MIKA
1
1 Gîkî i kiugo kîa Mwathani kîra kîayîîre Mika wa kuuma taûni ya Moresethi magiitaani ma wathani bwa Njothamu, Aasi na Esekia, anene ba Njunda, na njîra ya kîoneki kîra oonire îgûrû rîa Samaria na Njerusaremu.Kîeba îgûrû rîa Samaria na Njerusaremu
2 Kindaani mûûrû! Biû antû bara barî nthî bwinthe, nthikîîriani! Mwathani Ngai akabûgiitîra îgamba arî nyomba yake întheru.
3 Cûûba! Mwathani naumîîte gîkarooni gîake, eendama nthîgûrû gûkinyanga gûntû kûra gûûkîîru. 4 Irîma bikaararûka rungu rwa makinya maake, namo mabonde maaragane ta mûûra mwankiini, ta rûûyî rûgîîtîga mûtûûndûrûkooni.
5 Na i kî n'ûntû mantû mama magûkarîka? N'ûntû bwa kûûma kîongo kwa Njakubu, na meeyia ma Isiraeri. I kû kûûmia kîongo gwa Isiraeri kwîthagîrwa kûrî? I Samaria! I kû ngai cia mîbuanaano igongagwa ndeeni ya Njunda? I Njerusaremu!
6 Mwathani ariuga ata rî, “Ngaatuîkithia mûciî wa Samaria îganjo na kîthaka, na mîtuîkithie gûntû gwa kwanda mîcabiibû. Nkaingiritia maiga ma nthingo ciau mwanka kîbondeeni, mbanîke mîcingi yaayo bûûrîîni. 7 Mîbuanaano yaayo yonthe ya gûcaa îkaarebûrangwa tûrebûrû tûrebûrû. Biewa biao bira birutagwa nyomba ya ngai ciao birî marîi ma ûrwaya bikaabîîthua bionthe. Into bibi biagûrirwe na mbeca ira ciathûkûmîîtwe na njîra ya ûmaraaya, nabio îîndî bikaathûkua bikarîe maraaya gûntû kûngî.”
8 Na n'ûntû bwa mama monthe, nkeegua ndî na kîeba na ndîre. Nkaathiûrûûka ndî mbayo i ntheri na ndî ûtheri, nkîîgagua nthoni. Nkaugîîria ta ncûûgi, na ndîre ta ntundu, 9 n'ûntû kîronda gîa antû baakwa gîtiora. Gîkinyîîte mwanka Njunda, wana kinya mîîrîgaani ya Njerusaremu.
Anthû baakuîrîîria Njerusaremu
10 Bûtikeere anthû beetû ba taûni ya Ngathi na bûtikaarîreeni buru. Biû antû bûrî Bethi-Reabura, garagaraani tîîriini kwonania kwîthikîîra kwenu. 11 Naabi antû ba Safiri, îthiini ta agwate, bûrî ûtheri na bûrî na îgi. Antû ba Saanani bûtikaagerie kuuma ome ya nthingo ciao. Naabi antû ba Betheri minûkaani n'ûntû mîcingi yo yongwa ya taûni yenu nîraciatirwe. 12 Antû ba Marothi i beeteereete nainya mûno kûnogokua, îndî i mûthûûro ûbeeteerete wa ta bûra îkaanûkia rîa Mwathani rîkinyîîte mwanka mîîrîgaani ya Njerusaremu.
13 Ogeeraani nkaarî cienu cia ndûa mbaraathi, biû antû ba taûni ya Rakisi. I woû warî wa mbere kwîyia ndeeni ya ntûûra cionthe cia Njerusaremu n'ûntû ndeeni yaku i kwonekire meeyia monthe ma Njerusaremu. 14 Kwoogu nwa ûtûme kîewa gîa gûtigana kîrî Moresethi-Gathi. Taûni ya Akisibu îkoonania îtiûmba gûtuunyûkia anene ba Isiraeri. 15 Biû antû ba Maresa, Mwathani akaareeta ncamba îgwate taûni yenu. Na atongoria ba Isiraeri bagaatoorokera Anduramu.
16 Rîraani, biû antû ba Njunda! Enjaani biongo bienu i kîeba, n'ûntû aana beenu bara bwendeete bakaathûkua bathi. Îîbenjeeni mpanda wa ta nderi, n'ûntû ngenke cienu igaataîgwa.