Atongoria na iroria bia Isiraeri biagondokerwa
3
1 Rîru ndauga, “Thikîîriani biû atongoria na aathani ba mûgongo wa Isiraeri! Anga bûbatîîrue kûmenya wega na ûthûûku? 2 Îndî nwa biû bwingwa bûthwîre wega na bwenda ûthûûku. Bûthînjaga antû baakwa barî mwoyo na bûkaaria nyama kuuma mîîndîîni. 3 Bûrîîyaga nyama cia antû baakwa, bûbathînjîîte bwa baunanga maîndî na kûbagitaanga ta nyama ithiîte kûrugwa na nyûngû. 4 Îgiita irîîyîîte rîra bûkaarîrîra Mwathani, îndî atibûcookeria. Akabûûndûkîria mûgongo, n'ûntû bwa ûthûûku bûra bûrûthîîte.”5 Ûûgû i bu Mwathani akuuga, “Mantûûni meegiî biû iroria bira bibîtithagia antû baakwa! Bwaigaga ûkiri na bara babûreraga, îndî kîrî bara baregaga kûbûrera bûkarûa nabo. 6 Îîndî ûtugû bûkabûgiitia na bûtige kwona bioneki. Bûkaarumîrwa i mwindu, ûtûme wîgua bûtiûmba kûroria mantû ma îgiita rîra rîkaaya. Riûa rîkabûthwîra biû iroria, na ntugû yenu îgaakinya mûthia. 7 Rîru naabi iroria bûkaagîa îgi, na biû ariingia bûgaacookerwa i nthoni. Na bûgaakunîka tûnyua n'ûntû ûtiîgua bûrî na ûntû bwa kuuga kuuma kîrî Ngai.”
8 Îndî niû, i mbûyûrîîtwe n'inya ya Kîrundu wa Mwathani. I mbûyûrîîtwe n'ûma na ûcamba, kaingo menyithia Njakubu kûûma biongo kwao na Isiraeri, meeyia maao. 9 Nthikîîriani, biû aathani na atongoria ba mûgongo wa Isiraeri! Bûmeneete ûmma na bûgakoombia mara monthe marî ma mma. 10 Bûrîaka Njerusaremu mûcingiini wa ûûragani na ngukumano. 11 Aathani beenu bagiitaga magamba kaingo bagukumwa; athînjîri nabo barutanaga mawatho ma Ngai kaingo barîwa; iroria bitiroria nwanga bikarîwa. Na nwa bakuuga beerîgîîrîîte Mwathani. Bakauga, “Gûtirî ûthûûku bûûmba gûtûûyîîra, n'ûntû Mwathani arî amwe naati aaga.” 12 Kwoogu n'ûntû bwenu, Kîrîma gîa Sayuuni gîkaarîmwa na mûraaû ta mûnda; Njerusaremu îtuîkue îganjo, na kathûmbîri ara Nyomba ya Ngai îrûngi, gûgaakûra kîthaka.