I Peturu ai i Kornelius
10
1 I kota Kaisarea, ria sadua tomoane, sangana i Kornelius. I Kornelius etu, sadua tadulako anu motadulakoi aono atu surudado anu lako i tana Italia. 2 Ia baria toYahudi, agaiana nauda awetu, mengkoru mpuu ia si Pue Ala, mpane sira santombi menomba mbui sira si Pue Ala. I Kornelius motulungi liliu toYahudi anu mesiasi katuwura, ai mekakae liliu ia si Pue Ala. 3 Sambela tempo, ba tinti tolu sindulau eo, ria anu naita ewa pangipi. I rara pampatongawa etu, naita dongka sadua malaeka ni Pue Ala mpane meronde, nauli, “Kornelius!”4 Maeka mpuu i Kornelius mototoki malaeka etu, mewali napekune, nauli, “Mangkiada Pue?”
Nasonoi nu malaeka etu, “I Pue Ala mangepemo pekakaemu, ai Nainsani kabulana raramu motulungi tau anu mesiasi. 5 Mewali ei-ei, tudumode sira basangkia dua tau lau i Yope mangkadelo ai moronde mai sadua tau anu rasanga i Simo Peturu. 6 Peariana gompi i wiwi nu tasi i tombi nu topopasilolonga kolimba binata. Sangana i Simo.”
7 Awetu malambu malaeka etu, i Kornelius kasaliu moronde rodua tuduana ai sadua surudadona anu maroso pepotuuna si Pue Ala. 8 Napadongka si sira apa anu lako naita ai naepe, mpane natudumo sira lau i kota Yope.
9 Ewa ineilena, ina togo eo, tongona mani anu ratudu aretu i tongo dala gompi i kota Yope, memponemo i Peturu i tumu nu tombi lau mekakae. 10 Baria masae lako ni se etu, maoromo i Peturu napenokamo mangkoni. Mewali, tongona mampegia kalesa nu pangkoni, ungangkidamo naita sambua pampatongawa. 11 I rara pampatongawa etu, naita langi tebungkasi ai ria anu ewa bana anu mapeka. Iba sunona rakoloroi, mpane bana etu raulu dongka i tana. 12 I bana etu, ria maisi mpangkana binata. Ria anu mopaa iba, anu mendele, ai ria mbui tosi. 13 Roo awetu, naepe sambua wotu anu manguli, “Peturu! Peongkomode, sambalemode binata aretu mpane pangkonimode.”
14 Nasonoi ni Peturu, “Baria Pue! Lawi binata anu ria i bana aretu rapalia mangula ada nu agamaki. Baria mani sambela kukoni anu rapalia.”
15 Nauli mbui nu wotu etu si Peturu, “Apa anu nauli ni Pue Ala malompe, inee nuuli merikati mangula ada agamamu.” 16 Pampatongawa etu tolu mbela mewali, mpane roo awetu, teore mpesolamo bana etu lau i langi.
17 Lako ni se etu, mawulimo rara ni Peturu mampekiri ba apa lempona pampatongawa anu lako naita. Tongona mani mampepekiri, dongkamo sira tudua ni Kornelius i kota Yope etu, meongko i boboka wala nu tombi etu. 18 Mewali morondemo sira sadua tau rapekunera, “Ba, ria i se ei sadua torare anu rasanga i Simo Peturu?”
19 Mewali, tongona mani i Peturu mampepekiri ope-ope anu lako naita, Inosa Magali manguli si ia, “Petingai, ria sira tolu tomoane anu mai mangkadelo iko. 20 Pendolumode maliga. Inee iko maeka meula si sira, lawi Aku anu motudu sira.” 21 Mewali, mendolumo i Peturu lako i tombi etu, mpane naulika sira anu lako dongka aretu, “Akumo anu nikadelo. Apa anu nikadeloka aku?”
22 Rasonoira, “I tua Kornelius anu motudu kami mai i se ei. Ia sadua tau anu manoto rarana motadulakoi surudado, mengkoru ia si Pue Ala, mpane rabila mbui ia nu ope-ope toYahudi. Sadua malaeka ni Pue Ala motudu ia moronde iko lau i tombina, bona pensani ia mampetingai apa anu ina nupadongkaka ia.”
23 Roo awetu, i Peturu mobawai tudua ni Kornelius mosambengi i tombina. Mewali mosambengi mpuumo sira i se etu.
Ewa ineilena madondo, meongkomo i Peturu meula si sira lau i kota Kaisarea. Ai ria mbui basangkia pokana sampepepotuuna lako i Yope anu lau simbela sira. 24 Sambengia sira i tongo dala, lako dongkada sira i Kaisarea. Awetu sira dongka, i Kornelius santina terusu sira mampegia i Peturu. Ria mbui simada ni Kornelius anu naronde bona terusu sira i tombina. 25 Mewali, awetu dongka i Peturu i tombi ni Kornelius, i Kornelius mensuwu lako i tombina lau modupa i Peturu, mpane molingkudu ia motumpa i lio ni Peturu. 26 Agaiana napatoro ni Peturu palena nadurei napopeongko, mpane nauli, “Peongko, aku ei manusia ngkida aku, ewa iko mbui.” 27 Tongora molololita mesua sira i rara nu tombi. Awetu sira mesua, naita ni Peturu tau wori anu terusu i se etu. 28 Naulika sira ni Peturu, “Niinsani mboto, mangula atura agamaki anu maroso, kami toYahudi baria kami pensani mampogaloka tau anu baria sira toYahudi ba mesua i rara nu tombira. Agaiana ria pampatongawa ni Pue Ala si aku, mopakanotoka aku kabariana ria manusia anu merikati mangula ada agama. Baria ria tau anu rapalia kipogaloka. 29 Etumo mpane tempoku nuronde mai, baria aku pebai menggoli. Mewali, ei-ei kupenoka manginsani tunggaiamu moronde aku mai.”
30 Mesonomo i Kornelius, nauli, “Iba eo naliu, kira-kira ni tempo anu simbela ai ei, tongoku mekakae i tombiku tinti tolu sindulau eo, ungangkidamo ria sadua tomoane anu meongko i lioku. Pesampina mengkila-ngkila. 31 Naulika aku nu tau etu: ‘Kornelius, i Pue Ala mampetingaimo pekakaemu ai Nakaendo petulungimu i topesiasi. 32 Tudumode taumu lau i kota Yope moronde sadua tau anu rasanga i Simo Peturu. Peariana gompi i wiwi nu tasi i tombi ni Simo topopasilolonga kolimba binata.’ 33 Etumo mpane maliga kutudu tau lau moronde iko. Malompe mpuu raramu, lawi mai iko i se ei si kami. Ei-ei terusumo kami i se ei i lio ni Pue Ala, lawi kipenoka kipetingai ope-ope anu natuduka iko ni Pue Ala.”
Pololita ni Peturu si Kornelius
34 Napepuumo ni Peturu pololitana, nauli, “Ei-ei kuinsanimo i Pue Ala baria mampopontani tau. 35 Tau anu lako imba ngkida, ba ima ngkida anu mengkoru si Pue Ala ai anu manoto babeiara, batena nadoko ni Pue Ala. 36 Niinsanimo Ngkora anu napadongka ni Pue Ala si kami toYahudi. Ngkora etu, iamo Bambari Malompe kono i posintuwu ni Pue Ala ai manusia, nakeningka nasuru ni Yesu dosata. I Yesu etu iamo Pue nu ope-ope tau. 37 Niinsani mpuu apa anu mewali i sumalele tana Yudea, anu rapepuu lako i Galilea awetu roo periu anu napatuduka kita ni Yohane, i tau anu menonso lako i dosara. 38 Niinsani tunturakana i Yesu toNasare. Iamo anu napelisi ni Pue Ala mpane Nakiraka Inosa Magali ai kuasa. Imba ngkida polumakoaNa i tana nu toYahudi, mobabei Ia apa anu malompe ai mopakaosa ope-ope tau anu napopesiasi Datu nu Seta, lawi naporangai Ia ni Pue Ala. 39 Kami eimo anu mangita ope-ope anu Nababei i tana nu toYahudi dongka i kota Yerusale. Kasopoana, i Yesu etu rapopate, rapaku i kau anu rapopombesape. 40 Agaiana i katolu eona, i Pue Ala mopatuwu mpesola i Yesu, mpane Napatongawa wotoNa i manusia, 41 agaiana i Yesu baria tongawa i ope-ope tau, batena ngkida si kami anu napelisi amimo ni Pue Ala mewali sabiNa. Mpane i katuwu mpesola ni Yesu, manginu ai mangkoni simbela kami ai Ia. 42 Mpane Natudu kami mobambari Bambari Malompe etu i ope-ope tau, mpane mosabiki ka Iana mpuu anu napelisi ni Pue Ala mewali Topobotusi kara-kara nu ope-ope tau, malompe anu tuwu mani awetu mbui anu mamatemo. 43 Ope-ope nabi ni banimpia mampololita kono si Yesu, raulira: ima ngkida anu mepotuu si Ia, dosara teampuni nakeningkamakuasa ni Yesu.”
Tau anu baria toYahudi nakuasai mbui sira Inosa Magali
44 Tongona mani i Peturu mololita, Inosa Magali mokuasaimo ope-ope tau anu mampetingai pololitana. 45 Tingkaramo sira ope-ope toYahudi anu mepotuu si Yesu anu naporanga ni Peturu lako i Yope mai, lawi tau anu baria sira toYahudi nakuasai mbui sira Inosa Magali. 46 Manotomo kanakuasaira nu Inosa Magali, lawi mololita sira i rara basa anu Nakiraka sira nu Inosa Magali anu baria rainsanira ai motoia i Pue Ala. 47 Lako ni se etu, naulimo ni Peturu, “Peita, tau arei nakuasaimo sira nu Inosa Magali ewa anu mewali si kita. Mewali, sangangaa rariu mbui sira.” 48 Etumo mpane naperade ni Peturu bona rariu sira i rara sanga ni Yesu Kerisitu. Roo awetu, i Kornelius ai rangana merade sira si Peturu, bona meari sira simbela-mbela basangkia mbengina mani.