OBANDIA
Kûgambithua na kwînyangua kwa Endomu
1
1 Gîkî i kîoneki kîa Obandia.Ûûgû i bu Mwathani Ngai augîîte mantû ma nthîgûrû ya Endomu:
Itwîgîîtue ntûmwa kuuma kîrî Mwathani,
mûtûmwa n'atûmîîtwe kîrî antû ba mîgongo mwanya mwanya, abeera:
“Umaani! Tûthi tûkaithûkîre antû ba Endomu!”
2 Mwathani ariuga,
I ngûgûtuîkithia kamûgongo kaniini kîrî mîgongo îra îngî,
na ûkaabûthua mûno i muntû wonthe.
3 Wîkumia bwaku i bûkweneetie,
n'ûntû ûtûûraga makurunguuni ma njara cia maiga,
mûciî waku ûrî kathûmbîri.
Na ûkaraga oogo ûkîîbîîraga,
“N'ûû ûnkinyîra aaga akaambarûkia?”
4 Mwathani n'we arîkwîra,
wana kinya ûkabuurûkîra îgûrû ta ndiiû,
na ûgaaka ntara yaku nthataani,
nwa ngakwarûkia ûturane nthî.
5 Rîra aamba bakuithûkîra,
atuunyani baaya waku ûtugû,
bathûkagia bira bakwenda bionka.
Wana bara bakethaga ncabiibû,
i batigaragîria nkea tûcabiibû tûûkai.
6 Îndî biû rûciaro rwa Esaû,
gûtirî kîo bûgaatigwa nakîo!
Antû bakaumbûra kinya ûtonga bwenu,
bathûkie bathi nabu!
Woû ûkoona thîîna îînene mûno.
7 Anyaanya baaku bonthe,
bagakwîngatia uume kîthakaani gîaku.
Antû bara bûrî ûkiri nabo,
bagakweneeria na bagûture.
Antû bara bûkûrîyanîra nabo îîndî,
bagakwaigîra mûtego,
na ûtiimenya.
8 Mwathani ariuga, Ntugû înu
n'amma nkaathiria antû bara baûgî ba kuuma Endomu,
na bara barî na ûmenyo ba
kuuma irîmaani bia Esaû.
9 Ncamba cia ndûa cia taûni ya Temani,
ikaathetema n'ûguaya,
na woora wonthe arî irîmaani bia Esaû,
akaûragwa.
Gîtûmi gîa gûkaanûkia Endomu
10 N'ûntû i bwatûmîîre taka kîrî aruanyûkwe, nciarwa cia Njakubu,
kwoogu bûkaagîa îgi,
na bûthirue kûrû.
11 Bwaraithîîrie aruanyûkwe babu,
bagîtuunywa ûtonga bwao n'ageni bantû bûbateethia,
rîra ageni baayire baathûngîra taûni ya Njerusaremu,
na baathûkia ûtonga bunthe bwa Njerusaremu,
îndî bakîgaana ûtonga bûbu, bwarî amwe nabo.
12 Endomu, bûtaabatîîrue bûkena rîra mûruanyûkwe aarî na thîîna,
kana bûkeneera kwona antû ba Njunda bakîthirua.
Bûtaabatîîrue bwîkumia bwona bakînyamaara.
13 Bûtaabatîîrue kûthûngîra na mwîrîga wa taûni ya antû baakwa,
rîra baarî na thîîna,
na bûkeneera mathîîna maao,
rîra baarî kînyamaaraani.
Bûtaabatîîrue bûthûkia ûtonga bwao,
rîra baarî thîînaani.
14 Bûtaabatîîrue bûrûngama maathûkanooni ma barabara
bûgiitîra bûkîûragaga bara bakûmonyoka;
bûtaabatîîrue bûcookia matigari mamu mangî kîrî anthû baao
kagiita kaao ka thîîna.
Ngai agaakaanûkia mîgongo
15 Ntugû ya Mwathani ya kûgiitîra mîgongo yonthe îgamba
yengeerie gûkinya.
Mantû mathûûku mara bwarûthîîre antû bara bangî,
wana biû Endomu bûkaarûthîrwa mo,
makabûcookera.
16 N'ûntû woû Njunda i ndaagûkaanûkîîrie kîrîmaani gîakwa kîîtheru,
ngaakaanûkia antû ba mîgongo yonthe,
bakaathirua bariganîrie.
Ûûmbani bwa Isiraeri
17 Îndî bûkoona kwonokua
kîrîmaani gîa Sayuuni,
na gîkeegua kîrî kîîtheru.
Antû ba Njakubu bagaatunyana,
ithaka biao kuuma kîrî antû bara baabatuunyîîte bio.
18 Antû ba Njakubu bakeegua bakari ta mwanki,
nabo antû ba Njosebua bakari ta ndîrîmbî cia mwanki,
îndî antû ba Esaû bakeegua bakari ta rûûa rûûmo,
antû ba Njakubu bakababîîthîîria babîe cwe,
gûtirî nwa ûmwe wa rûrîîyo rwa Esaû agaatigara,
bûbu bûgaakarîka n'ûntû i bu Mwathani augîîte.
19 Rîru antû ba Ngai bara batûîre Negebu bakeegwatîra,
irîma bia Esaû batûûre ku,
na bara batûîre mîaranthî ya irîma bia Njunda,
bagaatunyana nthîgûrû ya Afirisiti,
na bakaathûkia ithaka bia Eburaimu,
na bia Samaria.
Nabo antû ba mwîrîga wa Benjameni,
batûûre kîthakaani kîa Ngiriandi.
20 Antû ba Isiraeri bara baakûûrirwe mîciî yao,
bagaacooka bathûkie nthîgûrû ya Kanaani,
mwanka Sarefathi.
Antû ba Njunda bara baakûûrirwe kuuma Njerusaremu,
baatûûra Sefarandi,
bagaacooka kwao na bathûkie taûni cia Negebu.
21 Ncamba ira irî inya cia Njerusaremu ira irî kîrîmaani gîa Sayuuni,
ikaathaga irîma bia Esaû,
na ûnene bûbu bûkeegua bûrî bwa Mwathani.