Mûtongoria kuuma Bethireemu
5
1 Îthîrania njûûrî ya ndûa, woû taûni ya njûûrî! Mûnthû nathiûrûkîrîîte Njerusaremu. Bakaaringa mûtongoria wa Isiraeri ûthiû na mûraagi.2 Îndî woû, Bethireemu Eburathi, wana wegua bûrî gatûûra kaniini gatîgatî ka magiri ma ntûûra ndeeni ya Njunda, mûtongoria wa Isiraeri akauma kîrî biû, ûra kaumo gaake karî ga kuuma tene. 3 Kwoogu Mwathani agaatiganîria antû ba Isiraeri kîrî anthû baao mwanka kagiita kara mwekûrû ûra arî na ûrûrû bwa mwana agaaciara kaana ga kaîyî. Rîru mûthiani matigari ma antû baao bagaacooka kîrî antû baao Isiraeri. 4 Na akaarûngama atongoreerie ûrîîthi bwake arî na inya ya Mwathani, ndeeni ya ûkumio bwa Mwathani Ngai wake. Rîru antû baake bagaatûûra oogo batagûtaangwa, n'ûntû akaanenkerwa gîtîîyo kîînene mwanka mîthia yonthe ya nthîgûrû, 5 na akeegua arî kaumo ga ûkiri bwao.
Îkaanûkia na gûkûûrwa
Rîra Asîîria baithûkîra nthîgûrû yetû na kwomoranga kûra anene bakaraga, tûkaathuura arîîthî mûgwanja kana atongoria beetû banaana barî na inya mûno barûe nabo. 6 Bakaatha nthî ya Asîîria na rûûyiû, nthî ya Nimurondi n'yo bamîathe barî mîîrîgaani yaayo. Mûnene wetû agatwonokia kuuma kîrî Asîîria rîra baithûkîra nthî yetû na baakîra mîanka yetû.
Matigari makaatherua
7 Rîru matigari ma antû ba Isiraeri makeegua marî gatîgatî ka mîgongo îmiingî makari ta maame matûmîîtwe i Mwathani kana mbura îkuurîra nyaki, îra gûtarî muntû aûmba kûmîrigîîria. 8 Matigari ma Isiraeri marî gatîgatî ka mîgongo makeegua makari ta cimba gatîgatî ka nyamû cia kîthaka, kana ta kiunga gîa cimba gatîgatî ka ng'ondu. Bakaithûkîra anthû baao na babatembûrange wa ara onthe bagaakûrûkîîra na gûtirî we aûmba kûbatuunyûkia. 9 Isiraeri bakaithûkîra anthû baao na babathirie cwe.
10 Mwathani ariuga, “Kagiitaani wa gaku, nkabûtuunya mbaraathi na nkaarî cia ndûa. 11 Nkoomoranga taûni ira irî nthîgûrû yenu na mbînyangie wîbitho bwenu bunthe. 12 Nkaathiria ûrogi bwenu bunthe; na bûtiîgua bûrî na aringia bakûûragia mantû kaîrî. 13 Nkeenyangia ngai cienu cionthe cia mîbuanaano na itugî bia Asera,a na kwoogu bûtikooro bûgonga into bira bûrûthîîte na njara cienu. 14 Ngakûûra itugî bia ngai ya mûka Asera na mbînyangie taûni cienu. 15 Naani nkeerîîria na mûthûûro ûmûnene kîrî mîgongo yonthe îra îtambathîkagîra.”