Kwathana kwa Mwathani îgiita rîra rîkaaya
(Isa 2:2-4)
4
1 Ntugûûni ira ikaaya, kîrîmaani kîra Nyomba ya Ngai îrûngi, gîgaatuîka bantû a gîtûmi nkûrûki ya irîma bira bingî. Antû kuuma nthîgûrû yonthe bakaathiiyaga noogo kûgonga, 2 na bakauga, “Ncûûni, twîtieni kîrîmaani kîa Mwathani, Nyomba ya Ngai wa Isiraeri. N'we agaatûrutana njîra ciake, kaingo tûkaamwathîkîra.” N'ûntû ntugûûni inu moorutani na mawatho ma Mwathani makauma Njerusaremu.3 Mwathani akaagiita îgamba îgûrû rîa mîgongo îmiingî, na akaagwatithania mîgongo îrî na inya ya kûûraaya na ya gûûkubî. Îgaatura ndûûyiû ciao ituîke tûyiû twa mîraaû na matumo matuîke tûyiû twa kwaria mîtî. Batikooro barûa kana beethuuranîra kûthi kûrûa kaîrî. 4 Muntû wonthe agaakara nthî mayîîga ruungu rwa mîcabiibû na mîkûyû yake, n'ûntû gûtirî we akaabamakia. N'ûntû i Mwathani Mwene Inya wengwa auga ûûgû! 5 Kinya wegua mîgongo yonthe îra îrî akubî naati îrîgonga ngai ciao cia mîbuanaano, tiû tûkaathingata Mwathani Ngai wetû tene na tene.
Isiraeri îkauma ûkombooni
6 Mwathani ariuga, “Ntugû înu, nkeethîrania antû baakwa amwe bara bionje, bara beengatiirue, na bara bagurarie. 7 Ngaatuîkithia bionje matigari na bara beengatiirue batuîke mûgongo ûrî na inya. Rîru Niû, Mwathani, nkaathana ndî kîrîmaani gîa Sayuuni ta mûnene wao kuuma ntugû înu mwanka tene na tene. 8 Naawe kîbayo kîa mûrîîthi wa ng'ondu, woû wîbitho bwa Sayuuni ûgaacookerua wathani bwaku bûra bwa tene, ûnene bûgaacooka Njerusaremu.” 9 I kî îîndî n'ûntû ûkûrîra nainya ûû? I ka bûtarî na mûnene, kana eeyani ûkûrû beenu i bakuîte? I kî n'ûntû ûkwînyongoora n'ûrûrû ta mwekûrû arî na ûrûrû akîgea na mwana? 10 Îînyongooreeni na bûrîre n'ûrûrû ta mwekûrû akîgîa na mwana, biû antû ba Njerusaremu! N'ûntû bûrî akubî kuuma taûni yenu bûkaathi bûgatûûre kîthakaani. Bûkaathi Mbabironi bûrî atae, îndî Nyumaani bûkoonokua. Mwathani akabwonokia kuuma njaraani cia anthû beenu. 11 Mîgongo îmingî îkeethîrana îbwithûkîre îkiugaga, “Nwa mwanka Njerusaremu îînyangue! Tûrîenda kwona taûni înu îrî îganjo!” 12 Îndî mîgongo îno îtikûmenya bûra bûrî mathûgaaniani na mîbangooni ya Mwathani. Batikûmenya beethîranîîtue amwe ta bûra mûnya wîthîranagua ûbûûrwa.
13 Mwathani ariuga, “Ûkîîra ûbathirie, Woû Njerusaremu, mwarî wa Sayuuni. N'ûntû ngakwa inya, kaingo ûûmba gûkinyanga mîgongo îtuîka tûcuncî.”
Rîru bûrute ûtonga bunthe bûra beegwatîrîte na njîra îtarî mbega kîrî kîewa kîrî Mwathani wa nthî yonthe.