18
Siisay ana Pinakaorog?
(Marcos 9:33-37; Lukas 9:46-48)
1 Nyo panaon na adto, rominani ki Jesus yo manga disipolo niya ag nag-onga, “Siisay tabi ana pinakaorog sa nga'min na kaiba sa kahadian nin Dios?”
2 Bina'no ni Jesus yo usad na saday na agin ag pinatindug sa atobangan nira, ag sinabi, 3 “Pisabi ko sainyo ana kaostowan, kin indi kamo magba'go ag magin arug nya saday na agin, nongka kamong mapapaiba sa kahadian nin Dios. 4 Ana siisay man na nipakombaba arug sa agin na adi, amo ana pinakaorog sa nga'min na kaiba sa kahadian nin Langit.
5 Ana siisay man na niako sa agin na arug nyadi dail sa sa'kun nagiako sa sa'kun. 6 Piro ana siisay man na magin sarawtan na magkasala ana manga saraday na agin na adi na nagitood sa sa'kun, maraay pang gu'ran sa liug nin gilingan na bato ag itikrag sa bitnga nya dagat.”
Manga Sarawtan nin Pagkakasala
(Marcos 9:42-48; Lukas 17:1-2)
7 “Malairak ana manga tao sa kina'ban na adi dail sa manga bagay na nagigin sarawtan nya sakandang pagkakasala. Kin sabagay, niabot man talaga ana manga adi, piro nakakairak ana taong magigin sarawtan nya pagkakasala nya sakanyang kapwa.”
8 “Kaya ngani, kin ana kamut o paa mo ana magin sarawtan nya saimong pagkakasala, utuwun mo adi ag iumut! Mas maraay pa na usad sana ana kamut o paa mo piro agko ika boway na uda kapondowan, kisa dowa ana kamut o paa mo piro iuumut man ika sa uda kapondowan na kalayo. 9 Ag kin ana mata mo ana nagigin sarawtan nya saimong pagkakasala, olwatun mo adi ag iumut! Mas maraay pang usad sana ana mata mo piro agko ika boway na uda kapondowan, kisa sa dowa ngani ana mata mo piro iuumut man ika sa kalayo nin impiyerno.”
Ana Nauudang Karniro
10 “Sigorowun ninyo na indi ninyo pagtoya'un ana dawa usad sa saday na agin na adi, dail tandaan ninyo: ana manga anghel na nibantay sa sakanda, pirming sa atobangan nya sa'kun na Ama sa langit. 11 Dail ta Ako na Agin nin Tao pominadidi sa kina'ban tanganing iligtas ana manga nuuda.
12 Ono sa pag-una ninyo ana gigibowun nya usad na taong agko sanggatos na karniro kin mauda ana usad? Buku daw na baba'yan niya yo nobentay nwebe dail aanapun yo usad na nauuda? 13 Sa kaostowan, kin makoko na niya yo nauudang karniro, dakuung kaogmaan ana sakanyang mamamatian kisa sa nobentay nwebe na di nauuda. 14 Arug man nyaan ana namamatian nya sainyong Ama na nasa langit. Indi niya muyang agko mauda maski usad sa saraday na agin na adi.”
Kin Magkasala ana Usad na Ipatngod
15 “Kin nakagibo nin kasa'lan saimo ana ipatngod mo, pontaan mo iya ag kaosipun na kamo sanang dowa. Sabiyun mo sa sakanya yo manungud sa ginibo niya. Kin magrungug iya sa saimo, magkakainintindiyan kamo otro ag maibabalik mo iya sa Dios. 16 Piro kin indi niya muyang magrungug sa saimo, mag-ariya ika nin usad o dowa pa na ipatngod sa pagtood tanganing ana nga'min na pagiosipan ninyo mapapatonayan nin dowa o tolong testigo,a basi sa Kasoratan. 17 Kin indi pa niya muyang magrungug sa sakanda, ipaisi adi sa simbaan, kin maski sa atobangan nya simbaan indi man dayaday iya magrungug, tratoon ninyo iyang usad na taong indi nakakabisto sa Dios o usad na parasingil nin bowis.”b
Ana Ipibawal ag Ipitogot
18 “Pisabi ko sainyo ana kaostowan, onoman na ipagbawal ninyo sa raga ipagbabawal man sa langit; ana onoman na itogot ninyo sa raga itotogot man sa langit.
19 Pisabi ko man sainyo na kin magkausad ana dowa sa sainyo didi sa raga na ipangadyi ana onoman na bagay, itatao aan nya sa'kun na Ama na nasa langit. 20 Dail ta kin sa'ri agko dowa o tolo katao na nagitipon dail sa sa'kun, kaiba nira ako.”
Ana Parabola manunungud sa Sorogoon na Indi Tataong Magpatawad
21 Nagrani si Pedro ki Jesus ag nag-onga, “Kagorangnan, pirang beses ko tabi kinakaipowan na patawadun ana sa'kun na ipatngod na pirming nagkakasa'la sa sa'kun? Anggan pitong beses daw tabi?”
22 Nagsimbag si Jesus, “Buku sanang pitong beses, kindi sitinta na otrowun nin pitong beses pa.” 23 Dail ta ana paghahadi nin Dios maiaarug sa estoriyang adi: Agko usad na hadi na nagpaba'no nyo sakanyang manga sorogoon tanganing singilun nyo sakandang manga otang. 24 Kaso po'nan na niya yo paniningil, dinara sakanya yo usad na sorogoon na agko otang sakanya nin milyonmilyon. 25 Dail indi iya makabayad, kaya nagsogo yo hadi na ipabakal adi bilang usad na oripun kaiba yo sakanyang pamilya ag yo nga'min na pagsorosadiri tanganing mabayadan yo sakanyang otang. 26 Nipakimairak na lominood yo sorogoon sa atobangan nyo hadi, “Ta'wan mo tabi ako nin panaon tanganing mabayadan ko yo nga'min na otang ko.” 27 Nairak yo hadi sa sakanya ag indi na iya pinabayad nyo otang niya ag pinasamput na.
28 Piro paglowas nyo sorogoon na adto, nasabat niya yo kapwa niya sorogoon na agko otang sakanya nin agbay na kantidad. Dinasmagan niya adi ag tini'nguk ag sinabiyan, “Bayadan mo na yo otang mo sa sa'kun!” 29 Lominood yo kapwa niya sorogoon ag nakimairak, “Ta'wan mo ako nin agbay na panaon tanganing mabayadan ko ika.” 30 Piro indi iya tominogot. Imbis, ipinakarsil pa niya yo kapwa niya sorogoon anggan sa makabayad adi. 31 Kaso makita adi nyo iba pang sorogoon, nagasa sira kaya nagponta sira sa hadi ag isinombong yo nga'min na nangyari. 32 Ipinaba'no nyo hadi yo sorogoon ag pinagta'manan, “Laraut mong sorogoon! Pinatawad ko ika nyo otang mo dail nakimairak ika sa sa'kun. 33 Bukung dapat nairak man ika sa pariyo mong sorogoon arug nyo pagkairak ko sa saimo.” 34 Sa kaga'san nyo hadi, ipinakarsil niya yo sorogoon anggan sa makabayad adi nyo nga'min na otang niya.
35 Ag sinabi ni Jesus sa sakanda, “Bagaan man ana gigibowun nya sa'kun na Ama na nasa langit kin indi kamo magpatawad nin bilog sa poso sa sainyong kapwa.”