Pampelisi pitu dua diaken
6
1 Kasae-saeaa kalalaua tetambaimo tau anu meula si Yesu. Ni tempo etu, ope-ope tau anu mepotuu si Yesu, toYahudi ngkida sira. Agaiana santongo sira mobasa Yunani, mpane santongo mbui sira mobasa Yahudi. Anu mobasa Yunani, modeade sira mosalai rangara anu mobasa Yahudi, raulira, “Towawine anu bemba sira, anu ria si kami baria sira mansumba kirara lako i apa anu rakira-kira eo-eona i topesiasi.”2 Etumo mpane suro ni Pue Yesu anu sampulu rodua moronde ope-ope tau anu mepotuu si Yesu bona terusu sira, mpane raulika sira, “Baria malompe nakenimpokadipurakaki pokira-kira pangkoni, mengkaroo kami mobambari Ngkora ni Pue Ala. 3 Mewali, poka-poka, aginamo nipelisi lako i olomi pitu dua tau anu malompe babeiara, anu nakuasai nu Inosa Magali ai anu matopa. Bona sira anu kikiraka mokadipuraka pokira-kira pangkoni etu. 4 Lawi kami sangangaa mekakae ai mobambari liliu Ngkora ni Pue Ala.”
5 Lolita nu suro aretu rapokonora ope-ope. Etumo mpane i Setepanu anu rapelisi lawi mepotuu mpuu ia si Pue Yesu ai nakuasai ia nu Inosa Magali. Anu rapelisi mbui: i Pilipu, i Prokorus, i Nikanor, i Timon, i Parmenas ai i Nikolaus toAntiokia. (I Nikolaus etu, baria toYahudi, agaiana mesuamo ia agama Yahudi.) 6 Tau anu pitu aretu rakenimo sira lau i suro ni Pue Yesu, mpane suro aretu moona palera i wongko woo nu tau aretu, mampekakaeka sira bona nawati ni Pue Ala.
7 Lako ni se etu, tetambaimo tau anu mampetingai Ngkora ni Pue Ala. Tetambaimo kaworira tau anu mepotuu si Yesu i Yerusale, mpane mawori mbui tadulako menomba matundu ai mepotuu sira si Pue Yesu.
I Setepanu rasoko
8 I Setepanu nawati mpuu ni Pue Ala ai nakiraka kuasa. Etumo mpane nabuku mobabei maisi mpangkana tanda kuasa anu mewulii i lio nu tau wori. 9 Agaiana ria mbui sira anu moewa ia. Topeewa aretu penombaara i tombi penombaa anu rasanga Libertini (lempona: tombi nu tau anu rapawia lako i karapobatuara). Sira aretu, toYahudi anu lako i kota Kirene, Aleksandria, propinsi Kilikia ai Asia. Mai sira moewa ai mampombeseseka i Setepanu. 10 Agaiana baria rabukura mobesoi apa anu nauli ni Setepanu, lawi Inosa ni Pue Ala mopakatopa i Setepanu mololita. 11 Etumo mpane lau ngkidamo sira mosuweki rara nu basangkia dua tau, bona mopatunda sira lolita anu mosalai i Setepanu, raulira, “Kiepe mopakoi ia Atura ni Musa ai mopakoi i Pue Ala!”
12 Awetu raepe nu tau wori pololitara anu mesalai etu, marumpu mpuumo sira simbela-mbela ai tadulako nu toYahudi ai guru-guru agama, mpane laumo sira mosoko i Setepanu bona rakeni i lio nu topobotusi kara-kara. 13 Kadongkara i se etu, mangkeni mbui sira basangkia dua tau anu rapatuduramo mewali sabi dongko. Rauli nu sabi aretu, “Tau ei mopakoi liliu Tombi ni Pue Ala ai mopakoi Atura ni Musa! 14 Kiepe ia manguli ewa ei: I Yesu anu lako i Nasare ina mogero Tombi ni Pue Ala mpane mobaliki ope-ope ada anu nakiraka kita ni Musa.” 15 Ope-ope tau anu mai i peparesaa nu topobotusi kara-kara nu toYahudi etu, mototoki sira i Setepanu. Ni tempo etu lio ni Setepanu raitara ewa lio nu malaeka.