Mbakûri mûgwanja cia mûthûûro wa Ngai
16
1 Ndeegua kayû kaaria na inya îra nene gûku Nyomba ya Ngai. Keera araîka babu mûgwanja, “Îthiini bûtûûrîrie nthîgûrû mûthûûro ûyu wa Ngai ûrî mbakûriini inu mûgwanja.”2 Mûraîka wa mbere aathi eetûûra mûthûmba wa mbakûri yake nthîgûrû. Agwîtûûra, bara baarî na rwano rwa nyamû îra, bara baagongaga mûbuanaano waayo bauma maronda maathûûku mûno.
3 Mûraîka wa baîrî eetûûra mûthûmba wa mbakûri yake îriani. Agwîtûûra, rûûyî rwakara ta nthakame ya muntû ûmûkuû. Kîonthe kîra kîarî mwoyo îriani gîakua.
4 Mûraîka wa bathatû eetûûra mûthûmba wa mbakûri yake miurooni na inyakaani. Agwîtûûra, ndûûyî ciatuîka nthakame. 5 Ndeegua mûraîka ûra aathanaga ndûyîîni auga,
“Woû Ûra Mûtheru, woû ûra arî oogo,
woû warî oogo, i woû mwagîru,
n'ûntû i woû weyanîîte îkaanûkia rîrî.
6 Nthakame îno wakundia antû baba ibaagîrîte kûmînyua
n'ûntû ibeetûûrire nthakame
ya antû baaku na ya iroria.”
7 Ndeegua kayû kauma kîthînjîrooni. Kauga,
“Yîî wabu, Mwathani Ngai Mwene Inya,
woû ûgiitaga magamba na njîra ya mma,
bûra kûbatîîrue.”
8 Mûraîka wa bana eetûûrîria riûa mûthûmba wa mbakûri yake. Riûa rîewa watho bwa kûrûngûria antû na mûrugutîra warîo. 9 Antû baarûngûra i mwanki wa riûa. Warî mûrugutîra ûmûnene mûno. Antû baaruma Ngai ûra eeyanîîte inyamaara bibu, baarega kwîrira na bataatîîya Ngai.
10 Mûraîka wa bataano eetûûra mûthûmba wa mbakûri yake gîtîîni kîa ûnene kîa nyamû îra, ûnene bwa yo bwaruma mwindu. Antû baincia n'ûrûrû.a 11 Baaruma Ngai wa îgûrû n'ûntû bwa ûrûrû bûbu beegagua na n'ûntû bwa maronda mamu baarî namo. Baarega kwîrira mantû mara baarûthîîte maathûûku.
12 Mûraîka wa bathanthatû eetûûra mûthûmba wa mbakûri yake muurooni ûmûnene ûra wîtagwa Yufîrîti. Agûcuîtûûra ku, muuro ûyu wabwa. Kwoneka njîra ya anene bara bakauma bwa uumîîro bwa riûa. 13 Ndaacooka ndoona irundu bithatû biithûûku bikari ta biûra. Kîrundu kîmwe ndoonire kîauma kanyuani ka njoka îra yarî nene mûno, kîa biîrî kîauma kanyuani ka nyamû îra, na kîa bithatû kîauma kanyuani ga kîroria kîa ûrongo. 14 Irundu bibu biithûûku i nkoma ira irî inya ya kûringa biama. Ndoona biathi biethîrania amwe anene ba nthîgûrû yonthe n'ûntû bwa ndûa îra îkaarwîgwa ntugû îra nene ya Ngai, Mwene Inya.
15 Mwathani ariuga, “Thikîîria! Nkaaya ta mwamba bûra aayaga! Kîthaarimo i kîrî ûra akaraga eethuuranîrîte, ûra akaraga amenyeereete nguo ciake kaingo atathi ûtheri mbere ya antû, eebîkîrithia nthoni.”
16 Irundu bibu biithûûku biethîrania anene amwe bantû eetagwa Amagendoni na rwaria rwa Kîibirania.
17 Mûraîka wa mûgwanja eetûûra mûthûmba wa mbakûri yake ruuoni. Ndeegua kayû kauma gîtîîni kîra kîa ûnene, gûku Nyomba ya Ngai. Kaugîîria na inya kauga, “N'ûgu îîndî!” 18 Kayû gaku gakuuga ûgu rweni rwatua kwenia, ndeegua gîtuma kîînene mûno na mûrurumo wa nkwa. Nthîgûrû yainaina na inya mûno bûra îtaaroinaina kuuma muntû akûûmbwa. 19 Taûni îra nene yaatûkanua icuncî bithatû na taûni ira ingî cionthe cia nthîgûrû ciomoranangua. Ngai aaririkana taûni înene ya Mbabironi. Amîkundia gîkombe kîa ndibei ya mûthûûro wake ûmûnene. 20 Icîgîîrio bionthe bia îria biaûra. Na irîma bitoonwa kaîrî. 21 Kwaura mbura ya maiga înene mûno. Îthanta rîmwe rîayo rîarî rîa ûrito ta bwa kiro mîrongo îna. Mathanta maumaga îgûrû makawîra antû. Antû baaruma Ngai akuurithia mbura înu, n'ûntû kînyamaara kîra boonire kîarî kîînene bwa kûrigaria.