25
Ana Parabola nin Sampolong Daraga
1 “Sa aldaw na aan ana paghahadi nin Dios maipapariyo sa sampolong daraga na naglowas na agko darang solo tanganing sabatun yo nobyo. 2 Yo lima sakanda patal, yo lima madonong. 3 Yo manga patal dominara nin solo piro indi dominara nin riserbang lana, 4 miyentras na yo manga madonong dominara nin riserbang lana para sa sakandang solo. 5 Nauguyan yo pag-abot nyo nobiyo, kaya nagroka yo manga daraga kina nagkatorog.
6 Lawud na nin ga'bi kaso agko ominuyaw, ‘Moadi na yo nobiyo! Mari kamo tanganing sabatun iya!’ 7 Nagmata yo sampolong daraga ag inanda yo sakandang manga ilawan. 8 Yo limang patal sominabi adto sa limang madonong, ‘Tawi man ninyo kami nya sainyong lana ta napaparung na ana sa'mun na solo.’ 9 Piro sominimbag yo limang madonong, ‘Indi pwede ta tibaad magkolang adi para sa'tun nga'min, kaya maraay pa bomakal kamo nin para sainyo adto sa tindaan.’ 10 Myientras na nibakal yo mga patal nin lana, ominabot yo nobiyo. Yo limang andang manga daraga ominiba sa nobiyo adto sa andaan, kina sinaradowan yo pintoan.”
11 “Indi nag-uguy ominabot na yo manga patal na daraga. Bomina'no sira, ‘Kagorangnan, Kagorangnan! Boksan mo man tabi ana pintoan para sa'mun!’ 12 Piro sominimbag iya, ‘Sa kaostowan pisabi ko sainyo, indi ko kamo nabibisto!’ ”
13 At sinabi pa ni Jesus, “Kaya mag-anda kamo, ta indi ninyo isi a aldaw o oras.”
Ana Parabola nin Tolong Sorogoon
14 Ag sinabi pa ni Jesus, “Ana kahadian nin langit nakakaparyo sa usad na lalaki na nipontaun sa arayong logar. Bina'no niya yo manga sorogoon ag ipinamaala niya sakanda yo manga sadiri niya. 15 Yo kada usad tina'wan niya nin kapital basi sa kanyakanyang kakayaan na magnegosyo. Yo usad tina'wan niya nin singko mil pisos. Yo usad tina'wan niya nin dos mil pisos, ag yo usad sangribong pisos. Kina ominalin iya. 16 Yo sorogoon na ominako nin singko mil pisos nagnegosyo tolos, ag nakadelinsya iya nin singko mil pisos. 17 Yo ominako nin dos mil arug man nyadto yo ginibo, ag nakadelinsiya man nin dos mil pisos. 18 Piro yo ominako nin sangribong pisos, nagkali sa raga kina itinalbung yo sintabo nyo sakanyang kagorangnan.
19 Pakaliis nin uguy na panaon, bominalik yo sakandang kagorangnan. Nakipagkwentaan iya sa sakanyang manga sorogoon adto sa ipinagkatiwala niyang sintabo sakanda. 20 Rominani yo sorogoon na tina'wan niya nin singko mil pisos, dara niya pati yo na ganansiyang singko mil pisos. Sinabi iya ‘Kagorangnan, tinawan mo ako nin singko mil pisos, monadi tabi yo singko mil ag ganansiyang singko mil man.’ 21 Sinabi nyo kagorangnan, ‘Maraay yo ginibo mo, usad ikang maraay ag maimbod na sorogoon! Nagin maimbod ika sa agbay na ipinagkatiwala saimo, gigibowun ko ikang parapamaala nin mas dakuu pang alaga! Mari ag makiiba ika sa sa'kun na kaogmaan!’ ” 22 “Rominani man yo sorogoon na tina'wan nin dos mil pisos, ag sominabi, ‘Kagorangnan tina'wan mo ako nin dos mil pisos, monadi yo dos mil kaiba yo ganansya, dos mil pisos man!’ 23 Sinabi nyo kagorangnan, ‘Maraay yo ginibo mo! Usad ikang maraay ag maimbod na sorogoon! Dail nagin maimbod ika agbay na ipinagkatiwala saimo, gigibowun ko ikang parapamaala nin mas dakuu pang alaga, kaya mari ag makiusad ika sa sa'kun na kaogmaan!’ 24 Kina rominani man yo sorogoon na tinawan nin sangribong pisos ag sominabi sa sakanyang amo, ‘Kagorangnan, isi ko na usad ikang malopit na tao ag uda pagkairak. Pigosi mo ana indi mo man itinanum, ag pikoko mo ana pigpagalan nin iba. 25 Natakot ako kaya itinalbung ko sa raga yo sintabo mo. Monadi tabi yo sangribo na itinao mo sa'kun.’ 26 Gina'san iya nyo sakanyang kagorangnan, ‘Maraut ag ogakun na sorogoon! Isi mo palan na pigosi ko ana indi ko itinanum. 27 Kinta'na, idiniposito mo man basang sa bangko yo sintabo ko, tanganing sa pagsamput ko makokoko ana sa'kun na sintabo kaiban yo ganansiya.’ 28 Kina, sinabi niya adto sa sakanya manga sorogoon, ‘Ko'non ninyo sa taong adi ana sintabo ag itao adto sa agko dyis mil pisos. 29 Ta ana agko na, tata'wan pa nin dakul ag magkakaako nin kasaganaan; piro ana taong udang uda na, dawa ana kaagbay na natutuda sakanya, koko'non pa. 30 Ag ana taong adi na uda pakinabang, darahun ninyo ag iumut sa kaduluman sa lowas, adto niibiun iya ag magiragutun ana sakanyang ngipun.’ ”
Ana Oltimong Pag-osgar
31 Nagpadagos si Jesus sa pagsabi, “Ako na Agin nin Tao, sa oras na omabot ako bilang hadi, kaiba ana nga'min na anghel, niugun ako sa sa'kun na mamorawayun na trono. 32 Ana nga'min na tao sa kina'ban titiponon ko sa sa'kun na atobangan. Babangaun ko sira sa dowang gropo, arug nya usad na pastor na ipisoway niya ana manga karniro sa manga kanding. 33 Titiponon niya sa sakanyang too ana nga'min na manga karniro, ag sa wala niya yo manga kanding. 34 Pakatapos sasabiyan nya hadi ana manga sa too niya, ‘Mari kamo, manga pinagbendisyonan nya sa'kun na Ama! Lomuug kamo ag omistar sa kahadian na inianda sainyo poon pa kaso lalangun ana kina'ban. 35 Ta kaso ako naponaw pinakaun ninyo, napaa ag sainyong pinainom. Usad akong dayowan piro pinadagos ninyo. 36 Uda ako maiso'wut, tina'wan ninyo ako nin bado', nagkailang, inasikaso ako ninyo. Nakarsel ako, binisita ninyo.’ 37 Sominimbag yo manga nasa too, ‘Kagorangnan, kasoarin tabi ika namun nakitang ponaw, ag pinakaun, o napaa ag pinainom? 38 Kasoarin tabi ika nagin dayowan, piro sa'mun na pinadagos, o kaya okas na tinawan nin bado? 39 Ag kasoarin ika namun nakitang agko ilang o nasa karselan ag sa'mun na binisita?’ 40 Ag sinimbag sira nya Hadi, ‘Sa kaostowan pisabi ko sainyo, kaso ginibo ninyo adi sa pinakasaday sa manga ipatngod kong adi, ipinasabuut ko adtong sa'kun ninyo ginibo.’
41 Ag sasabiyun ko man sa manga taong nasa wala ko, ‘Romayo kamo sa'kun, manga minaldisyon nin Dios! Pomaadto kamo sa uda kasagkuran na kalayo na inianda para sa Diyablo ag sa sakanyang manga angel! 42 Ta naponaw ako piro indi ninyo ako pinakaun. Napaa ako ag indi ninyo ako pinainom. 43 Dayowan ako, indi ninyo ako pinadagos. Okas ako piro indi ninyo ako tina'wan nin bado. Nagkailang ag nakarsel piro indi ninyo ako binisita.’ 44 Ag nisimbagun man sira sakanya, ‘Kagorangnan, kasoarin tabi ika namun nakitang naponaw o napaa, dayowan o okas, nag-ilang o nakarsel piro indi namun tinabangan?’ 45 At sisimbagun man sira bilang Hadi, ‘Pisabi ko sainyo, kaso pagmaimutan ninyo nin tabang ana manga pinakaamak kong ipatngod, ako ana pinagmaimutan ninyo.’ 46 Kaya iuumut mo sira sa uda kapondowan na padosa, piro ana manga matanos man tata'wan ko nin boway na uda kapondowan.”