26
Planong Gura'nun si Jesus
(Marcos 14:1-2; Lukas 22:1-2; Juan 11:45-53)
1 Pakasabi ni Jesus nyo nga'min na adto, sinabiyan niya yo sakanyang manga disipolo, 2 “Isi ninyo na dowang aldaw na sana niaboton na ana Piyesta nin Pagliis nin Anghel,a ag akong Agin nin Tao itatao sa poder nya manga nikontra sa'kun tanganing ipako sa kros.”
3 Nyo manga oras na adto, nitiripon yo manga pamayo nin manga padi ag manga pamayo nin manga Judio adto sa palasyo ni Caifas, na amo yo pinakapamayong padi. 4 Nagplano sira kin papaono rarakupun si Jesus na indi naiisiyan nin manga tao, pakatapos, gugura'nun nira. 5 “Indi ta adi paggibowun sa aldaw nin kapiyestaan ta tibaad magkaribok ana manga tao.” yo sabi nira.
Bino'boan si Jesus nin Paomot
6 Kaso si Jesus na sa Betania, adto sa baguy nin Simon na pudpurun, 7 rominani sakanya yo usad na babayi, na agko darang usad na lulu'gan na agko luug nin kamamaalun na paomot. Ibino'bo niya adto sa payo ni Jesus miyentras na nikaun adi. 8 Pakakita nyadto nyo sakanyang manga disipolo, nagasa sira ag nagsabi, “Ay! Ono ta pisayang ana paomot na aan? 9 Pwedi kinta'nang ipabakal aan nin dakuung kantidad tanganing ikinatabang sa manga pobre!”
10 Isi ni Jesus yo sakandang pinagisabi kaya sinabiyan niya sira, “Ono ta pipakilabutan ninyo ading babaying adi? Usad na maoyay na bagay ana ginibo niya sa'kun. 11 Pirmi ninyong kaiba ana manga pobre, piro ako indi ninyo pirming makakaiba. 12 Ana ginibo niyang pagbobo nya paomot sa lawas ko usad na pag-anda para sa paglubung sa'kun. 13 Sa kaostowan pisabi ko sainyo, sa'ri man sa intirong kina'ban ipangadal ana Maraay na Barita ana ginibo niyang adi ipapamarita man sa pagrumrum sakanya.”
Pinagtraydoran ni Judas si Jesus
(Marcos 14:10-11; Lukas 22:3-6)
14 Si Judas Iscariote, usad sa dosing disipolo nagponta sa manga namamayong manga padi, 15 ag sominabi, “Ono tabi ana itatao ninyo sa'kun kin tabangan ko kamong marakup si Jesus?” Nyadto man sana binilangan iya nin traynta pidasong sintabong plata. 16 Poon nyadto pirmi nang nianap si Judas nin oportonidad na iparakup si Jesus.
Nagkaun si Jesus nin Oltimong Pangga'biyan Kaiba yo Sakanyang manga Desipolo
(Marcos 14:21-22; Lukas 22:7-14, 21-23; Juan 13:21-30)
17 Kaso o'nang aldaw nyo Piyesta nin Tinapay na Uda Lebadora, rominani yo manga disipolo ki Jesus ag nag-onga, “Sari mo tabi muyang ianda namun ana panggabiyan para sa Paskowa?”
18 Sominimbag iya, “Pomaadto kamo sa siyodad nin Jerusalem, adto sa taong sinabi ko sainyo, ag sabiyun ninyo sakanya, ‘Ipipasabi nya Maestro na ominabot na ana panaon na gugura'nun iya, ag muya niyang ipagselibrar ana piyesta nin Paskowa sa saimong baguy, kaiba ana sakanyang manga disipolo.’ ”
19 Sinonod nyo manga disipolo yo kasogoan ni Jesus, ag inianda nira yo Pangga'biyan para sa piyesta.
20 Nyo ga'bi na, nagkaun si Jesus kaiba yo dosi ng disipolo. 21 Miyentras na nikaun sira, sominabi si Jesus, “Sasabiyun ko sainyo, ana usad nitraydoron sa'kun.”
22 Kaso marungug adto nyo manga disipolo, namundu sirang maray, kaya usad-usad sirang nag-onga, “Kagorangnan, ako tabi adto?” 23 Sominimbag si Jesus, “Ana kasabay kong magdotdot nya sakanyang tinapay sa mangko, amo ana magitraydoron sa'kun. 24 Ako na Agin nin Tao, gugura'nun basi sa pisabi sa Kasoratan, piro irak nya taong magitraydoron sa'kun! Maraay pang indi na iya ipinangagin!” 25 Si Judas na magitraydoron sakanya ominonga man, “Maestro, ono ako tabi adto?”
Sominimbag si Jesus, “Ika na ana nagsabi.”
Ana Banal na Panggabiyan
(Marcos 14:22-26; Lukas 22:14-20, 1Corinto 11:23-25)
26 Miyentras na nikaun sira, kominoko si Jesus nin tinapay, ag kaso makapagpasalamat sa Dios, pinagbangabanga ag itinao adi sa sakanyang manga disipolo. “Ko'non ninyo adi ag ka'nun; amo adi ana sa'kun na lawas.” yo sabi niya. 27 Kina nagkoko iya nin kopa, nagpasalamat sa Dios ag itinao sakanda na yo sabi, “Kada usad sainyo ominom nyadi, 28 dail amo adi ana sa'kun na rogo na niboloson para sa kapatawaran nin manga kasa'lan nya dakul na tao. Amo adi ana nipatonay na agko na ba'gong kasondoan ana Dios sa manga tao. 29 Pisabi ko sainyo na poon ngowan indi na ako niinomon nya taguk nin obas anggan sa aldaw nya paghahadi nya sa'kun na Ama, ag sa aldaw na aan, niinomon ako nin ba'gong inomon na kaiba kamo.” 30 Pakakanta nira nin usad na kanta, pominonta sira sa Bokid nin manga Oliba.
Sinabi ni Jesus ana Pagdiyar ni Pedro
(Marcos 14:27-31; Lukas 22:31-34; Juann 13:36-38)
31 Sinabi ni Jesus sakanda, “Ngowan na ga'bi, nga'min kamo, baba'yan ninyo ako, ta nasosorat, ‘Gugura'nun ko ana pastor, ag magkakawararakwarak ana manga karniro. ’ 32 Piro kin ako maboway na otro, mamomo'na ako sainyo sa Galilea.” 33 Nagsimbag si Pedro, “Maski ana nga'min ba'yan ika, piro ako indi ko basang ika baba'yan.” 34 Sinimbag iya ni Jesus, “Sa kaostowan pisabi ko saimo, ngowan mismong ga'bi, bago tomora'gok ana manok, tolong beses ikang magidiyarun na bistado mo ako.” 35 Sominimbag si Pedro, “Indi ko basang ika didiyaran, maski ako magraan na kaiba mo!”
Arug man nyadto yo sabi nyo ibang disipolo.
Nangadyi si Jesus adto sa Getsemani
(Marcos 14:32-42; Lukas 22:39-46)
36 Pominonta si Jesus na kaiba yo sakanyang manga disipolo sa logar na piba'nong Getsemani. Sinabiyan niya sira, “Didi sana kamo, ta nipangadyiun ako adto sa moromo'naan.” 37 Iniba niya si Pedro ag yo dowang agin ni Zebedeo, ag nakamati iya nin grabing kamunduan ag kaporisawan. 38 Sinabiyan niya sira, “Grabi ana sa'kun na kamunduan na baga ikagraan ko! Didi sana kamo ag magmata sa kaiba ko.”
39 Nagrayo iya nin agbay, naglood sa raga ag nagpamibi, “Ama ko, kin mapipwedi sana paliisun mo sa'kun ana mga kadipisilan na niaboton.b Piro bukung ana kamu'yan ko kindi ana kamu'yan mo ana masonod.”
40 Binalikan niya yo tolong disipolo ag nakita niya ana manga adi na manga torog. Sinabiyan niya si Pedro, “Ono indi kamo mapirming gisung nin usad na oras na kaiba ako? 41 Magmata kamo ag mangadyi tanganing indi kamo madaug nin sogot. Sa kabu'tan kinata'na ana somonod piro di magibo ta maloya ana lawas.”
42 Sa ikadowang beses rominayo iya otro, ag nangadyi, “Ama ko, kin di pweding indi ko inomon ana kopa nin pagsakit, ana kabu'tan mo amo ana mangyari.” 43 Binalikan niya otro yo manga disipolo piro naabotan niya sirang torog na naman, ta niroka na sirang maray.
44 Kaya bina'yan niya sira, ag nagpangadyi iya otro nin kapariyo nyo namo'na niyang pangadyi. 45 Kina binalikan niya yo manga disipolo ag sinabiyan, “Torog pa dayaday kamo ag nipaingalo? Ki'ta ninyo, ana oras ominabot na ag ana Agin nin Tao itatao sa kamut nin manga parakasala. 46 Bomowat na kamo, mosna kita! Monadi na yo nitraydoron sa'kun!”
Rinakup si Jesus
(Marcos 13:43-50; Lukas 22:47-53; Juan 18:3-12)
47 Nisabi pa si Jesus kaso ominabot si Judas, usad sa dosing disipolo. Kadakul na tao yo sakanyang kaiba na armado nin espada ag manga pamuspus. Sinogo sira nyo manga pamayo nin kapadian ag nyo manga namamayo nin manga Judio. 48 Tina'wan sira ni Judas nin usad na tanda, “Ana arangun ko, amo aan. Rakupun ninyo iya!”
49 Kaya rinaniyan tolos ni Judas si Jesus ag sinabiyan, “Maray na ga'bi Maestro!” Kina inarang niya adi.
50 Sinabi si Jesus, “Amigo, gibowun mo na ana muya mong gibowun.”
Rinaniyan si Jesus nyo manga kaiba ni Judas ag rinakup iya. 51 Usad sa disipolo ni Jesus yo nagbonot nyo sakanyang espada, ag tinigbas yo oripun nyo pinakapamoon na padi ag natangkas yo usad na talinga nyadi. 52 Piro sinabiyan adi ni Jesus, “Isa'rong mo ana saimong espada sa sarongan, dail ana nigamit nin espada, sa espada man maguguraan. 53 Indi mo isi na pwede akong omayat nin tabang sa sa'kun na Ama, ag padadaraan niya tolos ako nin dosing batalyon nin manga angel?c 54 Piro kin gibowun ko aan, papaono magigibo yo sinabi nya Kasoratan na nisabing amo adi ana kinakaipowan na mangyari?”
55 Pakatapos sinabi ni Jesus sa manga tao, “Kinakaipowan pa daw na pomadidi kamong agko manga darang espada ag pamuspus na baga ako usad na bandido? Oroaldaw nasa templo ako sa pagtoro, piro di ninyo ako rinakup. 56 Piro ana nga'min na adi nangyari tanganing magibo yo sorat nyo manga propita.”
Kina naobon iya adtong solosolo ta nagdurulag yo nga'min niyang manga disipolo.
Si Jesus sa Atobangan nin Konseyo
(Marcos 14:53-63; Lukas 22:54-55. 63-1; Juan 18:13-14, 19-24)
57 Dinara si Jesus nyo manga rominakup sakanya adto sa baguy ni Caifas, na among pinakapamayong padi. Nitiripon adto yo manga paratoro nin Kasogoan ag manga pamayo nin Judio. 58 Nagsonod man sakanya si Pedro adto, piro oroarayo iya ki Jesus. Nagluug iya adto sa natad nyo Pinakanamamayong Padi ag nag-uga kaiba nyo manga bantay tanganing maisiyan kin onong mangyayari ki Jesus. 59 Adto sa luug, yo manga namamayo nin manga padi ag yo nga'min na miyembro nin Korte nin manga Judio, niingowa na makakoko nin manga ebidensyang bukung osto tomang ki Jesus tanganing maosgaran iya nin kagra'nan. 60 Piro uda sira makoko, maski kadakul yo nagrani ag nagtestigo nin kapotnayan. Nyo kamawriyan agko dowang nagrani, 61 ag sominabi, “Ana lalaking adi nagsabi na, ‘Raragbaun ko ana Templo nin Dios piro mapapatindug ko an otro sa luug nin tolong aldaw.’ ”
62 Tominindug yo Pinakapamayong Padi ag inonga si Jesus, “Uda ika ikakasimbag sa sawut saimo nya manga taong adi?” 63 Indi nagsimbag si Jesus. Kaya inonga iya otro nyo Pinakapamayong Padi, “Sa pangaran nya boway na Dios, ipisogo ko saimo na sabiyun mo sa'mun ngowan kin ika ana Cristo, ana Agin nin Dios.” 64 Sominimbag si Jesus, “Ika na ana sominabi. Ag muya kong sabiyun sainyo nga'min na poon ngowan, makikita ninyo na ako na Agin nin Tao na nakauga sa too nya makapangyariyan na Dios. Ag makikita man ninyo ako sa manga panganoron na niabot didi sa kina'ban.” 65 Kaso marungug adto nyo pinakapamayo nin manga padi, ginasi niya yo sowut niyang bado ag sinabi, “Ana taong adi nitomang sa Dios! Indi ta na kaipowan pa nin manga testigo! Narungug ninyo ngowan ana sakanyang pagtomang sa Diyos! 66 Ono ag osgar ninyo?” “Kinakaipowan iyang gura'nun!” simbag nira.
67 Pakatapos, linostaban nira si Jesus sa lalawgun, ag binanug. Sinampaling man iya nyo iba, 68 na yo sabi, “Cristo! Sukri daw kin siisay sominampaling saymo!”
Pinagnegaran ni Pedro si Jesus
(Marcos 14:66-72; Lukas 22:56-62; Juan 18:15-18, 25-27)
69 Si Pedro man, nyo oras na adto nakauga si Pedro sa luug nyo patiyo, ag rinaniyan iya nin usad na sorogoon na babayi ag sinabiyan iya, “Kaibanan ika ni Jesus na tagaGalilea, bukung amo?”
70 Piro pinagdiyaran adi ni Pedro adto sa atobangan nyo nga'min na yo sabi, “Uda ako pagkaisi sa manga pisabi mo.” 71 Ag kaso nagponta si Pedro adto sa pwertaan nyo patiyo, nakita na naman niya nin usad pang sorogoon na babayi. Sinabiyan nyo sorogoon na adi yo manga tao adto. “Ana taong adi kaibanan ni Jesus na tagaNazaret.”
72 Pinagdiyaran na naman adi otro ni Pedro na yo sabi, “Pisompa ko, indi ko bistado ana taong aan!”
73 Tauntaun yo manga tao adto rominani ki Pedro ag nagsabi, “Usad talaga ika sa kaibanan ni Jesus na tagaNazaret ta risa sa saimong pagisabi!”
74 “Magraan man ako, talagang indi ko bistado ana taong aan.” yo simbag ni Pedro.