23
Patanid Tomang sa manga Paratoro nin Kasogoan ag sa manga Pariseo
1 Kina sinabi ni Jesus sa manga tao ag sa sakanyang manga disipolo, 2 “Ana manga paratoro nin Kasogoan ag manga Pariseo ana among agko kapangyariyan na magpaliwanag nya Kasogoan ni Moises. 3 Kaya kinakaipowan na gibowun ag sonodon ninyo ana nga'min nirang pisabi, piro indi ninyo pag-arugun kin ono ana sakandang pigibo, ta indi nira pigibo ana sakandang ipitoro. 4 Ipipasonod nira sainyo ana sa sakandang dipisil na manga kasogoan, piro sira mismo indi nisonod sa manga adi. 5 Ana nga'min nirang pigibo pakitang tao sana man. Pilakbangan nira ana mga kawong nakaguud sa sakandang manga angug ag takyag na nabubutangan nya mga bersikolo alin sa Kasoratan. Ag piabaan nira ana mga kalaykalaya nya sa kandang mga balabal. 6 Mailig sirang omuga sa mga u'gan na pag-importanting bisita sa mga andaan ag sa manga baguy sambaan. 7 Muyang nirang pagta'wan nin galang sa manga plasa ag banowun na manga ‘Maestro.’ 8 Piro indi kamo magpaba'nong ‘Maestro,’ ta usad sana ana sainyong Maestro ag kamo nga'min mag-iripatngod. 9 Indi man ninyo pagba'nowun na, ‘Ama’ ana siisay man didi sa raga, ta usad sana ana sainyong Ama, ana Amang nasa langit. 10 Indi man kamo magpaba'no na ‘Among,’ bdail ta usad sana a sainyong Amo, iya si Cristo. 11 Ana pinakaorog sainyo amo adtong niserbi. 12 Ta ana nipataas nya sakanyang sadiri, ipibaba nin Dios, ag ana nipababa amo ana pita'wan onra nin Dios.”
Tinuyaw ni Jesus yo Manga Parasaginsagin
13 “Irak man kamong manga paratoro nin Kasogoan ag manga Pariseo! Manga parasaginsagin kamo! Piulangan ninyo ana mga tao na magpasakup sa paghahadi nin Dios. Kamo mismo, indi muyang magpasakup ag pipugulan pa ninyo ana muyang magpasakop! 14 [Irak man sainyo, manga paratoro nin Kasogoan ag manga Pariseo! Manga parasaginsagin kamo! Piobos ninyo ana ikaboboway nya manga balo, ag saginsagin na nipangadyi kamo nin laaaba. Dail nyaan mas orog na mabugat ana padosa sainyo!]”
15 “Irak man sainyo, manga paratoro nin Kasogoan ag manga Pariseo! Manga parasaginsagin kamo! Pisakuy ninyo ana dagat ag nibaklay nin kaarayo, tangani sanang makakombertir nin usad na tao, ag kin nakombirtir na ninyo iya, pigibo ninyo iyang mas malala pa sa inyo na kaipowang padusaan sa impiyerno.”
16 “Irak man kamo, mga botang tagapangona! Ipitoro ninyo na kin ana tao manoga na gamit ana Templo bilang saksi, buku iyang obligadong otobon adi, piro kin manoga iya na gamit ana bolawan sa Templo bilang saksi kinakaipowan niya ading otobon. 17 Manga bota! Manga patal! Arin ana mas maalaga, ana bolawan o ana templo na nipabanal nya bolawan? 18 Ipitoro man ninyo na kin ana tao manoga na pigamit ana altar bilang saksi, indi niya kinakaipowang gibowun adi. Piro kin manoga iya na gamit ana dolot na nasa altar bilang saksi, kinakaipowan niya ading gibowun. 19 Talagang manga bota kamo! Arin mas maalaga, ana dolot o ana altar na nipabanal nya dolot? 20 Dail ana nipanoga sa pangaran nya altar, nipanoga buku sana sa pangaran nya altar kindi sa nga'min na nasa altar. 21 Ana nipanoga sa pangaran nin templo, nipanoga buku sa pangaran nya templo kindi sa pangaran man nya Dios na niistar diyan. 22 Arug man nyaan, ana nipanoga na gamit ana langit bilang saksi, nipanoga man sa trono nin Dios ag sa Dios na nakauga adto.”
23 “Irak man sainyong manga paratoro nin Kasogoan ag manga Pariseo! Manga parasaginsagin kamo! Nitao kamo sa Dios nin manga ikasampolo parti nya pananum arug nya panrekadong anis, paminta, ag komino. Piro indi ninyo pisonod ana mas maalagang kasogoan manunungud sa pagigin makaostisiya, pagkamaiirakun, ag pagigin osto. Kinakaipowan talagang magtao kamo nya sa inyong manga ikasampolo, piro indi man ninyo paglingawan na gibowun ana manga mas maalagang kasogoan. 24 Manga nipango'nang bota! Pisara ninyo ana manga saraday na nuknuk sa sainyong inomon, piro pitulun ninyo ana dakuung kamilyo!”
25 “Irak man sainyong manga paratoro nin Kasogoan ag manga Pariseo! Manga parasaginsagin! Piogasan ninyo a lowas nya sainyong tasa ag pinggan, piro sa luug ninyo pono nya sainyong kapasluan ag dinayaan. 26 Pariseong bota! Ogasan na mo'na ninyo ana luug nya tasa ag pinggan, tanganing magin malinig man ana sa lowas nyaan!”
27 “Irak man sainyong manga paratoro nin Kasogoan ag manga Pariseo! Manga parasaginsagin kamo! Kapariyo kamo nya pinaoyay na manga pantyong na malinig ki'tun sa lowas, piro sa luug pono nin manlainlain na maating bagay. 28 Arug kamo nyaan, sa lowas malinig pagki'tun, piro sa luug pono nin pagsaginsagin ag manga kara'tan.”
Sinabi ni Jesus ana Padosa Sakanda
29 “Irak man sainyong manga paratoro nin Kasogoan ag manga Pariseo! Manga parasaginsagin kamo! Pipagibowan ninyo nin lubungan ana manga propeta, ag pipagayon ana manga pantyon nyo manga taong matanos. 30 Ag pisabi ninyo, ‘Na kin kami boway na nyo panahon nyo sa'mun na manga ginikanan, indi basang kami makikiiba sa pagguraan nyo manga propita.’ 31 Sa pisabi ninyong aan, piako ninyo na gikan kamo sa lai nyo manga nagpaguraan sa manga propita! 32 Sige, taposon ninyo ana pino'nan niya sainyong manga ginikanan! 33 Manga agas kamo! Lai kamo nin manga rimoranun! Indi ninyo madudulagan ana kapadosaan sa impiyerno! 34 Kaya magrungug kamo! Magipadaraun ako nin manga propita, manga taong madonong ag manga paratoro nin Kasogoan. Ana iba sa sakanda gugura'nun ninyo ana iba ipapako sa kros, ana iba aampakun sa manga baguy sambaan, ag pepersigirun ninyo sira dawa sari sira magponta. 35 Dail nyadi kamo ana maninimbagan dail sa pagguraan adto sa manga taong uda kasa'lan, alin ki Abel anggan ki Zacarias na agin ni Barakias, na ginuraan ninyo sa pagbitngaan nyo templo ag altar. 36 Sa Kaostowan pisabi ko sainyo, kamong manga naboboway sa panaong adi ana maninimbag sa nga'min na manga kasa'lang adi.”
Ana Pagkamuya ni Jesus sa Jerusalem
37 “O kamong manga tagaJerusalem! Pibato ninyo ag piguraan ana propita na sinogo nin Dios sainyo! Pirang beses ko nang muyang tiponon at asikasowun ana sainyong manga agin, arug nya paglukub nya isiwan sa sakanyang isiw ngunit pero di ninyo muya. 38 Kaya baala na kamo sa manga sadiri ninyo. 39 Dail ta pisabi ko sainyo, indi na ninyo ako makikita anggang omabot ana oras na sabiyun ninyo, ‘Pagbendisiyonan ana niabot sa pangaran nin Kagorangnan.’ ”