Kûgwûrîrwa 1

KÛGWÛRÎRWA

1 Gûkû i ku kûgwûrîrwa kûra Yiesû Kîrîstû aagwûrîîrwe i Ngai, kaingo agwûrîra athingati baake mantû mara meengeerie gûtuîkîka kagiita gatarî karaaya, gûtarî kîrigîîria. Yiesû aatûmire mûraîka wake kaingo amenyithia mo Njoana, mûruti ngûgî wake. 2 Njoana akûûyîîrîîte mantû mama eegiirue kuuma kîrî Ngai, na mara ooniirue i Yiesû Kîrîstû. 3 Kîthaarimo i kîrî ûra athoomaga ûroria bûbû na bara babuîgagua bakaiga bûbû bwandîkîîtwe nkorooni ciao, n'ûntû kagiita karî akubî ka mantû mama gûtuîkîka.

Ntûmwa ya Yiesû Kîrîstû kîrî makanica

4 I niû Njoana nkûbwandîkîra, biû makanica mûgwanja mara marî nthîgûrû ya Îcia.

Ngai ûra atwîre oogo, ûra aarî oogo wana tene, ta we ûra agaatûûra tene na tene, irundu mûgwanja bira birî mbere ya gîtî gîake kîa ûnene, arobwaa ûtugi na ûkiri, 5 na kuuma kîrî Yiesû Kîrîstû, mûkûûyî mwîtîgua, wa mbere kûriûkua, na mûnene wa anene ba nthîgûrû.

Oonaniirie natwendeete na nthakame yake îra aatûthaûrire n'yo twauma meeyiani meetû. 6 Nwe aatûmire twathanaga na tûrutagîra Ngai Îthe ngûgî ta athînjîri. Arookumagua, na inya yake îroonekanaga bûra îgana tene na tene. Aameni.

7 Ga nkûbwîra, Yiesû naayîîte na matu,

na gûtirî we atakîmwona.

Wana bara baamûûragire

bakamwona akîîya.

Antû ba mîgongo yonthe ya nthîgûrû

bakamûrîrîra.

Na ûgu i bu gûgaakara! Aameni.

8 Mwathani Ngai ariuga, “I niû Kîambîrîria na i niû Mûthia. I niû ntwîre oogo, ûra aarî oogo wana tene, ûra agaatûûra tene na tene. I niû Mwene Inya yonthe.”

Njoana oona Yiesû kîonekiini

9 Niû Njoana ndî mûruanyûkwe. Wana niû i nyamaaragua ta bûra bûnyamaaragua, imbîgagua ndî amwe naabi ûneneeni, na mbûmagîîria wata biû n'ûntû bwa Yiesû. N'ûntû bwa ntheto ya Ngai na gûkûûyîîra mantû ma Yiesû, i ntûma ndî gîcîgîîrioni kîa îria gîîtagwa Patimos. 10 Mantû mama maatuîkîkire ngwetwe i Kîrundu ntugû ya Mwathani. Ndeegiirue kayû kaanene ta ga karumbeeta nyuma yakwa, 11 kauga, “Andîka îbukuuni bûra ûkwona ûtûme rîo makanicaani mûgwanja ta mo: Efeso, Simaana, Pagamamu, Thiatira, Sandis, Firandefia na Raondisia.”

12 Nkwîgua ûgu, ndaagarûka mbona n'ûû aaragia. Nkûgarûka, ndoona taa mûgwanja igîakanaga irî itugîîni bia thaabu, 13 na muntû “aakari ta mwana wa muntû” arûngi gatîgatî ga taa inu. Eekîrîte rwambambio na oogeete mûcibi wa nguo ya thaabu kîbara. 14 Kîongo gîake kîarî kîîyerû. Na wana ntundu ciake ciarî injerû ce ta îra kana nyange. Meetho maake maakari ta ndîrîmbî cia mwanki. 15 Magûrû maake maakari ta gîkama rîra kîgwete mwanki mûno gîgatuunea tunî. Na akîaria kayû gaake keeguîkaga ta ntherû îkwaria. 16 Aagwete nthata mûgwanja na njara ya ûrîo, arûmîîte rûûyiû rûûgî mbarî cionthe na kanyua, na ûthiû bwake bwakengakengaga ta riûa.

17 Nkûmwona ndagwa agu nthî magûrûûni maake, ndaakara ta muntû ûmûkuû. Aambaigîîra njara yake ya ûrîo ambîîra, “Tiga kûmaka. I niû Mbere na Mûthia. 18 I niû ntûûraga mwoyo. Kûrî rîo ndaakuîte, îndî îîndî ndî mwoyo tene na tene! Ncaabi cia gîkuû na cia nthiko ndî nacio. 19 Kwoogu andîka mara ûkwona, mantû mara marîo îgiitaani rîrî na mara makoonekana nyumaani.” 20 Ambîîra, “Ga nkuumbûrîre bûra nthata ino mûgwanja ûkwona irî njaraani yakwa ya ûrîo, na bûra taa ino mûgwanja cia thaabu i kwonania. Taa ino mûgwanja i makanica mûgwanja. Nthata ino mûgwanja n'araîka ba makanica mamu.”