KÛGWÛRÎRWA
Mantû ma îbuku rîrî
Îbuku rîrî rîandîkirwe i Njoana ûra aarî ûmwe wa atûmwa ba Yiesû. Njoana akîandîka îbuku rîrî aarî mûkûrû ûmûkûûrû. Aarîandîkire kagiita kara Akîrîstû baanyamaaragua mûno n'ûntû bwa wîtîgio bwao kîrî Mwathani Yiesû Kîrîstû. Kagiitaani gaku Njoana aagwetwe aateegwa gîcîgîîrioni kîa îria gîetagwa Patimos (Gîcu. 1:9). Gîtûmi kîongwa kîa îbuku rîrî, i kûûmîîria Akîrîstû na kûbeekîra wîru, na kûbeera barûmîîre wîtîgio bwao kinya îgiita rîa kûnyamaarua. Gûtirî îbuku rîngî Bibiriani rîgweteete kîthaarimo kîrî ûra akaarîthooma tatiga rîrî (Gîcu. 1:13).
Îbuku rîrî rîanjîîrîîtie na kîoneki kîra Njoana oonire gîa Kîrîstû, amwîra ntûmwa kîrî makanica mûgwanja, mara maarî nthîgûrû ya Îcia, akubî na naagu Njoana aarî. Ntûmwa îra Njoana eerirwe yakoneetie bûra Akîrîstû babatîîrue bainyîkîria kagiita ga kûnyamaara, beethuuranîrîte n'ûntû bwa gûcooka kwa Mwathani. Kuuma agu Njoana oonua mantû mwanya mwanya na njîra ya ngerekano, mara meengeerie gûkarîka nthîgûrû. Yerekeeria rîa mantû mamu Njoana ooniirue, rîarî kwonania atî ûnene bwa Nkoma gûkû nthîgûrû bûkeebuumîria bûrûe na ûnene bwa Kîrîstû na athingati baake. Bionekiini mûtongoria wa ûnene bûbu arîîtwa “Nyamû” (Gîcu. 13). Kûrîonekana nyamû înu îgeetîgîîrua i Ngai înyamaarie antû baake kwa îgiita rîgana ûna, rîru Ngai amîthirie kûrû. Na mûthiani Ngai agaakûûra antû baake batige kûnyamaara na athirie gîkuû îgiita rîra bara bakuû bakaariûkua, (Gîcu. 20). Na kuuma agu antû ba Ngai bagaatûûrania tene na tene na Ngai wao na Yiesû Kîrîstû mûciî wa Ngai, ta uu ûgwîtwa Njerusaremu înjerû, (Gîcu. 21, 22). Îndî eeyia bakeewa îkaanûkia rîa tene na tene.
Îbuku rîrî rîthirîîtie na kîrumi kîrî muntû ûra akoongeera kana akaagaûra mîgambo îno yandîkîîtwe gûkû, (Gîcu. 22:18-19). Na mûthiani buru twîrîîtwe Mwathani Yiesû neengeerie gûcooka. (Gîcu. 22:20.)
Gwookubî îbuku rîrî rîkari ûûgû:
Kwîmenyithania kwa Mwandîki, nkeethi, na mîgambo ya gûkumia Ngai, (1:1-8)
Njoana oona Yiesû Kîrîstû na njîra ya kîoneki, (1:9-20)
Baarûa kîrî makanica mûgwanja, (2:1-3:22)
Na njîra ya kîoneki Njoana oona Ngai na Kîrîstû barî îkenero, (4:1-14)
Îbuku rîarûmûrwa mûûra ûra warîrûmanîîrîîtie, rîagwûrua (5:1-8:1)
Tûrumbeeta mûgwanja twaringwa, (8:2-11:19)
Irundurundu bia magegania, (12:1-14:20)
Mîthûmba mûgwanja ya mbakûri cia mûthûûro wa Ngai yeetûûrwa, (15:1-16:21)
Îrwaya rîetagwa Mbabironi rîagiitîrwa îgamba, (17:1-19:10)
Ndûa ya mûthia îra îkaarwîgwa mûthiro wakara gûkinya, (19:11-21)
Ntugû ya mûthia îra antû bakaagiitîrwa îgamba na kûriûkua kwa bara bakuû, (20:1-21:8)
Njerusaremu înjerû kuuma îgûrû, (21:9-22:5)
Mîgambo ya mûthia na kîthaarimo, (22:6-21)