I Saulu menonso mpane mepotuu si Yesu
9
1 Ni tempo etu, i Saulu napari-pari mpii, mopakaeka ai ina mampopate tau anu mepotuu si Pue Yesu. Etumo mpane laumo ia i Tadulako Menomba Mabose, 2 merade sura kuasa anu pensani nakeni lau i tadulako-tadulako nu tombi-tombi penombaa nu toYahudi i kota Damsik. Tunggaiana ane ria sira nasumba tomoane ba towawine anu mampeulai patudu ni Yesu, ina nasoko sira mpane nakeni mpesola i Yerusale.3 Mewali, i rara polumakoana lau i Damsik, awetu gompimo ia i kota, ungangkidamo ria pewangka anu mowangkasi i Saulu anu lako i langi. 4 Madungkamo i Saulu mpane ria sambua wotu anu mangulika ia, “Saulu, Saulu, mangkiada mpane nupopesiasi Aku?”
5 Nasonoi ni Saulu, “Ima Iko, i Pue!”
Mesono anu mololita etu, Nauli, “Akumo i Yesu, anu nupopesiasi! 6 Peongkomode mpane laumo iko i kota. Si dou ina rapadongka luwu si iko apa anu sangangaa nubabei.”
7 Ranga ni Saulu aretu, baria rainsanira kaapana anu raulira, lawi raepera wotu etu agaiana baria ria raitara topololita. 8 Lako ni se etu, mengkawangu mpane meongkomo i Saulu. Nabungkasi matana, agaiana bariamo ia meita. Mewali, etumo mpane ranini ngkidamo ia lau i kota Damsik. 9 Tolu eo kasaena, baria ia meita, baria mangkoni ai baria manginu.
10 I kota Damsik, ria sadua tau anu mepotuu si Yesu, sangana i Ananias. I rara pampatongawa ni Pue si ia, naronde ia ni Pue, Nauli, “Ananias!”
Mesono i Ananias, nauli, “Ei mboto aku Pue.”
11 Nauli ni Pue, “Ei-ei lau iko i tombi ni Yudasi i wiwi dala anu rasanga Dala Manoto. Nukadelo i tombi etu sadua tau anu lako i kota Tarsus anu rasanga i Saulu. Tau etu ina nusumba tongona mekakae, 12 ai i rara pampatongawaKu si ia, naita iko lau mampomberumpaka ia mpane moona iko palemu i woona bona meita mpesola ia.”
13 Nasonoi ni Ananias, “Pue, agaiana kuepemo tau wori mololita kono si Saulu etu. Maruminsi pepopesiasina i tauMu sira i kota Yerusale. 14 Mpane mai mbui ia i se ei, lawi rakiraka kuasa lako i kapala-kapala tadulako menomba bona mosoko ope-ope tau anu mampotuu Iko Pue.”
15 Nauli mbui ni Pue si Ananias, “Sangangaa lau iko! Lawi i Saulu etu, Kuoakamo Kupelisi mewali topobagoKu. Ina mopadongka ia sangaKu i toYahudi ai i tau ntanina anu baria sira toYahudi duduuna dongka mbui i datu sira. 16 Ina Kupatongawa kapari anu sangangaa nasumba ni Saulu nakenimpobagona si Aku.”
17 Mewali, lau mpuumo i Ananias i tombi anu natudoka ni Pue Yesu ni mpongone, mpane naonamo palena si Saulu, nauli, “Saulu, pokaku! Kamaimu i se ei, i Pue Yesu mampatongawamo si iko i tongo dala. Iamo anu motudu aku mai mosondaki iko bona meita mpesola iko ai bona nakuasai iko nu Inosa Magali.” 18 Ni tempo etu, ria mpuu anu ewa ruke nu bau ungangkidamo malopaki lako i matana, mpane i Saulu meita mpesolamo. Lako ni se etu, meongkomo ia mpane rariu. 19a Roo awetu, mangkonimo ia mpane maroso mpesolamo wotona.
I Saulu mepatudu i Damsik ai i Yerusale
19b Basangkia eo kasaena, i Saulu meari simbela-mbela ai topepotuu sira i kota Damsik. 20 I kota Damsik, lau liliu ia i tombi-tombi penombaa mopadongka bambari kono si Yesu i singka toYahudina, nauli, “I Yesu iamo Ana ni Pue Ala.” 21 Mawori mpuu sira tau anu mampowuli mampetingai lolita ni Saulu, raulira, “Adiwada ei? Bariapae ia ei anu mopari-pari mampenoka ina mampopate tau anu menomba si Yesu i Yerusale! Ai tunggaiana mai i se ei, bona mosoko mbui sira tau anu mepotuu si Yesu i se ei, mpane nakeni sira i kapala-kapala tadulako menomba i Yerusale.” 22 Agaiana kalalaua mawori tau anu mampotuu pololita ni Saulu, etumo mpane toYahudi anu i Damsik baria rabukura mobesoi. Pololitana etu mopakanoto mpuu ka i Yesuna Datu Topesorema.
23 Basangkia eona lako ni se etu, mogombo sira toYahudi, bona mampopate sira i Saulu. 24 Tunggaiara ina mokampai sira ope-ope boboka bente nu kota, malompe mabaa awetu mbui kawengi, bona ane moliu i Saulu, ina rapopatera. Agaiana nainsanida ni Saulu tunggaiara etu. 25 Etumo mpane ni tongo mbengi, basangkia topeula ni Saulu mangkeni ia lau i bente nu kota anu motoleliki Damsik. Ni se etu, i Saulu momeso i rara nu karanji, mpane raulu lako i wongko nu bente toa i tana i raoa nu kota, mpane kasaliu melangka ia.
26 Mesolamo i Saulu lau i Yerusale. Awetu ia dongka, napenoka mosimada ai tau anu mepotuu si Yesu, agaiana tau aretu mampokaeka ia, lawi baria rapotuura peulana mpuumo si Yesu. 27 Lako ni se etu, i Baranaba laumo mamposimada i Saulu, mpane naporangai lau i suro-suro ni Pue Yesu. Napatuntuka sira kaadiwana i Pue Yesu mampatongawa si Saulu i tongo dala kalauna i Damsik, ai adiwa i Pue mololita si ia. Napadongkaka mbui sira kapebai ni Saulu mopadongka bambari kono si Pue Yesu i Damsik. 28 Lako ni se etu, i Saulu meari simbela-mbela ai pokana sampepepotuuna i Yerusale, mopadongka bambari kono si Pue Yesu, ai baria ria kaekana. 29 Mololita ia mpane mombepekune ai mombesonoi ai toYahudi anu mobasa Yunani. Etumo mpane toYahudi aretu rapari-parira mangkadelo dala mampopate i Saulu. 30 Mewali, awetu rainsani nu pokana sampepepotuu tunggaia nu tau aretu, raporangaira ia lau i kota Kaisarea. Lako i Kaisarea, rapopangoka ia lau i kota Tarsus.
31 Mewali ni tempo etu, tau anu mepotuu si Kerisitu bariamo rapopesiasi i tana Yudea, Galilea ai Samaria. Tetambaimo topepotuu si Kerisitu, ai kalalaua marosoda pepotuura, lawi mengkoru mpuu sira si Pue Ala, lawi Inosa Magali mopakaroso rarara.
I Peturu mopakaosa i Eneas
32 I Peturu kaimba-imbaana mosondaki topepotuu si Pue Yesu. I polumakoana etu, mensopi ia i boea Lida, i tau ni Pue Ala. 33 I boea Lida, mansumba ia sadua tomoane, sangana i Eneas. I Eneas etu, walu mpaemo mapalu, baria nabuku mengkawangu lako i paturuana. 34 Nauli ni Peturu, “Eneas, i Yesu Kerisitu mopakaosa iko! Pengkawangumode, mpane nuwilulumo alimu.” Mewali ungangkidamo, meongko i Eneas. 35 Ope-ope tau i boea Lida ai i Saron mangita sira kaosanamo i Eneas, mewali mepotuumo sira si Pue Yesu.
I Peturu mopatuwu mpesola i Dorkas
36 Baria karao lako i boea Lida, ria mbui sambua kota anu rasanga Yope. I Yope, ria sadua towawine anu mepotuu si Yesu, i Tabita sangana. (I rara basa Yunani sangana i Dorkas, lempona lagiwa.) Malompe mpii babeiana, lawi motulungi liliu ia tau sira anu mesiasi. 37 Ni tempo etu, madua ia mpane kasaliu mamate. Wotowatana roomo radoi, mpane rabolimo i paturuana i lonta anu i wongko. 38 Nakeningkabariana karao kota Yope lako i boea Lida, etumo mpane topepotuu i Yope mangepe kariana i Peturu i Lida. Ratudu sira rodua tau lau si Peturu merade bona maliga mai i Yope. 39 Mewali, i Peturu mangoka mpuumo lau simbela-mbela ai sira. Awetu ia dongka i Yope, kasaliu rakenira lau i paturua pepowataa i Dorkas. Ope-ope tobemba towawine motoleliki i Peturu. Ratumangisira wotowata ni Dorkas, mpane ratudokaramo i Peturu basangkia mbuana badu ai sampi anu nadau ni Dorkas ni tempona mani natuwu. 40 Roo awetu, i Peturu mampopelosomo ope-ope tau lako i lonta, mpane molingkudumo ia mekakae. Roo ia mekakae, natanondoi tomate etu, nauli, “Tabita, pengkawangumode!” Mewali ungangkidamo tebungkasi mata ni Dorkas. Awetu naita i Peturu, kasaliu momeso ia. 41 Lako ni se etu, i Peturu mopatoro palena mpane nadii duduuna meongko. Roo awetu, naronde mpesolamo sira ope-ope tau ni Pue Ala ai tobemba aretu, naulika sira, “Eimo pokami, tuwu mpesolamo ia.” 42 Anu mewali etu tolele i sumalele kota Yope, duduuna mawori tau mepotuu si Pue Yesu, anu mewali Datu Toposorema sira. 43 Roo awetu, i Peturu meari i Yope basangkia eo kasaena. Meari ia i tombi ni Simo, topopasilolonga kolimba binata.