Tau anu mepotuu si Kerisitu rapopesiasi liliu
12
1 Ni tempo etu, Datu Herode Agripa mepuu mampopesiasi tau anu mepotuu si Kerisitu. 2 Mpane mosawaa ia bona i Yakobu powutu ni Yohane rapopate ai guma. 3 Apa anu nababei etu rapokatono nu toYahudi. Etumo mpane i Herode motudumo sira tau mosoko i Peturu. Pewalina etu, ni eo anu rapomabose nu toYahudi anu rauli Posusa Roti Anu Baria Raragii ai rauli mbui Posusa Pasa. 4 Rasokora mpuumo i Peturu, mpane ratarunggu. Iba ntobu surudado raposawaaka mokampai. Santobu-santobu surudado, iba-iba dua sira samporangaa. Tunggaia ni Herode kara-kara ni Peturu etu, rapomeso-mesoka i lio nu tau wori liudamo Posusa Pasa. 5 Mewali, i Peturu ria i rara nu tarunggu, agaiana topepotuu si Kerisitu mekakae liliu sira si Pue Ala, mampekakaeka i Peturu.I Peturu rapawia lako i petarunggua
6 I kawengina lako baria mani i Peturu rakeni i lio nu tau wori ineilena madondo, i Peturu maturu rapaitongoi nu rodua surudado. Palena rombali rasilu ai rante, sambali sambali rasilu simbela ai pale nu surudado aretu. Ria mbui surudado ntanina anu mokampai boboka nu petarunggua. 7 Agaiana ni tongo mbengi etu, ungangkidamo ria anu mewangka i rara nu petarunggua, lawi mampatongawamo sadua malaeka ni Pue. Malaeka etu molikemo i Peturu, nauli, “Pemata maliga!” Ni tempo etu, ungangkidamo tekakasi rante anu rapoposilu palena. 8 Nauli mbui nu malaeka etu si Peturu, “Pakemode pampoumu, mpane nuunsamo kandupamu!” Napeulai mpuumo ni Peturu parentana, mpane roo awetu, nauli mbui nu malaeka etu, “Unsamode jubamu mpane peulamode si aku.” 9 Meula mpuumo i Peturu i malaeka etu. Agaiana baria mani manoto i pekiri ni Peturu ba mamonso-monso mpuu malaeka etu naita, ba wule pangipina ngkida. 10 Mewali, molumakomo sira moliu surudado anu mokampai boboka anu mpolinguruna ai boboka anu karombuana, mpane dongkamo sira i boboka besi i dala lau i kota. Boboka besi etu tebungkasi saduduana. Liliu sira modala i boboka etu lau i rara nu kota. Baria mani sira masae molumako, ungangkidamo matonto malaeka etu mopalengi i Peturu.
11 Lako ni se etu, manotomo i pekiri ni Peturu kabariana mangipi, mpane nauli, “Mamonso mpuu! I Pue anu motudu malaekaNa mai mopawia aku lako i kuasa ni Herode ai lako i ope-ope anu ratunggai nu toYahudi si aku.” 12 Roo awetu, laumo i Peturu i tombi ni Maria, tina ni Yohane anu rauli mbui i Markus. I tombi etu, mawori sira tau terusu mekakae. 13 Mewali, i Peturu motangkudodoo boboka i tombi etu. Laumo sadua towawine anu mobago i se etu, sangana i Rode, ina mobungkasika ia boboka. 14 Awetu naepe wotu ni Peturu, matono mpuu ia. Nakeningkatonona, baria kasaliu nabungkasi boboka, agaiana maligada ia mesola lau i rara nu tombi, mpane nauli, “I Peturuda wei, anu ria i boboka!”
15 Raulikara towawine etu, “Magila iko!” Agaiana napaliliu ngkida pololitana anu manguli ka i Peturuna anu ria i boboka. Etumo mpane raulikara, “Baria i Peturu eti. Malaeka anu mokampai iada.”
16 Mewali, tongo ni Rode lau i rara nu tombi, i Peturu mopapulo liliu potangkudodoona boboka. Roo awetu, rabungkasika mpuumo ia boboka, mpane raitaramo i Peturu. Tingkara mpuu sira. 17 Lako ni se etu, i Peturu moona palena mopakandii sira, mpane napololitaka sira adiwa dala ni Pue mampopensuwu ia lako i rara nu petarunggua. Napasopo ni Peturu pololitana, mpane naperade nauli, “Apa anu mewali etu, nipadongka si Yakobu ai i pokata anu ntanina.” Roo awetu, mangokamo i Peturu lau i pearia ntanina.
18 Ewa ineilena madondo, mewalimo sambua posisala i olo nu surudado anu mokampai. Rapowulira ba apa anu mewali si Peturu. 19 I Herode motudumo tau mangkadelo i Peturu, agaiana baria rasumbara. Etumo mpane i Herode motudu mbuimo bona surudadona anu mokampai i Peturu raparesa sira mpane rapopate. Roo awetu, i Herode lambu lako i tana Yudea lau meari i kota Kaisarea.
I Herode mamate
20 Sambela tempo, maruminsi karumpu ni Herode i tau anu meari i kota Tirus ai i Sidon. Etumo mpane tumpu boea aretu mogombo sira. Pogombora etu, rabotusira bona sadua tau ratudu lau i kota Kaisarea modame ai i Datu Herode, lawi toTirus ai toSidon aretu mansumba sira pangkonira lako i tana anu naparenta ni Herode. Mpolinguruna tumpu boea aretu mosuweki rara nu sadua topokadipuraka anu napotuu ni Herode, sangana i Blastus, bona lau ia mamporangai sira modame ai i Herode. 21 Mewali, ni eo anu rapakanoto, i Herode mesampi datu mpane momeso i pomesoa kadatua, mpane mololita i tau wori. 22 Monganga-ngangamo sira tau wori motoia i Herode, raulira, “Pololitana ei baria lako i manusia, agaiana pololita nu pue anu tapenombai!” 23 Nakenimpampemabosena, baria ia motudu tau bona motoia i Pue Ala, agaiana napatumbeika ope-ope tau motoia wotona. Etumo mpane nasuku ia nu malaeka ni Pue, mewali maruminsi kamaduana lawi kekalindoro wotona duduuna mamate.
24 Ni tempo etu, tetambaimo tau anu mampetingai Ngkora ni Pue, ai tetambai mbuimo kaworira anu mepotuu si Yesu.
25 Roomo bago ni Baranaba ai i Saulu i Yerusale, mesolamo sira lau i Antiokia, mpane mangkeni mbui sira i Yohane anu rauli mbui i Markus simbela-mbela ai sira.