15
Manga Minang Katoroan
(Marcos 7:1-13)
1 Kina, rominani ki Jesus yo nagkapirang Pariseo ag manga paratoro nya Kasogoan alin sa Jerusalem. Inonga nira si Jesus, 2 “Taynga ta pibalga nya saimong manga disipolo ana kaogalian na alin pa sa sa'tun na manga ginikanan? Indi sira nagiunuw nin kamut bago magkaun.” 3 Sinimbag sira ni Jesus, “Ag kamo, taynga ta pibalga man ninyo ana kasogoan nin Dios tanganing makoyog ana namanang tradisiyon? 4 Alimbawa isinogo nin Dios, ‘Igalang mo ana saimong ama ag ina,’ ag ‘ana siisay man na magsabi nin maraut tomang sa ama o sa ina, kinakaipowan na magraan.’ 5 Piro ipitoro ninyo na kin sabiyun nya usad na agin sa sakanyang manga gorang na ana tabang na itatao niya sa sakanda nakatagama na sa Dios, 6 indi na niya kinakaipowan pang tomabang pa sa sakanda. Pialinan ninyo nin alaga ana Kasogoan nin Dios dail sa sainyong manga tradisiyon. 7 Kamong manga parasaginsagin! Osto yo propesiya ni Propeta Isaias manunungud sa sainyo:
8 ‘Ana manga taong adi, ipigalang ako sa paagi nya sakandang ngoso sana,
piro ana sakandang poso arayo sa sa'kun.
9 Ana sakandang pagalang uda kamtangan,
ta binalyowan nira ana Kasogoan nin Dios nin sadiri nirang gibong katoroan.’ ”
Ana manga Bagay na Nipaati sa Tao
(Marcos 7:14-23)
10 Pinarani ni Jesus sa sakanya yo manga tao ag sinabi sa sakanda, “Magrungug kamo, ag intindiyun ana sa'kun na sasab'yun. 11 Buku ana niluug sa ngoso nya tao ana nakakapaati sa sakanya kindi ana manga nilowas sa ngoso.” 12 Rominani yo manga disipolo ni Jesus sa sakanya ag sinabi nira, “Isi mo tabi, nagkulug yo buut nyo manga Pariseo sa sinabi mo.” 13 Sominimbag si Jesus, “Gagaboton ana kada tanum na bukung itinanum nya sa'kun na Ama. 14 Paba'yan ninyo sira, manga bota sirang parakabit. Kin bota ana nikabit sa kapariyong bota, pariyo sirang matiktikrag sa kali.” 15 Sinabi ni Pedro sa sakanya, “Ipaintindi mo tabi sa'mun kin ono ana muyang sabiyun nyo sinabi mong parabola.” 16 “Ono indi pa nanggayud kamo nakakaintindi?” onga ni Jesus sa sakanya. 17 “Ono, indi ninyo isi na onoman na ka'nun, niluug sa tuyan, kina nilowas sa lawas? 18 Piro ana nilowas sa ngoso nya tao, nialin aan sa sakanyang poso ag amo adi ana nipaati sakanya. 19 Dail ta sa poso nin tao nialin ana nga'min na maraut na kaisipan na among nitoglong sa sakanya na gumuraan, magsambay, gomibo nin nga'min na klase nin kaosmakan, mangonas, magpotnay, ag manraut sa sakanyang kapwa. 20 Ana manga adi ana nipaati sa tao ag buku ana magkaun na indi nawna nangogas nin kamut.”
Yo Pagtood nyo Babaying Hentil
(Marcos 7:24-30)
21 Ominalin si Jesus sa logar na adto ag nagponta sa logar na arani sa siyodad nin Tiro ag Sidon. 22 Usad na babaying tagaCanaan ana nakaistar sa logar na adto, rominani iya ki Jesus ag nakimairak, ag makusug na sominabi, “Kagorangnan, agin ni David! Kairakan mo man tabi ako, yo sa'kun na agin na babayi sinaniban nin maraut na espirito ag biyong pipadipisilan.” 23 Piro indi nagsimbag si Jesus. Kaya rominani sa sakanya yo manga disipolo niya ag sominabi, “Paalinun mo na tabi iya, ta niparasonod sa sa'tun ag nipararibok.”
24 Sominimbag si Jesus, “Sinogo sana ako sa manga Israelita na baga manga nalalagalag na karniro.” 25 Piro rominani pang maraay yo babayi ki Jesus, ag lominood sa atobangan niya, ag sominabi, “Kagorangnan, tabangi man tabi ninyo ako.” 26 “Buku tama na ko'non ana pagkaun nya manga agin ag ipakaun sa manga ayam.” sabi ni Jesus. 27 “Osto tabi aan Kagorangnan,” sabi nyo babayi. “Piro dawa ana manga ayam nikaun man nya manga natitikrag na alin sa lamisa nya kagsadiri sakanya.” 28 Kaya sinabi ni Jesus sa sakanya, “Manay, agko ika kadakuung pagtood! Mangyayari ana piayat mo.” Nyo oras man sanang adto naraay yo sakanyang agin.
29 Ominalin si Jesus sa logar na adto, ominagi iya sa gilid nyo lawud nin Galilea, ag nagtokad iya sa bokid ag nag-uga adto. 30 Nagponta sakanya yo kadakul na tao na agko manga darang pilay, bota, ngola, ag iba pang agko manga kamatian. Ibinutang nira ana manga adi sa atobangan ni Jesus, ag pinaraay niya ana nga'min adto. 31 Yo manga tao nagkangaralas. Ta yo manga ngola nakakapagsabi na, yo manga lopog nakabowat na, yo pilay nakakaagi na, yo bota nakakakita na. Kaya nag-oromaw sira sa Dios nya Israel.
Pinakaun ni Jesus yo Kwatro Mil Katao
(Marcos 8:1-10)
32 Pinarani ni Jesus yo dosing disipolo niya ag sinabiyan, “Naiirak ako sa manga taong adi, dail tolong aldaw ko na sirang kaiba, ag uda na sira makaun. Indi ko man muyang pasamputun sirang ponaw, ta baad panloyaun sira sa aagyan abang pasamput.”
33 Sominimbag yo manga disipolo, “Sari man tabi kita makakakoko sa kalangtaran na adi nin pagkaun na ipapakaun sa bagadi kadakul na tao?”
34 Inonga sira ni Jesus, “Pirang tinapay agko kamo?”
“Pitong tinapay tabi ag nagkapirang saraday na isra.” 35 Pinauga ni Jesus sa raga yo manga tao. 36 Kinoko niya yo pitong tinapay ag yo manga isra, ag nagpasalamat sa Dios. Kina, pinagporopidaso niya adi ag itinao sa manga disipolo tanganing ipanao sa manga tao. 37 Kominaun yo nga'min ag nabosog. Kaso tiponon nyo manga disipolo ni Jesus yo sominobrang tinapay, nakapono sira nin pitong bakol. 38 Kwatro mil na lalaki yo kominaun, indi pa kaiba sa bilang na adi yo manga babayi ag agin.
39 Pakatapos nyadi, pinaalin na ni Jesus yo manga tao. Lominonad iya sa bangka ag nagponta sa logar na piba'nong Magadan.