Njona athûûra n'ûntû bwa kîao kîa Ngai
4
1 Îndî ûntû bûbû bûtakenia Njona na n'aathûûrire mûno. 2 Aaromba Mwathani amwîra, “Îî Mwathani, ûûgû tibu ndaugire mbere mbuuma nthî yetû? Gîkî i kîo gîtûmi ndaarûthire mpwî mbûra nthi bwa Tarisisi. I ndaiyî ûrî Ngai wa ûtugi na kîao, ûtithûûrangaga na mpwî na ûûyûrîîtwe i wendo, na n'ûgarûkaga ûgatîîra kûgera ngero. 3 Îîndî, îî Mwathani, mbûraga n'ûntû i kaaba nkuîte nkûrûki ya ndî mwoyo.”4 Mwathani n'we acookia, “N'ûbatîîrie ûthûûra?”
Njona oonua kwîbeenda wake i Ngai
5 Njona auma taûni aathi aakara nthî bantû rûteere rwa uumîîro bwa riûa bwa taûni. Aarûtha gîtara, aakara mûgunyeeni wakîo eteereete oona bûra taûni înu îgaakara. 6 Na Mwathani Ngai aumithia kamûtî mûthemba wa rûûngû îgûrû rîa Njona kaingo kamûkunîkîra atiga kwîgua naaî i mwathû. Njona aakeneera rûûngû rûru mûno. 7 Rûûni rûkîîrî gûgîkîa Ngai aatûma kaginyo kaathi kaarîa rûûngû na rwaûma. 8 Riûa rîkuuma, Ngai aatûma ruuo rûrî na mûrugutîra kuuma bwa umîîro bwa riûa, na riûa narîo rîabîîthia Njona kîongo aagirîka. Njona eerirîria gûkua, auga, “I kaaba nkuîte nkûrûki ya kwîgua ndî mwoyo.”
9 Îndî Ngai eera Njona, “Kûrî na gîtûmi ûthûûra n'ûntû bwa rûûngû?”
Aacookia, “Yîî! I mbatîîrue nthûûra wana gûkua nkua.”
10 Mwathani amwîra, “Woû n'ûkûmakîra rûûngû rûrû, ûtamenyeera kana ûtûma rûkûra, rwaumire na utugû bûmwe na rwaûma na ûtugû bûmwe. 11 Î niû rî, ga ntabatîîrue mbîgîîrua Ninebe kîao, taûni înene, îrî na antû nkûrûki ya ngiri îgana rîa mîrongo îîrî, bara bataûmba kwathûrana njara yao ya ûrîo kuuma njara yao ya ûmotho, na kaîrî îrî na ng'ombe inyiingî mûno?”