17
Ana Pagkaliwat nya Itsora ni Jesus
(Marcos 9:2-13; Lukas 9:28-36)
1 Pakaagi nin unum na aldaw, iniba ni Jesus si Pedro, yo mag-ipatngod na Santiago ag Juan sa usad na ataas na bokid na sira sana. 2 Ag abang nakakita sira ki Jesus, nakita nirang nagba'go yo itsora nyadi. Nagliwanag na baga aldaw yo sakanyang lalawgun, ag yo bado niya nagin lapoti ag nakakapasing pagki'tun. 3 Ag bigla na sana nirang nakita si Moises ag si Elias na nakikiistorya ki Jesus. 4 Kaya sinabi ni Pedro ki Jesus, “Kagorangnan, maraay na didi kami.a Kin muya mo tabi, gomibo ako nin tolong payag, usad para saimo, usad para ki Moises, ag usad ki Elias.” 5 Miyentras na nisabi pa si Pedro nata'guban sira nin nakapapasing panganoron. Ag agko sira narungug na boses alin sa panganoron na sominabi, “Adi ana namumu'yan kong Agin, na ikinaoogma kong maraay. Runggun ninyo iya!” 6 Kaso marungug adi nyo mga disipolo, nagdapla sira sa katakotan. 7 Piro rinaniyan sira ni Jesus, tinaptap ag sinabiyan, “Tomindug kamo! Indi kamo matakot!” 8 Pagtangad nira uda na sira nakita kindi si Jesus na sana.
9 Kaso nibongsod na sira sa bokid, sinabiyan sira ni Jesus, “Indi ninyo pagsabiyun dawa kiisay yo nakita ninyo anggan na ako na Agin nin Tao indi pa naboboway otro.”
10 Inonga iya nyo sakanyang mga disipolo, “Taynga ta pisabi nyo manga paratoro nya Kasogoan na kinakaipowan kono nawnang omabot si Elias bago omabot ana Cristo?” 11 Sinimbag sira ni Jesus, “Osto aan, kaipowan ngani talagang si Elias yo mao'nang omabot tanganing ipreparar yo nga'min na bagay. 12 Piro sabiyun ko sainyo: nag-abot na si Elias. Kaya lang indi iya nabisto nin manga tao ag ginibo nira yo muya nirang gibowun sa sakanya. Bagaan man ana gigibowun nira sa sa'kun na Agin ni Tao. Pasasakitan man nira ako.” 13 Ag naintindiyan nyo manga disipolo niya na ana pitokoy niya amo si Juan na Parabunyag.
Pinaraay ni Jesus yo Agin na Lalaking Pisaniban nin Maraut na Espirito
(Marcos 9:14-29; Lukas 9:37-43a)
14 Pagbwelta nira ni Jesus sa kinaaadtowan nyo dakul na tao, nagrani sa sakanya yo usad na lalaki ag naglood sa atobangan niya ag sominabi, 15 “Kagorangnan, mairak man tabi ika sa agin kong lalaki! Agko iya ilang na sobisobi ag nasasakitan iyang biyo kin iya pituud. Pirmi iyang natotomba sa kalayo ag pirmi man iyang natitikrag sa tobig. 16 Dinara ko na iya sa saimong manga disipolo, piro indi man nira naparaay.”
17 Sominimbag si Jesus, “Kamong enerasyon nin manga uda pagtood ag baloktot ana pag-iisip! Anggan kinaono pa ako magitiusun sainyo? Daraa ninyo didi ana agin!” 18 Sinawi ni Jesus yo maraut na espirito ag lominowas adi sa agin. Nyadto man sana naraay yo agin. 19 Kaso sirasira na sana, rominani ki Jesus yo manga disipolo niya ag nag-onga, “Taynga ta indi tabi namun mapalayas yo maraut na espirito?”
20 Nagsimbag si Jesus, “Dail ta kasaday ana pagtood ninyo. Pisabi ko sainyo ana kaostowan, kin agko kamo pagtood na arug nya to'wang nin mostasa kasaday, masasabi ninyo sa bokid na adi, ‘Bomalyo ika adto!’ ag nibalyowun talaga aan. Uda bagay na indi ninyo magigibo.” 21 [Piro ana bagaan na klasi nin maraut na espirito, mapapalayas sana sa paagi nin pangadyi ag pag-aayono.]
Ana Ikadowang Pagpaisi ni Jesus manunungud sa Sakanyang Kagra'nan
(Marcos 9:30-32; Lukas 9:43b-45)
22 Kaso nagitipon sira si Jesus ag yo manga disipolo niya sa Galilea, sinabi niya sakanda, “Ako na Agin nin Tao, itatao sa kamut nya manga tao. 23 Gugura'nun nira ako, piro maboboway ako otro sa ikatolong aldaw.”
Biyo ading ikinapu'nguw nyo manga disipolo ni Jesus.
Ana Pagbayad nin Bowis para sa Templo
24 Pag-abot nira sa Capernaum, nagrani ki Pedro yo manga parasingil nin bowis ag nag-onga, “Ono nibayad man nin bowis ana maestro ninyo para sa templo?” 25 Nagsimbag si Pedro, “Amo, nibayad iya.”
Kaso makabalik na si Pedro adto sa sakandang pidagosan na baguy, inonga iya ni Jesus, “Ono sa pag-una mo Pedro? Kiisay nipangolikta nin manga bowis ana manga hadi, sa manga agin nira o sa ibang tao?” 26 Nagsimbag si Pedro, “Sa ibang tao tabi.” Sinabi ni Jesus, “Kin amo aan, nangangaologan na indi kinakaipowan na magbayad nin bowis ana manga agin.b 27 Piro kin indi kita magbayad, tibaad, magkulug ana buut nira sa sa'tun. c Kaya pomonta ika sa lawud ag mamingwit. Iboka mo ana ngoso nya o'nang israng mararakup mo ag makikita mo adto ana sintabong tamang ipambayad sa bowis tang dowa. Ko'non mo adi ag ibayad sa manga nangongolikta nin bowis para sa templo.”