22
Ana Parabola manunungud sa Kasal
1 Nagtoro otro si Jesus sa manga tao sa paagi nin manga parabola. Sominabi iya, 2 “Ana paghahadi nin Dios nakakaarug sa usad na hadi na nag-anda tanganing magpakaun sa kasal nyo sakanyang agin na lalaki. 3 Sinogo niya yo sakanyang manga sorogoon tanganing ba'nowun na yo manga inimbitaran, piro indi gosto nyo mga inimbitaran na magpunta. 4 Sinogo niya otro yo ibang sorogoon tanganing sabiyun sa manga imbitado, ‘Anda na ana nga'min; nabono na ana sa'kun na mga baka ag iba pang mga ayup na sa'kun na pinataba. Nakaanda na ana pagkaun kaya pomonta na kamo didi.’ 5 Piro pinasipara sana adi nyo nga'min. Yo usad nagponta adto sa sakanyang oma. Yo usad adto sa sakanyang negosyo. 6 Yo iba pinugul yo sorogoon nyo hadi, pinagulgan, kina ginuraan. 7 Dail nyadi nagasang maray yo hadi, sinogo niya yo manga soldados na gura'nun adtong manga nangguraan sa sakanyang manga sorogon, ag soloon yo sakandang siyodad. 8 Kina, ipinaba'no niya yo sakanyang manga sorogoon ag sinabiyan, ‘Anda na ana pagkaun, piro yo manga inimbitaran bukung angay. 9 Kaya pomaadto kamo sa manga dagan na matao, imbitaran ninyo ana nga'min na taong makita ninyo.’ 10 Nagponta man yo manga sorogoon adto sa manga mataong dagan, tinipon nira yo nga'min na taong nakita nira, ki maraay o maraut. Kaya napono nin tao yo logar kin sa'ri yo andaan.”
11 “Lominuug yo hadi tanganing ki'tun yo manga bisita. Agko iya naking usad na lalaki na indi nakasowut nin badong pangkinasalan. 12 Inonga adto nyo hadi, ‘Amigo, paono ika nakaluug didi na indi man ika nakasowut nin badong pangkinasalan?’ Indi nakapo'law yo lalaki. 13 Kaya sinabi nyo hadi adto sa sakanyang manga sorogoon, ‘Gu'ran ninyo ana sakanyang kamut ag paa, ag iumut sa lowas, sa madulum na lugar ag adto magiibiun iya ag magira'gutun ana sakanyang ngipun.’ ”
14 “Ta kadakul ana inimbitaran, piro agbay ana napipili.”
Pagbayad nin Bowis
(Marcos 12:13-17, Lukas 20:20-26)
15 Ominalin yo manga Pariseo ag pinag-osipan nira kin papaono masisiud si Jesus sa paagi nya sakanyang manga pisabi. 16 Kaya pinaponta nira ki Jesus yo sakandang manga disipolo kaiba yo nagkapirang taowan ni Herodes. Sabi nira, “Maestro, isi namun na buku ikang potnayun, ipitoro mo talaga kin ono a kamu'yan nin Dios. Indi ika nipalain nin tao, ag indi mo pipaalagaan kin ono ana katungran nira. 17 Kaya ono ana masasabi mo? Ono togot daw sa sa'tun na Kasogoan na magbayad kita nin bowis sa Emperador nya Roma o indi?”
18 Piro isi ni Jesus yo maraut nirang katoyowan, kaya sominabi iya, “Manga parasaginsagin kamo! Taynga ta pipatalokso ninyo ako? 19 Paki'tan ninyo sa'kun ana sintabo na pambayad nin bowis!”
Ipinakita man nira sakanya. 20 Inonga niya sira, “Kiisay ading lalawgun ag pangaran ana nakaokit didi?”
21 Sominimbag sira, “Sa Emperador nya Roma”
Sinabiyan sira ni Jesus, “Kin amo aan, itao ninyo ana para sa Emperador nya Roma ana para sa sakanya, ag sa Dios ana para sa Dios.”
22 Pakarungug nira nyadto napangalas sira. Kina, ominalin sira at bina'yan iya.
Ana manga Onga manunungud sa Pagkaboway Otro
(Marcos 12:18-27, Lukas 20:27-40)
23 Nyo aldaw man sanang adto, agko nagrani ki Jesus na manga Saduceo na manga nisabing uda pagkaboway otro. 24 Inonga nira si Jesus, “Maestro, sinabi ni Moises na kin ana lalaki magraan na uda agin sa nagin sugud niya, kinakaipowang pakasalan nya ipatngod niya yo nabalo tanganing magkaagin sira para sa nagraan niyang ipatngod. 25 Ngowan, agko pitong mag-iripatngod na lalaki na omininstar didi nyadto. Yo subang nagsugud piro nagraan na uda agin, kaya naobon yo balo na pinakasalan man nyo sominonod sakanya. 26 Nagraan man yo ikadowa, sonod yo ikatolo. Anggan sa kamawriyan nagraan yo nga'min na mag-iripatngod. 27 Ag nagaraan man yo babayi. 28 Sa aldaw na ana manga guraan bowayun otro, siisay adto sa pitong mag-iripatngod ana magigin sugud nyo babayi, ta nga'min sira nagin sugud niya?”
29 Sominimbag si Jesus, “Kasala ninyo, palibasa indi ninyo isi ana Kasoratan ag ana kapangyariyan nin Dios. 30 Ta sa aldaw na ana manga guraan bowayun otro, ana manga tao indi na nisugurun pa; ta magigin arug na sira nya manga angel sa langit. 31 Manunungud man sa pagkaboway otro nya manga guraan, indi ninyo nabasa sa Kasoratan ana sinabi sainyo nin Dios? Sinabi niya, 32 ‘Ako ana Dios ni Abraham, Dios ni Isaac ag Dios ni Jacob.’ Dios iya nin manga boway ag bukung nya mga guraan.” 33 Kaso mabaritaan adi nyo manga tao, nagkangaralas sira adto sa katoroan niya.
Ana Pinakamaalagang Kasogoan
(Marcos 12:28-34; Lukas 10:25-28)
34 Kaso marungug nyo manga Pariseo na napatoninung ni Jesus yo manga Saduceo dail sa manga sinabi ni Jesus, nagmeting sira otro ag nagrani sa sakanya. 35 Yo usad sakanda na paratoro nin Kasogoan, yo nag-onga ki Jesus tanganing testingun iya, 36 “Maestro, arin ana pinakaorog na togon sa Kasogoan?”
37 Sominimbag si Jesus, “ ‘Kamu'yan mo ana Kagorangnan mong Dios nin bilog mong poso, bilog kalag, ag bilog mong isip.’ 38 Amo adi ana pinakaorog na togon sa nga'min. 39 Ana ikadowang pinakaorog na togon arug man nyaan: ‘Kamu'yan mo ana saimong kapwa arug man nya pagkamuya mo sa saimong sadiri.’ 40 Ana intirong Kasogoan ni Moises ag manga katoroan nin manga propita nakabasi sa dowang togon na adi.”
Ana Onga manunungud ki Cristo
(Marcos 12:35-37; Lukas 20:41-44)
41 Miyentras na nakapalibot ki Jesus yo manga Pariseo, inonga sira ni Jesus, 42 “Ono ana pagkabisto ninyo manunungud sa Cristo? Kiisay na lai iya alin?”
“Alin tabi iya sa lai ni David.” simbag nira. 43 Sinabi ni Jesus sakanda, “Kin bagaan taynga ta bina'no iya ni David na Kagorangnan, kaso pango'naan adi nin Espirito Santo? Ta bagadi ana sabi ni David,
44 ‘Ana Kagorangnang Dios nagsabi sa sa'kun na Kagorangnan:
Omuga ika sa sa'kun na too,
anggan sa mapasoko ko saimo ana saimong manga kalaban.’