Njerusaremu înjerû
21
1 Rîarî îgûrû rîîyerû na nthîgûrû înjerû n'ûntû îgûrû rîra rîkûrû na nthîgûrû îra nkûrû i biarî bikûûra na îria rîene. 2 Ndoonire taûni îra ntheru, ta yo Njerusaremu înjerû yeendamua kuuma îgûrû kîrî Ngai. Yathuuranîrîtwe yakara ta bûra mwiki athuuranagîrwa eeteereete mûgûrani. 3 Kayû kara ndeegiirue kaaria kuuma gîtîîni kîa ûnene, kaariirie na inya kauga, “Îîndî ûtûûro bwa Ngai bûrî kîrî antû, Ngai agaatûûrania nabo. Ûkeegua barî antû baake, na Ngai we wengwa akeegagua arî amwe nabo arî Ngai wao. 4 Ngai akabagiria meethori. Ûtiîgua kûrî na gîkuû kaîrî, kana kîeba, kana kîrîro, kana ûrûrû. Mara makûrû monthe ûkeegua magûkûrûka.”5 Ûra aakarîrîîte gîtî kîa ûnene auga, “Raitha wone! Ndîgarûra mantû monthe matuîke maayerû!” Ambîîra, “Andîka ûgu n'ûntû mîgambo înu n'ya gwîtîgîka na n'ya mma.”
6 Ambîîra, “N'ûgu îîndî. I niû Alfa na Omega,a Mwanjîîrio na Mûthia. Ûra arî na bûûta, eenda nkamûkuundia rûûyî rwa kînyaka kîa mwoyo, gûtarî kîo akûûrua, 7 ûra akaûmbana. Ngaatuîka Ngai wake n'we atuîke mwana wakwa. 8 Îndî i guaya, bara batarî wîtîgio, bara barûthaga mantû mara mataankenagia, aûragani, bara barutaga ngûgî cia ûmaramari, arogi, bara bagongaga ngai cia ûrongo, na bara bonthe baaragia ûrongo, babu bonthe bakaagerwa îriani rîra rîa mwanki wa ûbiriti, ta rîo îkua rîa maîrî.”
9 Ûmwe wa araîka bara mûgwanja, bara baarî na mbakûri ira mûgwanja ciaûyûri inyamaara bira mûgwanja bia mûthia, aaya ambîîra, “Ncû nkwonie mwiki, mwekûrû wa Kagondu.” 10 Aanthûkia na njîra ya gîîkîrundu aambira kîrîmaani kîîraaya, kîînene. Aambonia taûni îra ntheru, ta yo Njerusaremu, îîndamîîte kuuma îgûrû kîrî Ngai, 11 îgîkengakengaga i mwago wa Ngai na îgîyicaga ta kaiga ka goro geetagwa njacipa, îkembûkîîte ta kîyici. 12 Yairigîrîtwe na rûthingo rûûkamu, rûraaya. Rûthingo rûru rwarî na mîîrîga îkûmi na îîrî. Kîrî wa kîra mwîrîga i kwarî na mûraîka. Na wa kîra mwîrîga kîrî mîîrîga înu, i kwandîkîîtwe rîmwe rîa mariîtwa ma mîîrîga îra îkûmi na îîrî ya Isiraeri. 13 Na wa kîra mbarî kîrî nteere cia rûthingo rûru irî inya, i kwarî na mîîrîga îthatû, îthatû. 14 Rûthingo rûru rwakîîtwe mûcingiini wa maiga îkûmi na maîrî. Na wa kîra iiga rîa mûcingi irîandîkîîtwe rîmwe rîa mariîtwa mara îkûmi na maîrî ma atûmwa bara îkûmi na baîrî ba Kagondu.
15 Mûraîka ûyu aaragia naani naagwete mûraagi wa thaabu wa kûthima gîntû. Warî wa kûthima taûni înu, mîîrîga yaayo na nthingo ciayo. 16 Mûraîka ûyu aathima taûni înu na mûraagi ûyu. Wariî na ûraaya bwa mbarî cia taûni înu irî inya, i bwaganeene. Ûraaya na wariî bwa yo bwarî bwa mairi ngiri îmwe na magana mataano. Wana gwîtia îgûrû nwabu yagana ûgu. 17 Aacooka kaîrî aathima rûthingo. Na kûringana na kîthimi kîra aatûmagîra, rwarî rwa ûraaya ta bwa biiti magana maîrî, gwîtia. 18 Rûthingo rûru rwakîîtwe na njacipa. Taûni yaakîîtwe na thaabu îtaunganîîtue na gîntû kîngî, îra nkembûku ta kîyici. 19 Maiga mara îkûmi na maîrî ma mûcingi maagemeetue na twiga twa goro twa mîthemba yonthe. Iiga rîa mbere rîagemeetue na njacipa, rîa maîrî na cabire, rîa mathatû na karekandooni, rîa mana na emerandi, 20 rîa mataano na carindoniki, rîa mathanthatû na carindioni, rîa mûgwanja na kiricorite, rîa manaana na beriri, rîa kenda na topaci, rîa îkûmi na kîricopiraci, rîa îkûmi na rîmwe na njacinthi, na rîa îkûmi na maîrî rîagemeetue na amethîsiti. 21 Mîîrîga îrî îkûmi na îîrî yarî ruru. Wa kîra mwîrîga warûthîîtwe na ruru îmwe. Barabara ya taûni înu yarî ya thaabu îtarî mbunganie na gîntû kîngî. Yakari ta kîyici.
22 Ntoona Nyomba ya Ngai taûni înu n'ûntû Mwathani Ngai Mwene Inya na Kagondu ibaarî gûku, barî bo. 23 Gûtaarî gîtûmi gîa kûmûrîkîrwa i werû bwa riûa kana bwa mweri, n'ûntû taûni înu îmûrîkagîrwa i mwago wa Ngai. Kagondu n'we taa yaayo. 24 Mîgongo yonthe yamûrîkîrwa i werû bwa taûni înu, anene ba nthîgûrû baareeta into biao ku bira birî mwago mûno, birî biewa. 25 Na gûtirî ntugû mîîrîga ya taûni înu yaingwa n'ûntû gûku gûtitugaga. 26 Na mîgongo yonthe yareeta into biayo bira birî mwago mûno, birî biewa kwonania gûtîîya kûra baatîîyîîte taûni înu. 27 Ûra ateethereetie, kana ûra aarûthaga mantû mara matakenagia Ngai, kana ûra aaragia ûrongo atikîthûngîra gûku. Bara mariîtwa maao maandîkîîtwe îbukuuni rîa mwoyo, ta rîo îbuku rîa Kagondu, i bo bonka baathûngîîre gûku.