MIKA
Mantû ma îbuku rîrî
Kîroria Mika aarî wa kuuma taûni ya Moresethi rûteere rwa iti rwa Njerusaremu. Aatwîre îgiita rîmwe na Osea na Isaya (cencarî ya 8 MKA). Ntûmwa yake yaugaga Ngai akaagambithia mîciî îra mînene Njerusaremu na Samaria. I baabatîîrue beegua barî ngerekano îmbega ya kûthingatwa n'antû, îndî baûyûrîîtwe i watho, kwinyanîîria, kwîbenda, wîkumia, kwenda ngukumo na kwîbwithia. Mika wa ta Isaya oona ûtûûro bwa Asîîria bwa ûnene bwa neegûrû, Isiraeri, na ûtûûro bwa Ambabironi bwa ûnene bwa naiti, Njunda.
Wagîru bwa Ngai na gwîtia mûtûûrîre ûmwagîru kîrî antû i kîo kîongo kîongwa kîa îbuku rîrî. Kûringana na kîrîîkanîro kîa Ngai na Isiraeri gûkûrûkîîra Musa, mûtûûrîre wa nyumaani wa antû baake ndeeni ya nthîgûrû îra aabapeete waringanaga na wegua bakaathîkîra watho bwa Musa. Bakîrûthire bu, bakîûmba kwîrîgîîra kîthaarimo kîa Ngai. Baarega kûrûtha bu, Ngai akabakaanûkia îgiita rîtarî rîraaya kana nyumaani akabeengatia bakauma nthîgûrû. Mika oonanîîria bwega mpuumi cia kûrega kwathîka. Amwe noogu ntûmwa ya Mika yîîkîrîîtwe rwano na njîra ya wîrîgîîro bwa ûtûûro bûra bûkaaya, kwa ngerekano, oona gûciarîrwa kwa Yiesû Bethireemu (Gîcu. 51:1) na ûnene bwa ûkiri bûra bûkaaya (Gîcu. 4:1-4).
Îbuku rîrî nwa rîgaanue icuncî bithatû. Gîcuncî kîa mbere (Gîcu. 1-2) kîrîarîîria îgûrû rîa kûgiitîrwa îgamba na kwînyangua, îndî gîkarigia na wîrane bwa gûcookanîîrua. Gîcuncî kîa biîrî (Gîcu. 3-5) kîrîanjîîria na kûgiitîrwa îgamba gwa atongoria bara bathûûku, athînjîri ba Ngai na iroria, îndî gîkathi mbere kwonanîîria na njîra îndaaya mantû ma mesia gûcookanîîria matigari mara magaatigara nyuma ya kûgiitîrwa îgamba. Gîcuncî kîa bithatû (Gîcu. 6-7) kîrîraithîîria gîtûmi gîa kwînyiia na kwîrira kaingo wîrane bwa gûcookanîîrua na kîthaarimo bioneka.
Mwandîkîre wa Mika mûno mûno i kîî rwîmbo na natûmîrîte biugo bia mathee bira bûrî na inya gûtaûra.
Gwookubî îbuku rîrî rîkari ûûgû:
Kûgiitîrwa îgamba gwa Isiraeri na Njunda (1:1-3:12)
Gûcookanîîrua na ûkiri (4:1-5:15)
Ntûmwa ya nkaanua na ûkiri (6:1-7:20)