8
1 I Saulu mampokatono mbui karapopatena i Setepanu etu.I Saulu mampopesiasi tau anu mepotuu si Yesu
Ni eo etu, mepuumo ope-ope topepotuu si Kerisitu anu ria i Yerusale rapopesiasi mpuu sira, duduuna masawu sira i sumalele tana Yudea ai Samaria. Batena ngkidamo suro ni Pue Yesu anu baria sira melangka. 2 Basangkia dua tau anu mengkoru si Pue Ala mangala wotowata ni Setepanu. Nakeningkawiorana mpii rarara, etumo mpane ratumangisira wotowatana, mpane lako rapaiwurada.
3 Agaiana ni tempo etu, i Saulu mopari-pari mampopesiasi liliu tau sira anu mepotuu si Kerisitu. Ope-ope tombira nasuaki, mpane ope-ope tau anu mepotuu si Kerisitu, malompe tomoane awetu mbui towawine, nasoko sira mpane nakeni sira lau natarunggu.
I Pilipu i Samaria
4 Mewali, topepotuu anu masawu sira aretu, siramo anu mopadongka Bambari Malompe imba-imba ngkida kalauaara. 5 Awetu mbui, i Pilipu laumo i sambua kota i tana Samaria mopadongkaka sira ka i Yesuna Datu Topesorema. 6 Tumpu boea aretu mampetingai lompe-lompe lolita ni Pilipu ai mototoki lompe-lompe tanda kuasa anu nababei, mewali etumo mpane rapotuura ia, 7 lawi mampopeloso ia seta lako i tau wori sira anu napesuangi nu seta, duduuna seta aretu meloso sira ai monganga-nganga. Mawori mbui tau anu mapalu ai anu mawara paara napakaosa ni Pilipu. 8 Matono mpuumo sira tumpu boea mangita apa anu mewali etu.
9 I rara nu kota etu, ria sadua tomoane anu rasanga i Simo. I Simo etu, sadua topopanginsani, masaemo mampopetudoka panginsanina anu metingkarai i toSamaria. Nauli ka iana tau anu mabose kuasana. 10 Mewali ope-ope tumpu boea aretu, mampotuu ia, malompe tuana awetu mbui tau wori, raulira, “I Simo etu, ria kuasa ni Pue Ala si ia anu rasanga Kuasa Mabose.” 11 Ope-ope tumpu boea mampotuu ia, lawi masaemo rapowulira mangita panginsanina. 12 Agaiana kadongka ni Pilipu i boeara, mopadongka ia bambari kono i peparenta ni Pue Ala. Mpane napatuduka sira ka i Yesuna Datu Topesorema, duduuna mawori tomoane ai towawine mepotuu si Yesu, mpane mampoperiu sira. 13 Lako ni se etu, i Simo mepotuumo mpane rariu. Awetu roomo ia rariu, meula liliumo ia si Pilipu, lawi tingkara rarana mangita tanda kuasa anu nababei ni Pilipu.
14 Roo awetu, suro-suro ni Pue Yesu anu ria i Yerusale raeperamo bambari kono i podoko nu toSamaria Ngkora ni Pue Ala. Etumo mpane moparentai ngkidamo sira i Peturu ai i Yohane lau i Samaria. 15 Kadongka ni Peturu ai i Yohane, mampekakaekamo sira toSamaria anu mepotuu si Pue Yesu, bona nakuasai sira nu Inosa Magali, 16 lawi Inosa Magali baria mani mokuasai sira. Rariu ngkida sira i rara nu sanga ni Pue Yesu. 17 Mewali i Peturu ai i Yohane mampekakaeka sira ai moongko palera i wongko woo nu toSamaria aretu. Mewali mepuu lako ni se etu, nakuasaimo sira nu Inosa Magali.
18 Naita ni Simo, ima-ima anu napaga ni Peturu ai i Yohane, sira aretu anu nakuasai nu Inosa Magali. Etumo mpane i Simo mangkenimo doi lau si Peturu ai si Yohane, 19 naulika sira, “Kiraka kowo aku kuasami etu, bona ima-ima ngkida anu kupaga, tau etu ina nakuasai nu Inosa Magali.”
20 Agaiana nauli ni Peturu si ia, “Masurewu iko simbela-mbela ai doimu! Ba nipenokamupae, pewati anu lako si Pue Ala ba kamakuasa nu Inosa Magali, pensani rabaluki ai doi? 21 Baria iko sintoto mobago simbela-mbela ai kami, lawi baria manoto raramu si Pue Ala. 22 Penonsomode lako i tunggaiamu anu madaa etu, mpane mekakae iko si Pue bona Naampuni tunggaia nu raramu anu madaa. 23 Lawi kuita masina mani raramu, ai tetaka iko i babeiamu anu madaa.”
24 Nauli ni Simo si Peturu ai si Yohane, “Nipekakaeka kowo aku si Pue bona baria aku narumpa nu karopu anu nuuli etu!”
25 I Peturu ai i Yohane mampololita ai mobambari Ngkora ni Pue. Roo awetu, mesolamo sira lau i Yerusale, i polumakoara, mobambari sira Bambari Malompe i boea-boea i tana Samaria.
I Pilipu ai toEtiopia
26 Ria sadua malaeka ni Pue anu mobambari lolita ei si Pilipu, nauli, “Lau iko mbai monsau i dala anu lako i Yerusale dongka i Gasa.” (Dala etu bariamo paka rapolumakoi.) 27-28 Lau mpuumo i Pilipu monontosi dala anu naulika ni Pue. Ni tempo etu, ria mbui sadua toEtiopia anu moliu i dala etu mesola lau i boeana. Tau etu, mawane lantina lawi ia anu mopatoro sinangka isi nu tombi nu datu towawine i tana Etiopia. (Datu towawine etu rasanga Kandake.) Awetu roomo toEtiopia etu menomba si Pue Ala i Yerusale, mensawimo ia i kareta anu nadii nu dara mpane mesola lau i boeana. Tongona momeso i rara nu karetana, mobasa ia sambua sura anu nauki ni nabi Yesaya ni banimpia. 29 Ni tempo etu, Inosa ni Pue Ala mangulika i Pilipu, “Lau nugompilisi kareta etu.” 30 Lako ni se etu, kasaliu lau mpuumo i Pilipu i kareta etu. Awetu ia dongka, naepe tau etu mobasa lako i sura ni nabi Yesaya. Napekune ni Pilipu, “Tua, ba nuinsani lempona anu nubasa etu?”
31 Nasonoi nu tau etu, “Adiwa ka kuinsanina, lawi baria ria tau anu mopakanotoka aku.” Roo awetu, toEtiopia etu mobawaimo i Pilipu mempone i rara nu karetana bona momeso simbela sira. 32 Eimo lolita anu nabasa nu toEtiopia etu, lako i sura ni nabi Yesaya:
“Ia ewa sambaa dimba anu rakeni lau rasambale.
Ia ewa sambaa ana dimba anu ragundi wuluna agaiana baria mobee-bee;
mandii-ndii ngkida.
33 Rakaisii lolita Ia mpane rasuku;
baria sintoto pesuku etu rakiraka Ia.
Baria ria sadua tau anu pensani mololita kono i pemuleaNa,
lawi rapopate Ia.” (Yesaya 53:7-8)
34 Lako ni se etu, mekunemo toEtiopia si Pilipu, nauli, “Ulika aku ba ima anu natunggai nu nabi etu, ba wotona saduduana ba tau ntaninada?” 35 Mewali, mepuu lako i apa anu nibasa nu toEtiopia ni mpongone, i Pilipu mopatuntuka Bambari Malompe kono si Yesu. 36 Tongora mokareta, mangitamo sira ue mbai i liora. Nauli nu toEtiopia etu si Pilipu, “Peita, si dou ria ue. Ba pensani aku nuriu?”
37 [Nasonoi ni Pilipu, “Ane nupotuu mpuumo, pensani iko kuriu.”
Nauli nu toEtiopia etu, “Kupotuu i Yesu Kerisitu Ana ni Pue Ala.”]
38 Lako ni se etu, napopengkaroomo nu karetana, mpane mendolumo sira lau i rara ue, mpane toEtiopia etu nariumo ni Pilipu. 39 Pensorera lako i rara ue, nakenimpokale nu Inosa Magali ungangkidamo i Pilipu bariamo ia naita nu toEtiopia etu. ToEtiopia etu, mopaliliumo polumakoana ai matono mpuu rarana. 40 Ai ni tempo etu, ungangkidamo i Pilipu raita i kota Asdod, mpane mesolamo ia lau i kota Kaisarea. I tongo dala, mobambari liliu ia Bambari Malompe i ope-ope kota anu napoliungi.