Kadongka ni Peturu i Yerusale
11
1 Ope-ope suro ai ope-ope topepotuu si Pue Yesu i sumalele tana Yudea, mangepe kariana tau anu baria sira toYahudi anu modoko mbui sira Ngkora ni Pue Ala. 2 Etumo mpane i tempo ni Peturu lau i Yerusale, basangkia toYahudi anu mepotuu si Yesu mosasalai i Peturu, 3 raulira, “Mangkiada mpane mesua iko i tombi nu tau anu baria mani ratindi mangula ada agamata, mpane mangkoni mbui iko simbela-mbela ai sira?”4 Etumo mpane natuntuka sira ni Peturu ope-ope anu mewali mepuu lako i mpolinguruna, nauli, 5 “Tongoku mekakae i kota Yope, ungangkidamo kuita sambua pampatongawa. I rara pampatongawa etu, kuita ria anu ewa bana anu mapeka, sunona iba rakoloroi, mpane bana etu raulu lako i langi toa i lioku. 6 Kutotoki lompe isina, kuita maisi mpangkana binata anu mopaa iba, binata anu maila, binata anu mendele, mpane ria mbui tosi. 7 Baria masae lako ni se etu, kuepe sambua wotu anu manguli: ‘Peturu, peongkomode, sambalemode mpane konimode.’ 8 Kusonoi: ‘Baria Pue! Baria mani sambela kukoni binata anu rapalia ai anu merikati mangula ada nu agamaki.’ 9 Kuepe mbui wotu etu mangulika aku: ‘Apa anu nauli ni Pue Ala malompe, inee nuuli merikati.’ 10 Pampatongawa etu, tolu mbela mewali, mpane teore mpesolamo lau i langi. 11 Mewali kasaliu ria sira tolu tomoane anu dongka i tombi anu kipearii, agaiana baria sira toYahudi. Tau tolu aretu, ratudu sira lako i kota Kaisarea lau mangkadelo aku. 12 Ni tempo etu, Inosa Magali mangulika aku: ‘Peturu, inee nupokaeka meula si sira.’ Mewali, lau mpuumo aku simbela-mbela ai sira, mpane pokata anu aono ei, lau mbui sira mamporangai aku i Kaisarea. Kadongkaki i tombi ni Kornelius, mesuamo kami i rarana. 13 I Kornelius mopadongka si kami apa anu naita, iamo sadua malaeka dongka meongko i rara nu tombina anu mangulika ia: ‘Tudumode sira basangkia tau lau i Yope, moronde mai sadua tomoane anu rasanga i Simo Peturu. 14 Ia anu ina mopadongkaka iko bambari anu mangkeni pesorema si iko ai i ope-ope tau anu ria i rara nu tombimu.’
15 Mewali, awetu kupaliliu mopatudu sira, mendolumo Inosa Magali mokuasai sira, ewa anu mewali si kita toYahudi mpolinguruna i ka Nakuasaita nu Inosa Magali. 16 Roo awetu, kukaendomo lolita ni Pue anu manguli: ‘I Yohane meriu ai ue, agaiana komi ina rariu ai Inosa Magali.’ 17 Mewali, poka-poka, nauda baria sira toYahudi, manotomo ka Nakirakara ni Pue Ala Inosa Magali, ewa anu Nakiraka si kita nakenimpepotuuta si Pue Yesu Kerisitu. Ane ewa etu, imada aku ei, mpane pensani aku moewa tunggaia ni Pue Ala?”
18 Awetu raepe nu tau aretu lolita ni Peturu, bariamo sira mesalai. Motoiamo sira i Pue Ala, raulira, “Ei-ei tongawamo si kami, i Pue Ala modoko mbui tau sira anu baria toYahudi, mpane Nakiraka sira tempo menonso lako i dosara duduura mansumba katuwu malompe anu baria mokasopoa.”
Tau anu mepotuu si Kerisitu i Antiokia
19 Mewali, mepuu lako i karapopate ni Setepanu, topepotuu si Yesu anu ria i Yerusale rapopesiasi liliu sira, ai mawori sira anu masawu duduuna teduu sira i tana Fenisia, i tana Siprus ai i kota Antiokia. I ope-ope boea anu rapolumakoira, mobambari sira Ngkora ni Pue Ala kono si Yesu Kerisitu, agaiana bambari etu wule rapadongkara ngkida i toYahudi. 20 Etumo mpane nakenimpobagora, ria mbui sira anu mepotuu si Yesu, anu lako i tana Siprus ai Kirene. Lako si sira etu, ria anu lau i kota Antiokia mobambari Ngkora ni Pue Ala kono i Yesu Kerisitu i tau anu baria sira toYahudi. 21 Kuasa ni Pue ria simbela-mbela ai sira, duduuna mawori toAntiokia mepotuu mpane meula si Pue Yesu.
22 Mewali, topepotuu anu ria i Yerusale mangepe mbui sira apa anu mewali i Antiokia etu. Etumo mpane i Baranaba ratudu lau i Antiokia. 23-24 I Baranaba etu, sadua tau anu malompe rarana. Nakuasai ia nu Inosa Magali ai maroso pepotuuna. Kadongka ni Baranaba i Antiokia, matono mpuu rarana, lawi naita kabosena pewati ni Pue Ala si sira anu mepotuu si Yesu. Mewali, i Baranaba mopakaroso rarara, mpane naulika sira bona mampeulai liliu sira i Pue Yesu lako i rarara mpuu. Ai mawori mbui tau mepotuu si Pue Yesu.
25 Roo awetu, laumo i Baranaba i kota Tarsus mangkadelo i Saulu. 26 Awetu nasumba, naporangaimo lau i Antiokia. I Baranaba ai i Saulu, meari sira i Antiokia sampae kasaena. Terusu sira i se etu simbela-mbela ai tau anu mepotuu si Yesu, mpane mopatudu sira tau wori. Mpolinguruna i Antiokia tau anu meula si Yesu rauli nu tau ntanina “topepotuu si Kerisitu”.
27 Ni tempo etu mbui, ria sira basangkia nabi lako i Yerusale anu lau i kota Antiokia. 28 Sadua lako i nabi aretu, sangana i Agabus. Nakeningkamakuasa nu Inosa Magali, i Agabus etu meongkomo, mpane napadongka ami kaina riana tempo oro anu mabose i sumalele Kadatua Roma. (Oro etu mewali mpuu i tempo poparenta nu Datu Mabose Klaudius i Roma.) 29 Awetu raepe nu tau anu mepotuu si Kerisitu i Antiokia bambari etu, rapenokara motulungi pokara sampepepotuura anu ria i tana Yudea. Mewali, ope-ope sira mokiraka doira mangula pebukuara sadua-sadua. 30 Roo awetu, i Baranaba ai i Saulu ratudu sira mangkeni doi etu lau i tadulako-tadulako nu tau anu mepotuu si Kerisitu i Yerusale.