NJONA
Mantû ma îbuku rîrî
Njona mwana wa Amitai n'agweteetwe ndeeni ya 2 Anene 12:14-25, ara tûthoomaga tûkoona aaroragia kagiitaani ka Njeroboamu mûnene wa Isiraeri.
Kîroria Njona eetirwe i Ngai athi kwîra antû ba Ninebe beerire batigane na moothûûku maao. Ninebe yaarî taûni îra nene ya Asîîria. Antû ba Asîîria îgiitaani rîru baarî anthû ba antû ba Isiraeri. Mbere ma, Njona aarega kûthi Ninebe, îndî Ngai aaceria njîra ya gûtûma amwathîkîra, na akûmûtûma rîa maîrî Njona aathi noogo. Njona aaregaga kûthi n'ûntû n'aiyî wona antû ba Ninebe beerira Ngai akabarekera, îndî Njona we eendaga bathirua.
Nyuma ya Njona akwîra antû ba Ninebe Ngai akaathiria taûni yao nyuma ya ntugû mîrongo îna, i beeririre. Baatigana na moothûûku maao na Ngai abarekera.
Îndî Njona aathûûrua mûno n'ûntû bûbu. Rîru Njona oonua kwîbenda gwake i Ngai.
Îbuku rîa Njona rîrîtûrutana t'antû ba Isiraeri endeete bonka, îndî n'endeete kinya mîgongo îra îngî ta ya Asîîria. Itûkwona wendo bwa Ngai kîrî antû bonthe ndeeni ya Kîrîîkanîro Kîîyerû. Yiesû ataaya n'ûntû bwa antû ba Isiraeri bonka, aayire n'ûntû bwa antû bonthe ba nthîgûrû.
Ngai, i Ngai wa kîao. Ûûgû i bu akwîra Njona mûthiani wa îbuku rîrî, “Ka niû ntabatîîrue mmakîra taûni înene ya Ninebe îra îrî na antû nkûrûki ya ngiri îgana rîa mîrongo îîrî bara bataûmba kwathûrana njara ya ûrîo kuuma njara ya ûmotho, na nyamû inyingî cia ndîîthia irî ku?”
Gwookubî îbuku rîrî rîkari ûûgû:
Njona aûmîria Ngai kîongo 1:1-17
Îromba rîa Njona arî nda ya îkûyû 2:1-10
Njona aathi aatûmîîria Ninebe 3:1-4
Antû ba Ninebe beerira 3:5-10
Njona athûûra n'ûntû bwa kîao kîa Ngai 4:1-4
Njona oonua kwîbenda gwake i Ngai 4:5-11