27
Inosgaran ni Pilato si Jesus
(Marcos 15:1; Lukas 23:1-2; Juan 18:28-32)
1 Kinapi'tan nyo sonod na aldaw, kaamay pa nagtipon yo manga pamayo nin padi ag manga pamayo nin manga Judio, ag napagkaoroyonan nyo nga'min na ipaguraan si Jesus. 2 Ginapos nira si Jesus ag dinara ki Gobernador Pilato.
Nagbitay si Judas
(Gawa 1:18-19)
3 Kaso maisyan nyo traydor na si Judas na inosgaran nin kagra'nan si Jesus, nagbasol iya adto sa sakanyang ginibo, ag ibinalik yo trayntang pidasong pirak adto sa manga nipamayong padi ang nipamayong manga Judio. 4 Yo sabi niya, “Nagkasala ako! Pinagtraydoran ko ana taong uda man kasa'lan.” Piro sominimbag sira, “Onong labut namun, problema mo na aan!” 5 Inumut ni Judas yo kwarta adto sa luug nyo templo, ominalin ag nag-ugut.
6 Pinonpon nyo manga poon nin padi yo manga kwarta ag sominabi, “Sala sa Kasogoan na iluug ana kwartang adi sa kaban nin yaman nyading templo, dail kabayaran adi sa pagguraan sa taong uda kasa'lan. Pagbalga adi sa sa'tun na Kasogoan.” 7 Kaya nagkaoroyon sira na yo kwarta ibakal adto sa raga nin nigibong koron, tanganing paglubungan nin manga dayowan. 8 Amo adi ana dailan kin taynga ta anggan ngowan yo logar na adto piba'no pa nanggayud na, “Raga nin Rogo.”
9 Sa pangyayaring adto nagibo yo sinabi ni Propeta Jerimias kaso sabiyun niyang, “Kinoko nira yo trayntang pidaso nin kwartang plata, yo kantidad na pinagkaoroyonan nin manga Israelita na pambayad sakanya, 10 ag ginamit nira yo sintabo tanganing bakalun yo raga nyo paragibong koron basi sa sinabi sa'kun nin Kagorangnan.”
Si Jesus sa Atobangan ni Pilato
(Marcos 15:2-5; Lukas 23:3-5; Juan. 18:33-38)
11 Iniatobang si Jesus sa gobernador ag nag-onga adi sakanya, “Ono ika ana Hadi nin manga Judio?” Sominimbag si Jesus, “Ika na ana sominabi nyaan.” 12 Piro indi pa nanggayud nagsimbag si Jesus sa mga sawut sakanya nyo mga nipamayo nin manga padi ag nipamayo nyo mga Judio.
13 Kaya sominabi sakanya si Pilato, “Indi mo sisimbagun ana nga'min na ipisawut nira tomang saymo?”
14 Piro indi pa nanggayud sominimbag si Jesus maski usad na sasabiyun, kaya nagngalas yo gobernador
Inosgaran si Jesus nin Kagra'nan
(Marcos 15:6-15; Lukas 23:13-25; Juan 18:39-19:16)
15 Kada Piyesta nin Paskowa, nakaogalian nya gobernador na magpalowas nin usad na nakakarsil, na among muya nyo manga namamamwaan na palowasun. 16 Nyo panaon na adto agko usad na bistadong nakakarsil na ana pangaran Barabas. 17 Kaya kaso magtiripon yo manga tao, inonga sira ni Pilato, “Siisay ana muya ninyong palibriyun ko, si Barabas o si Jesus na piba'nong Cristo?” 18 Isi ni Pilato na dinara nira si Jesus sa kanya pormidyo sa pagkaibug.
19 Miyentras na pirungug ni Gobernador Pilato yo kaso ni Jesus, pinatogonan iya nyo sakanyang sugud nin bagadi, “Indi mo ipagpakaraut ana taong aan na uda kasa'lan, ta kagabi naporisaw akong maray dail sa pangatorogan manungud sakanya.”
20 Piro yo manga tao lalong sinolsolan nyo manga pamayo nin manga padi ag nyo namamayo nin manga Judio, na amo nirang ayatun ki Pilato na palibreyun si Barrabas ag ipaguraan si Jesus. 21 Inonga sira otro nyo gobernador, “Siisay sa dowang adi ana muya ninyong palowasun ko?”
Sominimbag yo manga tao, “Si Barabas!”
22 Inonga sira ni Pilato, “Kin amo aan, ono ana gigibowun ko ki Jesus na piba'nong Cristo?”
Nagsirimbag yo manga tao, “Ipako iya sa kros!”
23 Nag-onga otro si Pilato, “Onong kara'tan ana naginibo niya?”
Piro mas lalo pang nag-uruyawan yo manga tao, “Ipako iya sa kros!”
24 Kaso makita ni Pilato na uda iya magiginibo, ta mas lalo pang niuruyawan yo manga tao, nagpakoko iya nin tobig ag nag-unuw nyo sakanyang kamut sa atobangan nyo manga tao. “Uda ako paninimbagan sa kagra'nan nya taong adi. Baala kamo, ta kabu'tan ninyo adi!” Yo sabi niya.
25 Yo nga'min nagsimbag, “Kami ag ana sa'mun na manga agin ana maninimbag nya sakanyang kagra'nan!”
26 Kaya pinalibre ni Pilato si Barrabas, si Jesus man itinao niya sa manga soldados tanganing ipako sa kros.
Pinagtoyatoya si Jesus nya manga Soldados.
(Marcos 15:16-20; Juan 19:2-3)
27 Dinara nyo manga soldados si Jesus sa luug nyo palasiyo nyo gobernador, ag nagtipon yo intirong batalyon nyo manga soldados sa palibot niya. 28 Inobaan iya nira ag sinowutan nin badong lapola. 29 Kominoko sira nin bagagun na latodok ag ginibo ading korona ag ikinorona sakanya. Kina pinakaput sakanya yo usad na sogkod, ag patoyatoya siralng lominood sa atobangan ni Jesus na nisabing, “Viva sa Hadi nin manga Judio!” 30 Linostaban nira iya, kinoko yo olas ag orootro iyang rinapas sa payo. 31 Pakapagparatoyatoya sakanya, inoboan iya nira nyo kapa ag isinowut otro yo dati niyang bado. Pakatapos linowas iya sasiyodad tanganing ipako sa kros.
32 Kaso palowas na sira nyo siyodad, nasabat nira yo usad na tagaCirene na ana pangaran Simon, pinirit nira ading pa'sanun yo kros ni Jesus. 33 Kaso omabot sira sa logar na pibanong Golgota, (na ana muyang sabiyun, “Logar nin manga Bongo”), 34 tinawan nira si Jesus nin alak na agko kasalak na apro, piro kaso manamitan niya adi, indi niya ininom.
35 Ipinako nira si Jesus sa krus, ag nagbonotan sira tanganing pagbangabanagaan yo bado ni Jesus. 36 Nag-uruga sira ag binantayan si Jesus. 37 Nagbutang sira nin karatola sa pamaywan ni Jesus, ag bagadi yo nakasorat na sawut tomang sakanya: “Amo adi si Jesus, ana Hadi nin manga Judio.” 38 Agko man dowang maonas na ipinako sa kros na kasabay ni Jesus, usad sa too, ag usad sa wala.
39 Yo manga taong niliis nitangutangu sa pagtoyatoya sakanya, 40 sabi nira, “Ika na niragbaun nya templo ag papatindugun adi sa luug nin tolong aldaw, libreyan daw ngowan ana sadiri mong boway! Kin ika ana Agin ni Dios, bomaba ika dyan sa kros!”
41 Amo man adto panonoya nyo manga nipamayo nin manga padi, manga paratoro nin Kasogoan ag manga nipamayo nin manga Judio. 42 “Ilinigtas niya yo iba piro indi niya ikaligtas ana sadiri! Bukung iya ana Hadi nin Israel? Kin magbaba iya sa kros, tomood na kami sakanya. 43 Nisarig iya sa Dios, ag pisabi pa niyang Agin iya nin Dios, ki'tun ta daw kin baga iligtas iya nin Dios ngowan!” 44 Pinag-insolto man iya nyo manga maonas na ipinako sa kros na kasabay niya.
Ana Pagkagraan ni Jesus
(Marcos 15:33-31; Lukas 23:44-49; Juan 19:28-30)
45 Poon odto anggn alastres dominulum ana bilog na kina'ban. 46 Kaso ni alas tres na nin apon, ominuyaw si Jesus nin lakusug, “Eli, Eli, lema sabachtani?” na ana muyang sabiyun, “Dios ko, Dios ko, taynga ta pipaba'yan mo ako?”
47 Narungug adto nyo ibang nitindug adto, sominarabi sira, “Piba'no niya si Elias!” 48 Usad sakanda yo dominalagan tolos ag kominoko nin esponga, idinotdot adto sa maawsum na alak, ag ibinutang sa poro nyo tukun ag muyang ipasupsup ki Jesus.
49 Piro yo iba sominabi, “Ugat mo'na, ki'tun ta daw kin omabot si Elias tanganing iligtas iya!”
50 Ominuyaw otro si Jesus nin makusug, kina naotsan na.
51 Nyo oras man na adto, nabanga poon sa itaas anggan sa ibaba yo kortina adto sa luug nyo templo. Lomininog sa intirong karagaan ag nagkatipaktipak yo manga bato. 52 Nagkaboroksan man yo manga pantson ag naboway otro yo manga banal. 53 Rominolowas sira sa manga lubungan. Kaso maboway otro si Jesus, nagponta sira sa Jerusalem,a kin sa'ri dakul yo nakakita sa kanya.
54 Yo kapitan ag yo sakanyang manga soldados na nagibantay ki Jesus natakot maray kaso mamati yo lindo ag nakita yo manga pangyayari. SInabi nira, “Osto talaga na iya ana Agin nin Dios!”
55 Sa buku man na kaarayong maray agko manga babayi na nikita sa manga pangyayari. Kaso mag-alin si Jesus sa Galilea, nagsonod ana manga babaying adi sakanya ag tinabangan iya sa sakanyang manga kaipowan. 56 Kaiba adto si Maria Magdalena, si Mariang ina ni Santiago ag Jose, ag yo sugud ni Zebedeo.
Ilinubung si Jesus
(Marcos 15:42-47; Lukas 23:50-56; Juan 19:38-42)
57 Kaso padulum na, usad na mayaman na lalaki na tagaArimatea yo nag-abot. Iya si Jose na usad man na disipolo ni Jesus. 58 Nagponta iya ki Pilato ag inayat yo bangkay ni Jesus. Nagsogo man si Pilato na itao yo bangkay ki Jose. 59 Kaya kinoko ni Jose yo bangkay ni Jesus ag pinotos adi nin malinig na telang lino. 60 Ilinubung niya adi sa lulubungan na ba'go pa sanang ilinobot sa bantuy, na ipinagibo niya para kinta'na sa sakanyang sadiri. Pakatapos pinaligid niya yo usad na dakuung bato tanganing saraan yo pintoan nyo lulubungan, bago iya ominalin. 61 Si Maria na tagaMagdala ag usad pang Maria aadto nakauga sa tungtung nyo lubungan
Yo manga Bantay sa Lulubungan
62 Kinaugmaan, Sabado, Aldaw nin Pagpadiskanso nin manga Judio. Yo manga pamayong padi ag manga pamayo nin Pariseo nagponta ki Pilato. 63 Yo sabi nira, “Gobernador, narumruman namun na sinabi nyadtong parasagisagin na adto kaso naboboway pa, iya kono maboboway otro pakaliis nin tolong aldaw. 64 Kaya pabantayan mo tabi yo lulubungan anggan sa tolong aldaw, ta baka kinaga'biyan pontaan nyo sakanyang manga disipolo, ag onasun yo bangkay, ag ipamaritang naboway iya otro, kin mangyari aan, ana pandadayang adi mas maraut pa kaysa adto sa o'na.”
65 Sominimbag si Pilato sa sakanda, “Agko kamo mga gwardya. Kamo mismo ana magbantay basi sa pagtaud ninyo.”
66 Kaya nagponta sira sa lulubungan, ag sinelyowan nira yo batong nakata'gub sa lulubungan tanganing masigoro nira kin agko magbokas, ag nag-obon sira adto nin nagkapirang bantay.