NJONA
Njona aûmîria Ngai kîongo
1
1 Kiugo kîa Mwathani kîayîîra Njona mwana wa Amitai 2 “Îthi taûni înene ya Ninebe ûkamîtûmîîrie, ûmîîre ûthûûku bwa antû baayo i bûûnkinyîrîte.”3 Îndî Njona aabaanga kûthi bwa Tarisisi kaingo akuthûka aumauma meethooni ma Mwathani. Eendama bwa Njopa, ara eethîîre meeri yathiîte bwa Tarisisi. Akûrîîkia kûrea ngarama, aathûngîra kaingo aathiiyania nabo Tarisisi akuthûka kuuma kûrî Mwathani.
4 Rîru Mwathani akwona ûgu aatûma kîbuubani kîînene îriani, kwagîa na mîkumbîîrî îmînene becû meeri yaaragana. 5 Bara baarî meeriini baguaya mûno na kîra ûmwe aanjîîria kûrîrîra ngai wake. Na baagera mîrigo îriani boona kana meeri îkaûthaûtha.
Îndî Njona n'arî akwîndama aathûngîra kanyomba ka meeri ka ndeeni, aamaama na anjîîria kûgona. 6 Mûnene wa meeri aathi kîrî we amûûria, “I kî n'ûntû ûmaami? Ûkîîra ûrombe ngai waku! Kwaûmbîka agatûririkana, na agatwonokia.”
7 Bara baarî meeriini beerana, “Ncûûni, tûriinge kuura twone n'ûû uumanîîtie na thîîna îno.” Kwoogu bariinga kuura, n'yo kuura yagwîra Njona. 8 Rîru bamwîra, “Twîre, n'ûû uumanîîtie na thîîna îno îgûtûûyîîra? I ngûgî mbi ûrutaga? Uumîîte kû? Ûrî wa mûgongo ûrîkû?”
9 Njona abeera, “Niû ndî Mûibirania na i ntîîyaga Mwathani, Ngai wa îgûrû, mûûmbi wa îria na nthî îmbûmo.”
10 Bakwîgua ûgu baaguaya mûno, bamûûria, “I mbi îno ûrûthîîte ûûgû?” (I baiyî i ka aakuthûkîîte Mwathani n'ûntû n'aarî akûbeera.) 11 Na n'ûntû kîbuubani ga kîathiîte mbere kwongeereka na kûthûûkia îria. Antû babu baûria Njona, “N'ata tûgûkûrûtha îndî kaingo îria rîgwîrîîra?”
12 Njona abeera, “Ngwataani bûûngere îriani na rîkaagwîrîîra. N'ûntû inkûmenya i niû ntûmîîte kîbuubani gîkî kîbûûyîîra.”
13 Bantû barûtha ûgu, baacûgiirie mûno bûra baûmba kûthiithia meeri bamîcookia îkumbo rîa îria. Îndî baaremwa n'ûntû kîbuubani nwaka kîathiîte mbere kûnenea îriani. 14 Rîru baarîrîra Mwathani, “Îî Mwathani, itû ûtikaareke tûkua n'ûntû bwa mwoyo wa muntû ûyû. Ûtigaatûgambithie n'ûntû bwa gîkuû kîa muntû ûtarî na mabîtia, n'ûntû woû, Mwathani, warûtha kwenda gwaku.” 15 Rîru baagwata Njona bamûgera autûka bwa rûûyî, narîo îria rîagwîrîîra. 16 Rîru antû babu baatîîya Mwathani mûno na bamûrutîra kîgongwana na baarûtha mîthiîtio kîrî we.
17 Îndî Mwathani aathuuranîra îkûyû rîra rîînene kaingo rîmeria Njona, nwe Njona aakara nda ya îkûyû rîru ntugû îthatû mûthenya na ûtugû.