Rwîmbo rwa antû bara 144,000
14
1 Ndaaraitha ndoona Kagondu karûngi Kîrîmaani gîa Sayuuni. Na i kwarî na antû ngiri îgana rîmwe rîa mîrongo îna na bana barûngi nako gûku Sayuuni, baandîkîîtwe moothiû riîtwa rîako na rîa Îthe. 2 Ndeegua kayû kaaria kuuma îgûrû. Gaakari ta mûrurumo wa muuro ûmûnene mûno, kana ta nkwa îkûruruma, kana ta mûkondo wa antû bakîringa wandîndî cia ndigi inyingî. 3 Ndeegua antû babu baarî na Kagondu baina rwîmbo rûûgeni barî mbere ya gîtî kîa ûnene, agu mbere ya biûmbe bira bina, na akûrû bara mîrongo îîrî na bana. Gûtirî we akîmenya rwîmbo rûru, tatiga antû babu ngiri îgana rîmwe rîa mîrongo îna na bana, bara baakûûrîîtwe kuuma mwingîîni wa antû ba nthîgûrû. 4 Na babu i bara bateethûûkia na ûmaramari. Bo bakari ta mwarî ataamaama na muntû mûrûme. Bathingataga Kagondu wa naara karathi. Na bakûûrîîtwe kuuma mwingîîni wa antû barî ba mbere, beeyanwa kîrî Ngai na kîrî Kagondu barî kîewa kîa mwanya. 5 Bataaria ûrongo na tûnyua twao, na batirî mabîtia.Ntûmwa cia araîka bathatû
6 Ndoona mûraîka ûngî abuurûûkîrîte îgûrû maanganyoni. Mûraîka ûyu aarî na ntheto îmbega îra îgaatûûra tene na tene athiîte kûmîtûmîîria kîrî bara batûîre nthîgûrû; mîgongo yonthe, mîîrîga yonthe, nthiomi cionthe na antû ba rangi cionthe. 7 Augîîria na inya îra nene, auga, “Kuthûkagaani Ngai na mûkumagieni. Îgiita rîake rîgûkinya rîa kûgiitîra antû bonthe îgamba. Gongaani ûra aûmbire îgûrû, nthîgûrû, îria, na inyaka.”
8 Gwacooka kwaya mûraîka ûngî, wa baîrî. Auga, “Taûni înene ya Mbabironi îkwomorangwa, îkwomborangwa! N'yo îratûmaga antû ba mîgongo yonthe banyua ndibei ya wîrirîîria bwa ûmaramari.”
9 Mûraîka ûngî wa bathatû aaya. Augîîria na inya îra nene, auga, “Ûra akaagonga nyamû îra, mûbuanaano wayo, kana eekîrwe rwano rwayo ûthiû kana njara, 10 ûyu nakaanyua gîkombe kîa ndibei ya mûthûûro wa Ngai îtaunganîîtue na rûûyî. Na nakaathangîkua na mwanki wa ûbiriti mbere ya araîka baatheru, agu mbere ya Kagondu. 11 Na ntoogo ya kûthangîkua kwao îgeetagia îgûrû tene na tene. Bara bakaagonga nyamû îra, mûbuanaano wayo, kana beekîrwe rwano rwa riîtwa rîayo batiinogoka kûrî mûthenya kana ûtugû.” 12 Kwoogu i ta kuuga, antû ba Ngai bara baathîkagîra maathana maake barî eetîgua kîrî Yiesû, nwa mwanka beegue barî na kûûmîîria.
13 Ndeegua kayû kuuma îgûrû kambîîra, “Andîka ûûgû: Kuuma îîndî bara bagaakua beetîgîîtie Mwathani bakaathaarimwa nkûrûki.”
Ndeegua Kîrundu auga, “I mma bakaanogoka mînoga ya ngûgî ira ûkeegua bararutaga, n'ûntû mantû meega mara ûkeegua barûthîîte makoonekana.”
Maketha ma nthîgûrû
14 Ndaraitha ndoona îtu rîîyerû, na kûrî we aarîkarîrîîte aakari ta mwana wa muntû. Eekîrîte nthûmbî ya ûnene ya thaabu kîongo na naagwete kayiû kaûgî mûno ga gûketha. 15 Mûraîka ûngî aumagarûka Nyomba ya Ngai. Augîîria na inya eera ûyu aakarîrîîte îtu rîru, “Thûkia kayiû gaaku ûkethe n'ûntû kagiita ka maketha gagûkinya, na maketha nthîgûrû i maûmo ma gûketha.” 16 Ûyu aakarîrîîte îtu aathûkia kayiû gaake. Aaketha maketha ma nthîgûrû.
17 Mûraîka ûngî aumagarûka gûku Nyomba ya Ngai kaîrî. Wana we naagwete kayiû ga gûketha kaûgî mûno. 18 Ndoona mûraîka ûngî aarî na inya ya kwatha mwanki auma kîthînjîrooni. Eera mûraîka ûyu wa baîrî aumire Nyomba ya Ngai, “Thûkia kayiû gaaku ûteme mpong'i cia mûcabiibû wa nthîgûrû, n'ûntû ncabiibû cia uu n'imbîru.” 19 Mûraîka ûyu aathûkia kayiû gaake. Aaketha igaro bia ncabiibû mûcabiibûûni wa nthîgûrû, aigera kîrinyaani gîa gûkinyangîra ncabiibû kîa mûthûûro ûmûnene wa Ngai. 20 Ncabiibû ciaitîrwa kîrinyaani gîku, agu ome ya taûni ikiumaga nthakame yathi mîrirû mairi magana maîrî. Yarî na ndia ta ya ûraaya bwa mbaraathi, biiti îtaano.