Pololita ni Setepanu
7
1 Mekunemo Tadulako Menomba Mabose si Setepanu, nauli, “Ba mamonso mpuu apa anu rauli nu tau aretu?”2 Nasonoi ni Setepanu, “Uma-uma ai poka-poka! Nipetingai sala pololitaku! Ni banimpia, ulububuta i Burahima meari i tana Mesopotamia. Lako baria mani ia melimba lau i kota Haran, i Pue Ala anu mabose kuasaNa mongkora si ia, 3 Naulika: ‘Nupalengimo tanamu ai pokamu. Laumode i tana anu ina kutudoka iko.’ 4 Etumo mpane i Burahima mopalengi tana nu toKasdim lau meari i kota Haran. Ni kota etu, matemo tuama ni Burahima. Mpane roo awetu, i Pue Ala motudu mbuimo i Burahima melimba i tana ei, anu tapeariimo ei-ei. 5 Ni tempo etu, mogalo saudi baria ria tana anu rakiraka i Burahima. Agaiana i Pue Ala modandimo si Burahima, Nauli: ‘Tana Kanaan ina Kukiraka iko dongka-dongka i pemuleamu.’ Ni tempo etu, baria mani ria anana. 6 Agaiana nauda baria mani ria anana, nauli ni Pue Ala si Burahima ewa ei: ‘Pemuleamu ina meari sira i tana nu tau ntanina. Ina rapobatua sira nu tumpu boea i tana etu ai ina rapopesiasi sira i rarana iba atu mpaena. 7 Agaiana roo awetu, ina Kusuku tumpu boea anu mampobatua pemuleamu, mpane pemuleamu ina lambu sira lako i tana etu, mai menomba si Aku i se ei.’ 8 Lako ni se etu, i Pue Ala mopakanoto dandiNa si Burahima ai sambua tanda petindi. Mewali awetu i Isaki ana ni Burahima rapoanaka, i Burahima mampopetindi i Isaki ni eo kawalu lako i eo karapoanakana. Awetu mbui, i Isaki motindi i Yako anana. Ai i Yako motindi anana anu sampulu rodua. Mpane sira aretu anu mewali ulububu nu toSaraeli.”
9 Nauli mbuimo ni Setepanu i tadulako etu, “Ulububuta toSaraeli, masina sira si Yusupu pokara, etumo mpane rapobalu i Yusupu bona rapobatua i tana Masiri. Agaiana kuasa ni Pue Ala baria sambela mopalengi i Yusupu, 10 mpane kasopoana i Yusupu Napawiamo lako i ope-ope kaparina. I Pue Ala mokiraka katopa si ia anu mopakatono rara ni Pirao, datu i tana Masiri, duduuna i Pirao moongko ia mewali gubernur i tana Masiri, ai topeparenta i tombi kadatua ni Pirao. 11 Roo awetu, dongkamo oro ntede i sumalele tana Masiri ai i tana Kanaan. Ni tempo etu, mawori tau mantodisa, awetu mbui ulububuta toSaraeli bariamo ria pangkonira. 12 Lako ni se etu, naepe ni Yako, ria pobae gandu anu rapobalu i tana Masiri. Etumo mpane natudumo sira anana lau i Masiri mobaluki pangkonira. Ni tempo etumo kalaura anu mpolinguruna. 13 Kalaura anu karombelana, i Yusupu mopakanotoka sira pokana ka ianamo pokara. Ni tempo etumo, lako nainsanida ni Pirao kariana poka-poka ai tuama ni Yusupu. 14 Roo awetu, i Yusupu mopakatu bambari lau si Yako tuamana, naperade bona tuamana ai ope-ope pokana melimba sira i tana Masiri. Kaworira tau anu melimba lau i Masiri, pitu mpulu lima dua. 15 Mewali, melimbamo i Yako i tana Masiri, mpane meari i se etu duduuna mamate ai pemuleana anu rauli ulububuta toSaraeli. 16 Mpane wukura rakeni mpesola i boea Sikem i tana Kanaan, mpane rapaiwu i rara nu talumba anu nabaluki ni Burahima ai doi pera lako i pemulea ni Hemor.
17 Awetu gompimo tempona i Pue Ala mopabukei dandiNa si Burahima. Mewali, kalalaua memule-mulemo sira ulububuta toSaraeli i tana Masiri duduuna mawori mpuu sira. 18 Kasopoana, ria sadua datu anu meparenta i tana Masiri anu baria manginsani kaimana i Yusupu. 19 Datu etu mopakasusa katuwu nu ulububuta toSaraeli ni banimpia, mpane mampopesiasi sira. Natudu sira motende analeira bona mamate. 20 Ni tempo etu, rapoanakamo i Musa. I Musa etu, sadua analei anu makara mpii. Tolu mbula ngkida ia rakadipuraka nu tomanana, mpane ratenderamo. 21 Analei anu ratende etu, naalamo nu anantowawine ni Pirao mpane nakadipuraka ewa anana saduduana. 22 Nakeningka nakadipurakana, i Musa rapaguru i sinangka kapandera toMasiri, duduuna makuasa mpuu ia i rara mpololitana ai i pangkeniakana.
23 Sondomo iba mpulu mpae tinuwuna, riamo tunggaia ni Musa mosondaki singka toSaraelina. 24 Ni tempo etu, naitamo sadua toSaraeli anu narurugii nu sadua toMasiri. Mewali laumo i Musa mamperurui pokana duduuna mampopate toMasiri etu. 25 Nauli nu rara ni Musa, batena rainsani nu pokana sira ka iana anu napelisi ni Pue Ala mopawia sira lako i karapobatuara. Agaiana kamonsona baria rainsanira.
26 Ewa ineilena, naita mbuimo ni Musa rodua toSaraeli anu mombetie. Nakeningka napenokana mopasintuwu sira, etumo mpane naulika sira: ‘Mangkiada mpane mombetie komi? Komi ei topopoka.’ 27 Agaiana sadua anu morurugii rangana etu, moruko i Musa, nauli: ‘Ima anu moongko iko mewali tadulako anu mobotusi kara-karaki? 28 Inee mpuupae nupenoka mbui mampopate aku, ewa pampopatemu toMasiri ni wengi?’ 29 Awetu naepe ni Musa tewungkesimo babeiana, mewali melangkamo ia lako i tana Masiri lau meari i tana Midian. Tempona ni se etu, mosambokomo ia, mpane memule ia rodua anana.
30 Iba mpulu mpaena lako ni se etu, tongo ni Musa i pada lori gompi i Bulu Sinai, ungangkidamo niitana malaeka mampatongawa si ia i rara nu apu anu mambugi, i rara nu owo anu modui. 31 Matingkara rara ni Musa mangita apa anu mewali etu, etumo mpane laumo nagompilisi, napenoka nainsani ba apa. Ungangkidamo, naepemo wotu ni Pue Ala anu manguli: 32 ‘Akumo i Pue Ala anu rapenombai nu ulububumu. Akumo i Pue Ala anu napenombai ni Burahima, i Isaki ai i Yako.’ Awetu naepe ni Musa wotu etu, moradamo ia nakeningkaekana, ai bariamo ia pebai mototoki apu anu mambugi etu. 33 Roo awetu, nauli mbuimo ni Pue Ala si Musa: ‘Wonsui kandupamu, lawi tana anu nupeongkoi etu, tana anu magali. 34 Kuitamo pantodisara anaKu toSaraeli i tana Masiri. Kuepemo pekakaera. Etumo mpane mendolu Aku mai mopawia sira. Mewali maingko, ina Kutudu iko lau mpesola i tana Masiri, bona nupawia sira toSaraeli.’”
35 Napaliliumo ni Setepanu pololitana i tadulako aretu, nauli, “Mewali, i Musa anu rasapuaka nu toSaraeli ni banimpia, iamo anu natudu ni Pue Ala mesola lau mopawia sira. Mpolinguruna toSaraeli aretu mangulika ia: ‘Ima anu moongko iko mewali tadulakoki anu mobotusi kara-karaki?’ Agaiana kasopoana, iada anu naronde ni Pue Ala ni tempona sadua malaeka mampatongawa si ia lako i rara nu apu anu mambugi, i rara nu owo anu modui. Iamo anu naongko ni Pue Ala mewali tadulako nu toSaraeli anu mopawia sira lako i karapobatuara. 36 I Musa etu anu motadulakoi toSaraeli lako i tana Masiri, ai anu mobabei maisi tanda kuasa anu mewulii i polumakoara, ai anu mobabei mbui tanda kuasa anu mewulii i tana Masiri, i Tasi Mawaaga ai i pada lori i rarana iba mpulu mpae kasaena. 37 Ai i Musa mbui anu mopadongka lolita ei i toSaraeli, nauli: ‘I Pue Ala ina moongko sadua lako i pokami. Ina Napopewali nabi ia, ewa aku ei.’ 38 I Musa etumo anu motadulakoi toSaraeli anu mawori i pada lori. Simbela-mbela ia ai ulububuta toSaraeli ni banimpia, ai ia mbui anu mangepe lolita nu malaeka i Bulu Sinai, mpane napadongkaka kita toSaraeli. Iamo anu modoko Ngkora katuwu lako si Pue Ala, bona rapadongka si kita toSaraeli.
39 Agaiana, nauda ewa etu, ulububuta toSaraeli ni banimpia baria raundera mengkoru si Musa. Mosapuakamo sira petadulakoina, ai raundera mesola i tana Masiri. 40 Mewali, etumo mpane laumo sira si Haruni, powutu ni Musa, raulikara: ‘Nubabeika kami anitu-anitu anu pensani kipenombai, bona lense etumo anu mewali tadulakoki. Lawi bariamo kiinsani apa anu mewali si Musa anu mangkeni kami mai lako i tana Masiri ni banimpia.’ 41 Lako ni se etu, mobabeimo sira watu anu ewa lense nu ana japi. Rapenombaira mpane rasambalekara binata. Mosusamo sira motoia apa anu rababeira ai palera. 42 Etumo mpane i Pue Ala mopalengimo sira ai mampogeakamo sira menomba i betue i langi. Etu mewali mangula lolita ni Pue Ala anu teuki i rara sura nu nabi-nabi, ewa ei:
‘Komi toSaraeli! Baria Aku anu nisambaleka binata anu nipopenomba tongomi i pada lori i rarana iba mpulu mpae.
Agaiana i maisi mpangkana anituda anu nipenombai.
43 Anu nikeni-keni iamo tombi pearia nu anitu Molok
ai mpinowali anu molense betue Repan.
Lense etumo anu nibabei bona nipenombai.
Etumo mpane ina Kupogeaka mpuu komi ratawani,
duduuna rakeni komi dongka i sambuteka kota Babeli.’” (Amos 5:25-27)
44 Lako ni se etu, i Setepanu mopaliliumo pololitana, nauli, “Tongora ulububuta i pada lori, i Pue Ala motudumo i Musa mobabei Bambaru Penombaaa. Bambaru Penombaa etu mewali sambua tanda kariana i Pue Ala i olora toSaraeli, mpane rababei mangula apa anu napopeitaka ni Pue Ala si Musa. Mewali, Bambaru Penombaa etu rakeni-keni liliu nu ulububuta ni banimpia tongora i pada lori. 45 Masae-sae, mamate sira ulububuta i pada lori, mpane Bambaru Penombaa etu rakeni liliu nu anara mesua i tana Kanaan ei. Roo awetu, i Yosua mangkenimo ulububuta sira mampemala tanara anu tapearii ei-ei. Ni tempo etu, i Pue Ala mampopeloso tumpu boea i tana Kanaan. Bambaru Penombaa nu toSaraeli ria mani i olora duduuna dongka ni tempona peparenta ni Datu Daudi. 46 I Daudi mopakatono rara ni Pue Ala, mpane merade si Pue Ala bona napaliu mowangu tombi penombaa si Pue Ala anu napenombai ni Yako ni banimpia. 47 Agaiana baria i Daudi anu mowangu tombi ni Pue Ala. Ananada anu rasanga i Salomo, iada anu mowangu.
48 Poka-poka, melumbu kuasa ni Pue Ala lako i ope-ope anu rapenombai. Baria Ia meari i tombi anu nababei nu manusia. Lawi i rara sura nu nabi ni banimpia, teuki ewa ei:
49 ‘Langi iamo pomesoaKu,
mpane dunia pelongkoaKu.
Tombi apa anu nipenoka niwanguka Aku?
Imba tombi anu sintoto Kupearii? Baria ria.
50 Lawi Aku anu mampopewali sinangkana!’” (Yesaya 66:1-2)
51 Napasopomo ni Setepanu pololitana i tadulako agama, naulika sira, “Maruminsi pengkabatumi ai maruminsi pembongomi! Maruminsi pengkadoiomi mampetingai lolita ni Pue Ala! Komi simbela ai ulububuta ni banimpia, lawi mosapuaka liliu komi Inosa Magali. 52 Ope-ope nabi ni banimpia rapopesiasi nu ulububuta. Ai ulububuta mampopate mbui sira suro-suro ni Pue Ala, anu manguli kaina dongkana Tudua ni Pue Ala anu manoto, iamo i Yesu. Ei-ei, komi anu mampobalu Tudua ni Pue Ala i iwaliNa. Komimo anu mampopate i Yesu. 53 Nidokomo parenta ni Pue Ala anu rapadongka nu malaeka i ulububuta, agaiana baria nipeulai.”
I Setepanu rapopate
54 Awetu raepe nu topobotusi kara-kara aretu lolita ni Setepanu, madaa rarara ai marumpu mpuu sira. 55 Agaiana i Setepanu anu nakuasai nu Inosa Magali, motirangai langi. Mewali naita mpuumo peawa ni Pue Ala, mpane naita mbui i Yesu meongko mbai i kuana ni Pue Ala. 56 Nauli ni Setepanu, “Peita! Kuita boboka i suruga tebungkasi ai Ana Manusia meongko mbai i kuana ni Pue Ala!”
57 Roo awetu, topobotusi kara-kara aretu motukomo sira talingara, bona ntena raepera lolita ni Setepanu, mpane monganga-nganga sira masisimbuku, ai kasaliu lau rasokora ia. 58 Radiira ia lau i raoa nu kota mpane rawatuira. Ai sabi aretu anu mosalai i Setepanu, molonsumo sira badura mpane rabolira gompi i paa nu sadua tomoane anu rasanga i Saulu, mpane mowatui sira i Setepanu. 59 Tongo ni Setepanu rawatui, mekakae ia, nauli, “Pue Yesu, dokomode inosaku!” 60 Roo awetu, molingkudumo ia, nauli masisimbuku, “Pue, inee sira Nusuku nakeningkamadosara ei.” Awetu roomo ia mololita ewa etu, mamatemo ia.