Araîka bara baareetire kînyamaara kîa mûthia
15
1 Ndoona mantû mangî maanene ma kûgegania gûku îgûrû. Ndaaraithire ndoona araîka mûgwanja bara baareetire inyamaara mûgwanja. Bibi i bio inyamaara bia mûthia bia kûthirîkîria mûthûûro wa Ngai.2 Kaîrî ndoona gîntû gîakari ta îria rîa kîyici kiungeene na mwanki. Ndaaraitha ndoona bara baacindîîte nyamû îra, mûbuanaano waayo, na namba ya riîtwa rîayo. Baarûngi rûteere rwa îria rîru bakiinaga na wandîndî cia ndigi inyingî ira beetwe i Ngai. 3 Bainaga rwîmbo rwa Musa, mûruti ngûgî ya Ngai, na rwîmbo rwa Kagondu. Bainaga,
“Mantû mara ûrûthaga i mantû maanene
na i ma kûrigaria, Mwathani Ngai Mwene Inya.
Bûra bunthe ûrûthaga i bwagîrîte
na i bwa mma, mûnene wa mîgongo yonthe.
4 N'ûntû Mwathani, i woû wenka mûtheru,
n'ûû atagîgûkuthûka, atûme riîtwa rîaku rîtîîywa?
Mîgongo yonthe ya nthîgûrû îkaaya îkûgonge
n'ûntû mantû maagîru mara ûrûthaga i maiyîkeene.”
5 Nyuma ya mantû mamu ndoona Nyomba ya Ngai yarugûka gûku îgûrû, ta yo îrema rîra, kûra maathana ma Ngai maigîîtwe.a 6 Araîka mûgwanja bara baareeteete inyamaara mûgwanja bauma ku beekîrîte nguo igûkengakenga, injerû ce, na boogeete mîcibi ya nguo ya thaabu ibaraani. 7 Kîûmbe kîmwe kîrî bira bina kîanenkera wa kîra ûmwe wa araîka babu mûgwanja mbakûri ya thaabu yûyûri mûthûûro wa Ngai ûra atûûraga mwoyo tene na tene. 8 Ndoona Ngai aûyûria ntoogo gûku Nyomba ya Ngai kwonania bûra arî inya na mwago ûgana. Gûtirî muntû akîthûngîra gûku mwanka rîra inyamaara bibu mûgwanja biathirire, bibu biareeteetwe n'araîka babu.