28
Naboway Otro si Jesus
(Marcos 16:1-10; Lukas 24:1-12; Juan 20:1-10)
1 Pakaliis nin Aldaw nin Pagpapadiskanso, madulumdulum pa nyo aldaw nin Domingo, nagponta sa lulubungan si Maria Magdalena ag yo usad pang Maria. 2 Biglang naglinog nin makusug ta agko usad na angel nin Kagorangnan na bominaba alin sa langit, pinalitong yo batong nakasakub sa lulubungan, ag ominuga sa sapuw nyadto. 3 Yo sakanyang itsora nakapapasi na baga kilat ag yo sakanyang bado lapoti na baga nyebe.a 4 Dail sa takot sakanya nyo manga bantay, nagkatoromba sira na baga guraan kaso makita nira yo angel.
5 Piro sinabi nyo angel adto sa manga babayi, “Indi kamo matakot, isi ko pianap ninyo si Jesus na ipinako sa kros. 6 Uda na iya didi, dail naboway na iya otro basi sa sinabi niya. Mari kamo, ki'ta ninyo ading pinagbutangan sakanya. 7 ‘Pakatapos, sinabi nyo anghel sakanda, Pontaan tolos ninyo yo manga disipolo niya, ag sabiyun ninyo sakanda na naboway na iya otro at mamomo'na na iya sainyo sa Galilea. Adto ninyo iya makikita. ’ Tandaan ninyo ana pisabi ko sainyo!”
8 Kaya dalidali sirang ominalin sa lulubungan. Ag maski natatakot sira, maogma pa nanggayud sira adto sa ibinarita sakanda nyo anghel. Nidalagan sirang pinontaan yo manga disipolo ni Jesus tanganing ibarita yo pangyayari.
9 Piro di sana nag-uguy, sinabat sira ni Jesus sa aagyan ag tini'no. Nagrani sira, kinugus yo sakanyang paa ag sinamba iya. 10 Sinabiyan sira ni Jesus, “Indi kamo matakot. Pontaan ninyo yo manga ipatngod ko ag sabiyun ninyo sakanda na magponta sira sa Galilea. Adto nira ako makikita.”
Yo Sawut nyo manga Bantay
11 Pakaalin nyo manga babayi adto sa lulubungan nagponta man adto sa siyodad yo ibang bantay ag sinabi adto sa manga nipamayong padi yo nangyari. 12 Pakatapos na mag-orosip-osip yo manga pamayong padi sa mga nipamayo nin mga Judio, napagkaoroyonan nira na ta'wan nin dakuung kantidad yo manga bantay, 13 na yo sabi, “Sabiyun ninyo sa manga tao na miyentras kamong torog, ominabot yo manga disipolo ni Jesus kina inonas yo bangkay. 14 Kin makaabot adi sa Gobernador kami na ana baala na magpaliwag sakanya. Uda kamo kinakaipowan na ikatakot.” 15 Inako nyo manga bantay yo sintabo ag kin ono yo sinabi sakanda amo nirang ginibo. Anggan ngowan amo pa aan ana ipipamarita nin mga Judio.
Nagpakita si Jesus sa Sakanyang manga Desipolo
(Marcos 16:14-18; Lukas 24:36-49; Juan 20:19-23; Gawa 1:6-8)
16 Nagponta yo onsing disipolo ni Jesus sa Galilea, adto sa usad na bantuy na sinabi sakanda ni Jesus. 17 Kaso makita nira si Jesus, sinamba nira iya, piro yo iba nagdowadowa. 18 Rinaniyan sira ni Jesus ag sinabi sakanda, “Itinao na sa'kun ana nga'min na kapangyariyan sa langit ag sa raga. 19 Kaya agi na kamo, pontaan na ninyo ana nga'min na tao sari man na logar, ag gibowun ninyo sirang manga disipolo ko. Bunyagan ninyo sira sa pangaran nin Ama, Agin, ag nin Espirito Santo. 20 Toroan ninyo sirang koyogon ana nga'min na ipisogo ko sainyo. Tandaan ninyo adi, pirmi akong kaiba ninyo anggan sa kapondowan nin kina'ban.”