16
Inayat Nira ki Jesus na Gomibo nin Milagro
(Marcos 8:11-13; Lukas 12:54-56)
1 Agko manga Pariseo ag Saduceong rominani ki Jesus. Muya nirang testingun iya, kaya inayat nirang magpakita iya nin milagro alin sa Diosa bilang patonay na iya talaga ana Cristo. 2 Piro sinabi ni Jesus sa sakanda, “Kin palonod na ana aldaw ag mapola ana langit, pisabi ninyo, ‘Magigin maraay ana panaon kinaodma.’ 3 Kin pita naman sasabiyun ninyo, ‘Nioranun ngowan ta nida'gum.’ Isi ninyo ana kaologan nya manga sinyalis na nakikita ninyo sa langit, piro taynga ta indi ninyo isi ana kaologan nya manga nangayayari ngowan? 4 Kamong manga tao sa panaon na adi, manga maraut ag bukung osto sa Dios! Niayat kamo nin milagro. Uda sinyalis na ipapakita sainyo pwera adto sa nangyari ki Jonas kaso nyadto.”
Kina, ominalin si Jesus.
Ana Lebadora nin manga Pariseo ag manga Saduceo
(Marcos 8:14-21)
5 Nagbalyo yo manga disipolo sa loyong parte nyo lawud, piro nalingawan nirang magdara nin tinapay. 6 Sinabi sa sakanda ni Jesus, “Maglikay kamo sa lebadora nya manga Pariseo ag Saduceo.”
7 Nag-osip-osip yo manga disipolo. Pag-una nira, kaya niya sinabi adto dail ta uda sira darang tinapay.
8 Isi ni Jesus kin onong piorosipan nira, kaya sinabi niya, “Kasaday nya sainyong pagtood! Taynga kamo ta nidiskotir na uda kamo darang tinapay? 9 Indi pa nanggayud kamo nakakaintindi? Ono, nalingawan na ninyo yo ginibo ko adto sa limang tinapay tanganing magpakaun nin singko mil katao? Indi ninyo narurumruman kin pirang bakol yo napono ninyo nyo natudang pagkaun. 10 Yo pitong tinapay man kaso pagbangabangaun ko ag ipakaun sa kwatro mil katao, pirang bakol man yo sominobra? 11 Indi ninyo naiintindiyan na buku manunungud sa tinapay ana pisabi ko sainyong, ‘Maglikay kamo sa lebadora nya manga Pariseo ag manga Saduceo.’ ”
12 Nyadto pa sana nira naintindiyan na buku manunungud sa tinapay yo pisabi ni Jesus, kindi pipalikay niya sira sa katoroan nyo manga Pariseo ag manga Saduceo.
Paayag ni Pedro manunungud ki Jesus
(Marcos 8:27-30; Lukas 9:18-21)
13 Kaso makaabot si Jesus sa karagaan nin Cesarea Filipos, inonga niya yo sakanyang manga disipolo, “Ono yo pisabi nya manga tao manunungud sa sa'kun, Ako, na Agin nin Tao?” 14 Sominimbag sira, “Agko tabi manga nisabi na ika si Juan na Parabunyag. Agko man nisabing ika si Elias. Ag ana iba man nisabing ika si Jeremias o usad sa manga propita.”
15 Inonga sira ni Jesus, “Piro para sainyo, siisay ako?”
16 Sominimbag si Simon Pedro, “Ika tabi ana Cristo. Ana Agin nin Dios na boway.”
17 Sinabi ni Jesus sakanya, “Pinagbindisyonan ika nin Dios, Simon na agin ni Jonas. Dail ta bukung tao ana nagpaisi saimo nya mga bagay na adi kindi ana sa'kun na Ama na nasa langit. 18 Kaya ngowan pisabi ko saimo na ika si Pedro,b ag sa batong adi, itotogrok ko ana sa'kun na simbaan, ag indi adi madadaug maski nya kapangyariyan nya kagra'nan.c 19 Ag itatao ko saimo ana kapangyariyand sa kahadian nin Dios.eOnoman ana ipagbawal mo sa raga, ibabawal man sa langit, ag onoman na itogot mo sa raga, itotogot man sa langit.” 20 Kina, maigpit niyang pinatanidan yo sakanyang manga disipolo na indi nira pagsabiyun dawa kiisay na iya ana Cristo.
O'nang Pagpaisi ni Jesus manunungud sa Sakanyang Kagra'nan
(Marcos 8:31-9:1; Lukas 9:22-27)
21 Poon nyadto, pino'nan nang isplikaran ni Jesus yo sakanyang manga disipolo na kaipowan niyang pomonta sa Jerusalem, ag magsapo nin dakul na kadipisilan sa kamut nyo manga namamayong manga Judio, sa namamayo sa manga padi ag sa manga paratoro nya Kasogoan. Ag ipapaguraan nira iya, piro sa ikatolong aldaw maboboway iya otro.
22 Kaso marungug adi ni Pedro, isinoway niya si Jesus sa kadaklan ag sinabiyan nin bagadi: “Di man logod ipagtogot nin Dios, Kagorangnan! Indi tabi kaipowan na mangyari saimo ana bagay na adi.” 23 Inatobang ni Jesus si Pedro ag sinabi, “Romayo ika sa sa'kun, Satanas! Pipugulan mo akong gibowun ana kamu'yan nin Dios, dail ta ana piisip mo bukung ana kamu'yan nin Dios kindi kamu'yan sana nin tao.”
24 Kina, sinabi ni Jesus sa manga disipolo niya, “Ana siisay man na muyang somonod sa sa'kun, kinakaipowan na bukung sadiri ana pio'na. Ag kinakaipowan anda iyang atobangun ana kagra'nanf sa pagsonod sa sa'kun. 25 Dail ana taong nima'wut na iligtas ana sakanyang boway, mauu'dan nyadi. Piro ana taong nima'wut na magtao nya sakanyang boway alang-alang sa sa'kun, magkakaagko boway na uda kapondowan. 26 Dail onong pakinabang nin usad na tao kin mapasakanya ana nga'min na bagay sa intirong kina'ban piro mapakaraut man ana sakanyang boway? Agko daw pambayad ana tao tanganing mabawi dayaday ana boway niya? 27 Dail ta Ako na Agin nin Tao niaboton kaiba yo manga angel na agko kapangyariyan nya Ama ag piprimyowan ko ana kada usad basi sa sakanyang ginibo. 28 Sa kaostowan pisabi ko sainyo, agko nagkapira didi sa sainyo na indi magagraan anggan na indi nira ako nakikita na Agin nin Tao na niabot bilang Hadi.”