Njona aathi aatûmîîria Ninebe
3
1 Rîru kiugo kîa Mwathani kîayîîra Njona îgiita rîa maîrî, 2 “Îthi taûni înene ya Ninebe ûkamîtûmîîrie ntûmwa îra ngûkûnenkera.”3 Kwoogu Njona aathîkîra kayû ka Mwathani na aathi Ninebe. N'yo Ninebe yarî taûni înene mûno ya wariî bwa ntugû ithatû kûmîkomania. 4 Njona aanjîîria rûgendo na nyuma ya ntugû îmwe aathûûngîra taûni ya Ninebe. Aanjîîria gûtûmîîria, “Ntugû mîrongo îna kuuma îmunthî Ninebe îkaathirua.”
Antû ba Ninebe beerira
5 Kwoogu antû ba Ninebe beetîgia Ngai. Baugîîria gûtîîrîra kûrîa irio, na beekîra nguo cia nkunia kuuma ûra mûniini mwanka ûra mûnene.
6 Rîra mantû mamu maakinyîîre mûnene wa Ninebe, aûkîîra gîtîîni gîake kîa ûnene, aaruta nguo ciake cia ûnene, eekîra nguo cia nkunia, na aakara nthî muuni. 7 Mûnene na aniini baake baaruta watho bwatûmîîrua Ninebe yonthe, “Gûkûrûkîîra watho kuuma kûrî mûnene na aniini baake,
Bûtikaareke muntû acama nwa mbi, kana nyamû, ndîîthia cia ng'ombe kana cia ng'ondu irîa kana inyua rûûyî. 8 Îndî muntû eekîre nguo cia nkunia wana nyamû cionthe ciîkîrwe. Wa muntû arîrîre Ngai nainya mûno na agarûke atigane na njîra ciake inthûûku na cia ûtûrîka. 9 N'ûû wiyî? Kwaûmbîka Ngai akeegua kîao akagarûka kuuma mûthûûrooni wake ûmûnene, na atatûthirie.”
10 Rîra Ngai oonire bûra antû baarûthire na bûra baagarûkire baatigana na njîra ciao inthûûku, eegua kîao na ataabathiria ta bûra augîîte akaarûtha.