamayo sa Galilea ana manunungud ki Jesus. 2 Sinabi niya sa sakanyang manga opisyal, “Talagang si Juan na Parabunyag adi! Naboway iya otro, kaya nakakagibo iya nin manga milagro.”
3 Sinabi adi ni Herodes ta iya mismo yo nagparakup ag nagpakarsil ki Juan. Ginibo niya adi dail ki Herodias na sugud nyo sakanyang ipatngod na si Felipe. 4 Pirmi kayang pisabi ni Juan ki Herodes na indi tama na mag-iba sira ni Herodias. 5 Muya kinta'nang ipaguraan ni Herodes si Juan, piro natatakot iya sa manga tao, ta pibisto nirang propita si Juan na Parabunyag.
6 Kaso ominabot yo kompleanyo ni Herodes, yo daragang agin ni Herodias bominayle sa atobangan nyo manga bisita na biyong ikinaogma ni Herodes. 7 Kaya nanoga iyang itatao sa daraga ana onoman na ayatun nyadi. 8 Sa solsol nyo sakanyang ina, sinabi nyo daraga, “Itao mo tabi sa sa'kun na nakabutang sa bandiya ana payo ni Juan na Parabunyag.” 9 Namundu yo hadi sa inayat nyo daraga, piro dail sa sakanyang panogang narungug nyo manga bisita, nagpasogo iyang itao yo piayat nyo daraga. 10 Kaya pinogotan si Juan sa luug nyo karsilan. 11 Ibinutang yo payo niya sa usad na bandiya ag itinao sa daraga, ag dinara man adto nyo daraga sa sakanyang ina. 12 Kinoko nyo manga disipolo ni Juan yo bangkay niya ag ilinubung. Kina, ibinarita nira ki Jesus yo nangyari.
Pinakaun ni Jesus yo Singko Mil Katao
(Marcos 6:30-44; Lukas 9:10-17; Juan 6:1-14)
13 Kaso mabari'tan ni Jesus yo nangyari ki Juan, lominonad iya sa usad na bangka ag pominontang solo sa usad na toninung na logar. Piro kaso mabari'tan adi nyo manga taong alin sa manlainlain na banwaan, nagbaraklay sira paponta sa logar na popontaan ni Jesus. 14 Kaya pagroong ni Jesus sa gilid nyo lawud, nakita niya yo kadakul na tao. Nairak iya sa sakanda kaya pinaraay niya yo agko manga kamatian sa sakanda.
15 Kaso nipasinarum na, rominani ki Jesus yo sakanyang manga disipolo ag sominabi, “Kalangtaran tabi ana logar na adi ag madali nang lomonod ana aldaw. Paalinun mo na tabi ana manga tao tanganing makaponta na sira sa manga baryo ag makabakal nin makakaun nira.”
16 Piro sinabi sa sakanda ni Jesus, “Indi na nira kinakaipowan na omalin pa. Kamo ana magtao sa sakanda nin makakaun.”
17 Sominimbag sira, “Limang tinapay sana tabi, ag dowang isra ana agko kita.”
18 “Daraa ninyo didi sa sa'kun,” sabi ni Jesus. 19 Pinauga niya sa katutuukan yo manga tao. Kinoko niya yo limang tinapay ag yo dowang isra. Tominangad iya sa langit ag nagpasalamat sa Dios. Binanga'banga niya yo manga tinapay ag itinao sa manga disipolo, kina ipinanao man adi nyo manga disipolo sa manga tao. 20 Nagkaun sira nga'min ag nabosog. Ag kaso tiponon nyo manga disipolo yo natuda, nakapono sira nin dosing bakol. 21 Agko singko mil na lalaki yo kominaun, indi pa kaiba sa bilang yo manga babayi ag manga agin.
Nag-agi si Jesus sa Sapuw nyo Tobig
(Marcos 6:45-52; Juan 6:15-21)
22 Kina, pinalonad tolos ni Jesus sa bangka yo manga disipolo niya ag pinao'na sa balyo nyo lawud, abang pipasamput niya yo manga tao. 23 Pakaalin nyo manga tao, nagtokad iyang solo sa usad na bantuy tanganing mangadyi. Anggan sa gomina'bi adto iyang nisolo. 24 Nyo oras na adto yo bangkang pilonadan nyo manga disipolo arayo na sa gilid nyo lawud, ag pirapado nin manga longso ta lakusug nyo parus. 25 Kaso niipipita na, sominonod sa sakanda si Jesus na niagi sa sapuw nyo tobig. 26 Pagkakita nyo manga disipolo na agko niagi sa tobig, pinanggirabowan sira. Ag napauyaw sira nin, “Molto!” dail sa grabing katakotan. 27 Piro sominabi tolos si Jesus sa sakanda. “Pakusgun ninyo ana sainyong buut! Ako adi! Di kamo matakot!”
28 Sominabi si Pedro, “Kagorangnan! Kin ika tabi aan, papontaun mo ako diyan sa saimo na niagi man sa sapuw nya tobig.”
29 “Mari!” sabi ni Jesus. Kaya bominaba si Pedro sa bangka ag ominagi sa sapuw nyo tobig paponta ki Jesus. 30 Piro kaso marisa niya yo makusug na parus, natakot iya ag oroagbay na nitundag. Kaya nag-uyaw iya, “Kagorangnan iligtas mo tabi ako!” 31 Tolos man iyang sinapuwat ni Jesus ag sinabi. “Kasaday nya saimong pagtood! Taynga ta nagdowadowa ika?” 32 Pagkalonad nirang dowa sa bangka, pominondo tolos yo parus. 33 Kina nagsamba ki Jesus yo nga'min na nakalonad sa bangka ag sominabi, “Osto na ika ana Agin nin Dios!”
Pinaraay ni Jesus yo manga Agko Pimati sa Genesaret
(Marcos 6:53-56)
34 Kaso makabalyo na sira sa lawud rominoong sira sa banwaan nin Genesaret. 35 Kaso mabisto si Jesus nyo manga tagaadto, ipinamarita nira sa pag-arabayan na logar yo pag-abot niya. Kaya dinara sa sakanya nyo manga tao yo manga agko pimati. 36 Ipinakiosip nira ki Jesus na paapwasun man basang maski sa gayad nya sakanyang bado yo manga agko kamatian. Ag yo nga'min na nakaapwas naraay.