24
Sinabi ni Jesus ana manunungud sa Pagkarumpag nya Templo
(Marcos 13:1-2; Lukas 21:5-6)
1 Lominowas si Jesus sa templo ag kaso paalin na, rinaniyan iya nyo sakanyang manga disipolo ag itinoro sakanya yo manga bilding nin templo. 2 Pero sinabi ni Jesus sakanda, “Nakikita ninyo ana nga'min na aan? Sa kaostowan pisabi ko sainyo, uda diyan matutuda ni usad na bato sa sapuw nin usad pang bato. Ana nga'min mararagba.”
Manga Kasakitan ag Kariribokan
(Marcos 13:3-13; Lukas 21:7-19)
3 Miyentras na nakauga si Jesus sa usad na logar adto sa Bokid nin Oliba, rominani ag pailum iyang inonga nyo sakanyang manga disipolo, “Kinaono tabi mangyayari yo manga bagay na sinabi mo? Ono tabi ana magigin sinyales nya pagbwelta mo otro ag nya kapondowan nya kina'ban?”+\fr *3 \fq Sa Griego: kataposan nin panaon.
4 Sominimbag si Jesus, “Maglikay kamo na indi kamo madaya nin siisay man. 5 Ta kadakul ana bigla na sanang nilutawun didi na gagamitun ana pangaran ko at magisabiyun, ‘Ako ana Missias!’ Ag dakul sirang madadaya. 6 Makakarungug kamo nin manga ralabanan, ag manga barita manunungud sa giyera. Piro indi kamo matakot, ta kinakaipowan na mangyari ana manga bagay na adi, piro buku pa aan ana kapondowan. 7 Dail ta ana usad na nasyon gigiyeraun sa usad pang nasyon: ana usad na kahadian gigiyeraun ana usad pang kahadian. Magkakaagko man nin pagkaponaw ag manga paglinog sa'ri mang logar. 8 Ana nga'min na adi kapino'nan pa sana nya manga kasakitan.”
9 “Sa panaon na aan, rarakupun ag pipersigirun kamo, padidipisilan ag gugura'nun dail sa pagsonod ninyo sa'kun. 10 Kadakul ana nitalikodon sa sakandang pagtood ag magkakagina'san na maraay ta pagitraydoron nya lambang usad ana sakanyang kapwa. 11 Kadakul na magisaginsaginun na propeta ag dakul ana madadaya nira. 12 Grabi ana magigin kara'tan, kaya ana pagkamuya nin kadakulan niliputun. 13 Piro ana magpadagos na osto anggan sa kapondowan amo ana maliligtas. 14 Ag ana Maraay na Baritang manunungud sa paghahadi nin Dios padagos na ipapangadal tanganing maisyan nya nga'min na nasyon. Kina niaboton na ana kapondowan.”
Ana Laraut na Bagay
(Marcos 13:14-23; Lukas 21:20-24)
15 “Agko sinabi si Porpita Daniel manungund sa nakakaongis na bagay na magigin dailan nya pagbaya sa templo. (Kamong manga nibasa, intindiyun ninyo ading maraay!) Kina nakita na ninyong nakatindug adi sa templo a 16 ana manga nasa Judea kinakaipowan nang domulag pontang kabokidan. 17 Ana manga nasa atup indi na kinakaipowang bomaba pa tanganing ko'non ana sakanyang manga gamit. 18 Ana nasa oma indi na kinakaipowan somamput pa tanganing ko'non yo sakanyang balabal. 19 Irak man nya manga mabrus ag nipasoso sa aldaw na aan dail madidipisilan sirang domulag! 20 Mangadyi kamo sa Dios na ana sainyong pagdulag indi logod matungtung sa tigliputan o Aldaw nin Pagpadiskanso. 21 Ta ana kasakitan sa panaon na aan orog pang nakakatakot kaysa arin man na nangyari poon kaso lalangun ana kina'ban anggan ngowan. Uda na makakaarug pa nyaan maski kinaono pa man. 22 Kin indi paali'potan nin Dios ana aldaw na aan, uda makakaligtas, piro paaalipoton aan para sa manga pinili niya.”
23 “Kaya kin agko magsabi sainyo, ‘Ki'ta ninyo, moadi ana Cristo!’ o ‘Adto iya!’ Indi ninyo aan pagtooron. 24 Ta niaboton ana manga nisaginsagin na Cristo ag manga bukung ostong propita. Nigibuwun sira nin darakuung tanda ag manga ngangalasan tanganing mapaniwala nira ana manga tao, kin mapipwede dawa yo manga pinili na nin Dios. 25 Magrungug kamo! Pita'wan ko na kamo nin patanid bago pa adi mangyari.”
26 “Kaya kin agko magsabi sainyo, ‘Kita ninyo adto ana Cristo sa disiyerto!’ indi kamo magpunta adto. Ag kin agko sainyo magsabing, ‘Monadi iya sa luug!’ indi kamo magtood. 27 Ta ana Agin nin Tao nibalikun arug sa kilat na niliwanag alin sa subangan anggan sa sulnupan.
28 Kin sa'ri agko bangkay, diyan man nitipon ana manga buwitre.”
Ana Pag-abot nya Agin nin Tao
(Marcos 13:24-27; Lukas 21:25-28)
29 “Pakatapos nya grabing kasakitan sa panaon na aan, nidulumun ana aldaw, indi na niliwanagun ana bolan, matitikrag ana manga bitoon, ag mayuyugyug ana planita sa kaiwasan nya kalangitan. 30 Kina ana tanda nya Agin nin Tao nitongaun sa kalangitan. Magiibiun ana nga'min na tao, ag makikita nirang niabot ana Agin nin Tao na nasa manga panganoron, agko dakuung kapangyariyan ag kamorawayan. 31 Sa makusug na tonog nin trompita, sosogoon niya ana sakanyang manga angel tanganing tiponon yo sakanyang manga pinili alin sa nga'min na logar nin karagaan, poon sa usad na poro nya kina'ban anggan sa usad na poro.”
Kaadalan Alin sa Poon ni Higiera
(Marcos 13:28-31; Lukas 21:29-33)
32 “Makatuud kamo nin leksyon alin sa kawoy nin igos. Kin ana sanga nyadi nidawun na, isi ninyo na arani na ana tag-init. 33 Arug man nyaan, kin makita ninyo na nangyayari na ana nga'min na ading pisabi ko sainyo, maiisiyan ninyo na madali na talaga akong omabot. 34 Sa kaostowan pisabi ko sainyo, mangyayari ana nga'min na adi, bago magraan ana manga taong naboboway sa panaon na adi. 35 Mauuda ana langit ag raga, piro ana sa'kun na sasabiyun indi basang mauuda kindi sigoradong mangyari.”
Uda Taong Nakakaisi nya Aldaw ag Oras
(Marcos 13:32-37, Lukas 17:26-30, 34-36)
36 “Piro uda nakakaisi kin kinaono niaboton ana aldaw ag oras nya sa'kun na pagbalik. Maski ana manga angel sa langit o magin ana Agin nin Dios, kindi ana Ama sana. 37 Kin ono yo nangyari kaso panaon ni Noe amo man ana gigibowun nya manga tao sa aldaw na ana Agin nin Tao magbalik. 38 Bago bominaa, sige sana yo karaunan, irinoman, ag surugudan nyo manga tao, anggan sa aldaw na lominuug si Noe sa arka. 39 Indi nira isi yo manga mangyayariyun anggan na ominabot yo baa ag inanod sira. Arug man nyaan a mangyayari sa pag-abot nya Agin nin Tao. 40 Sa oras na aan agko dowang lalaking nitrabao sa oma, ana usad koko'non, ana usad maoobon. 41 Agko dowang babayi a nigiling sa gilingan, a usad koko'non, ana usad ioobon. 42 Kaya magbantay kamo, dail indi ninyo isi kin onong oras niaboton ana sainyong Kagorangnan. 43 Piro intindiyun ninyo adi! Kin isi nya kadsadiri nya baguy kin onong oras nin ga'bi niaboton ana maonas, magbantay kinta'na iya. Indi basang niya totogotan a maonas na makapanik sa sakanyang baguy. 44 Kaya kinakaipowan pirmi man kamong anda, ta ana Agin nin Tao niaboton sa oras na indi ninyo piuna.”
Ana Matanos ag Bukung Matanos na Sorogoon
45 “Bukung ana maimbod ag madonong na sorogoon ana pigibo nya sakanyang amo na mamaala sa sakanyang kapwa sorogoon? Iya ana nitao sakanda nin pagkaun sa tamang oras. 46 Pinaorog ana bagaan na mamandaan na kin sa pagbwelta nya sakanyang among, maaabotan iyang nigibo nyo trabaong itinao sakanya. 47 Sa kaostowan pisabi ko sainyo, ana sorogoon na aan gigibowun nya sakanyang amo na tagapamaala nya ngamin na pagsorosadiri nyadi. 48 Piro kin ana sorogoon maraut sasabiyun niya sakanyang sadiri, ‘uguy pa bago bumalik ana sa'kun na amo’ . 49 Ag miyentras na uda pa adi, pagmamalopitan niya yo kapwa niya sorogoon ag makipag-inoman sa manga paraborat. 50 Pakatapos, niaboton ana sakanyang among sa aldaw ag oras na indi niya piuna, 51 ag iya papadosaaan nin grabi. Iiiba iya sa manga taong parasaginsagin adto sa lugar kin sa'ri niibiun sira ag magiragutun ana sakandang ngipun.”