Ntûmwa ya Yiesû kîrî kanica ya Efeso
2
1 Ûyu ndeene akari ta mwana wa muntû ambîîra, “Andîkîra mûraîka wa kanica ya Efeso ûmwîre mantû mama.Mwîre, ‘Ûra agwete nthata mûgwanja na njara yake ya ûrîo akîriûngariûngaga ara itugî mûgwanja bia thaabu birî bira bitûûgîîrîîtue taa, ariuga ûûgû. 2 Imbiyî bûra ngûgî îra ûrutaga îkari. Na imbiyî ûrutaga ngûgî na inya mûno ûtagûkua nkoro. Imbiyî ûtiendaga kwona bara barûthaga mantû maathûûku. Na nûgereetie bara baugaga n'atûmwa na tibo, woona ibarongoaga. 3 Wonaga mathîîna maingî ûkaûmîîria n'ûntû bwakwa ûtakûnoga.
4 Îndî kûrî ûntû bûtagûnkenia. Ûtirî na wendo bûra warî nabu mbereeni. 5 Kwoogu ririkana bûra wakari mbereeni. Îîrire ûcooke kûrûtha bûra warûthaga mbereeni. Wegua ûtiîrira, nkaaya ndute taa agu îrî. 6 Îndî kûrî bu ûkûrûtha bwagîrîte. Nûthwîre ûgu Anikoraitani babu bakûrûtha. Na kinya niû inthwîre ûgu.
7 Ûra arî na matû neegue bûra Kîrundu akwîra makanica. Ûra akaûmbana nkamwîtîgîîria kûrîa matunda ma mûtî wa mwoyo mûndaani wa Ngai.’ ”
Ntûmwa ya Yiesû kîrî kanica ya Simaana
8 “Na andîkîra mûraîka wa kanica ya Simaana ûmwîre mantû mama.
Mwîre, ‘Ûra nwe mwanjîîrio na mûthia, ûra aakuire na acooka gûtûûra mwoyo kaîrî, ariuga ûûgû. 9 Imbiyî nûkûnyamaarua na ûtirî gîtonga, îndî ûrî gîtonga gîîkîrundu! Imbiyî bûra bara beebîtaga Ayaundi baaragia mantû maathûûku îgûrû rîaku. Baugaga bo n'Ayaundi, îndî t'Ayaundi bongwa. Bo i *sinagoogi ya Saitaani. 10 Ûtikaamakue i mantû mara meengeerie gûkûûyîîra makûnyamaarie. Ga ngûkwîra, Nkoma agaatûma bamwe beenu bûthaîkwa nceera akîbûgeria. Kûnyamaarua kûra bûkaanyamaarua i gwa ntugû îkûmi. Îndî îthi na mbere kwîgua ûrî na wîtîgio wana wegua nûgaakua, naani ngakwa mwoyo ûrî kîewa.
11 Ûra arî na matû neegue bûra Kîrundu akwîra makanica. Ûra akaûmbana, gûtirî bu gîkuû kîa maîrî gîkaamûrûtha.’ ”
Ntûmwa ya Yiesû kîrî kanica ya Pagamamu
12 “Na andîkîra mûraîka wa kanica ya Pagamamu mantû mama.
Mwîre, ‘Ûra arî na rûûyiû rûûgî mbarî cionthe ariuga ûûgû. 13 Imbiyî bûra ara ûtwîre gûkari. Ara ûtwîre noogo Saitaani yandîîte nkunyû, îndî woû wîtîgio bwaku bûrî kîrî niû. Kinya îgiita rîra Antipas, mûnkûûyî wakwa wa mma aûragîîrwe naagu, agu Saitaani îtûûraga, ûtankaana.
14 Îndî kûrî mantû matagûnkenia. Antû bamwe baaku bathingataga moorutani ma Mbaraamu. Kîroria gîku kîa ûrongo i kîo kîarutanire mûnene wa Moabu ûra eetagwa Mbaraki, bûra akaarûtha atûme Aisiraeri beeyia. Aatûmire beeyia na njîra ya kûrîa irio birutîrîtwe ngai cia ûrongo na njîra ya kûruta ngûgî cia ûmaramari. 15 Na kûrî antû bangî baaku nabo bathingataga ûrutani bwa Anikoraitani. 16 Kwoogu îîrire. Wegua ûtiîrira inkûûya warîru ndûe nabo na rûûyiû rûrû ndûmîîte na kanyua.
17 Ûra arî na matû neegue bûra Kîrundu akwîra makanica. Ûra akaûmbana nkamwaa irio bira biîtagwa mana, bira biithe na mmwe iiga rîîyerû rîandîkîîtwe riîtwa rîake rîîgeni. Na gûtirî ûngî akaamenya riîtwa rîru tatiga ûra akeewa rîo.’ ”
Ntûmwa ya Yiesû kîrî kanica ya Thiatira
18 “Na andîkîra mûraîka wa kanica ya Thiatira mantû mama.
Mwîre, ‘Ûra arî na meetho magwakana ta mwanki na magûrû makari ta gîkama, ta we Mwana wa Ngai, ariuga ûûgû. 19 Imbiyî bûra ngûgî îra ûrutaga îkari. Imbiyî bûra wendo bwaku bûgana, bûra wîtîgio bwaku bûgana, bûra ûndutagîra ngûgî bûgana, na bûra kûûmîîria gwaku kûgana. Na imbiyî mantû mara ûrûthaga îgiitaani rîrî imakûrûkîîte mara warûthaga mbereeni.
20 Îndî kûrî ûntû bûtagûnkenia. Nûrekeereetie Njesebeeri, mûka ûra eebîtaga kîroria, arutana aruti ngûgî baakwa ûrutani bwa ûrongo. Na kuumania na moorutani maake, n'we atûmîîte antû baakwa beeyia wîyia bwa ûmaramari, na bwa kûrîa irio birutîrîtwe ngai cia ûrongo. 21 Mmweete kaanya ga kwîrira, îndî atikwenda kwîrira wîyia bwake. 22 Na kwoogu we na bara bonthe beeyagia ta we bakaanyamaara mûno. Na baarega kwîrira mantû mara barûthaga, ngaatûma bamaama batakuuma ûrîrî i kînyamaara kîra nkaabaa, 23 na mbûrage athingati baake. Rîru i rîo makanica monthe makaamenya i niû ncûnkûûnaga nkoro na mathûgaania ma antû. Na nkaa wa kîra ûmwe wenu kîewa kûringana na ngûgî ciake. 24 Îndî kûrî bo bacienu, biû Athiatira, bara bûtathingataga moorutani mamu maake na bûteendeete kûmenya bûra bamwe beetaga mawitho ma Saitaani ma ndeeni. Ga nkûbwîra biû gûtirî bu bûngî nkûbwîra bûrûthe, 25 tatiga kûbwîra bûthi na mbere kwîrikia wîtîgioni bwenu mwanka rîra nkaaya.
26 Ûra akaûmbana athi na mbere kûmbathîkîra mwanka mûthia, nkamwaa watho bwa kwatha mîgongo yonthe 27 atarî na mathee, na akeegua arî na inya ya kûmîthiria. Nkamwaa inya na watho ta bûra Baaba aampeere. 28 Na nkamwaa nthata îra yonekaga rûkîîrî gûgîkea.
29 Ûra arî na matû neegue bûra Kîrundu akwîra makanica.’ ”