6
Kaunutan nu Gendaw Pelali si Isus
1 Naa duuni Gendaw Pelali, minayan si nga Isus di pegimulanan trigo. Naa selian nilan mayan dia, mingetes tu trigo su nga sakup ni Isus, kinusu nilan, dayun nilan pekaanay. 2 Mendadi ki nga Pariseo, benaˈ minitaˈ nilan su kengetes nu nga sakup ni Isus tu trigo kia, kaliˈ ilan pektaluˈ, “Paa, mauma iin maˈniinig baalen niu? Ki Gendaw Pelali, binandu dinita ditu Misulat Palinta nu Megbebayaˈ duunig baalen ta di gendaw kini!”
3 Kaliˈ sembag si Isus dinilan, “Baa, pia da. Puˈ si David kanugdiin, ndaˈ ba niu mbasa ki pinggulaulanen dadema saˈ migutem, ilan nu ngag dumanen? 4 Puˈ sumiled si David ditug Balay Pengedapan tu Megbebayaˈ, inalapen su pan ginilak tu Megbebayaˈ, dayunen aanay, inilasanen dun padun su ngag dumanen. Asa binandu ditu Misulat Palinta nu Megbebayaˈ duuni maan di pan kia, subay su laak ngag belian.”a
5 Diksuˈ ni Isus su sinumpaten di nga Pariseo, “Mendadi naan kini, kig Bataˈ nu Kilawan, naani Kaunutan megbayaˈ dig baalen nu kilawan metaang di Gendaw Pelali.”
Piuliˈan ni Isusi Getaw Mingupesi Sedibaluy Kemeten
6 Naa benaˈ lain Gendaw Pelali, minangay si Isus di simbaan nu getaw Judea, miktituluˈ dia. Naa mitaang duuni getaw dia, mingupesi sedibaluy kemeten dapit lintu. 7 Naa ki nga mekpetuˈun di Misulat Palinta nu Megbebayaˈ mukaˈ ki nga Pariseo, penengaun nilan siai gempia dangat nilan dini Isus. Saˈ maˈantu, piktuliktulikan nilan gupia si Isus saˈ meneguliˈ metaang di Gendaw Pelali, saˈ ndiˈ. 8 Laak misuunan ni Isus kig delendeman nilan kia. Mendadi, kaliˈ pektaluˈ si Isus di getaw kia mingupesi kemeten, “Naa, pegindega, pediniin ka gedapan nug launan.” Migbuat dayun, migindeg di gedapan nilan. 9 Laung dayun ni Isus di nga getaw kia menengaw dangat nilan diniin, “Naa, duuni saaken ku diniu. Taˈ alandun mai biwang dinita ditu Misulat Palinta nu Megbebayaˈ, baalen ta metaang di Gendaw Pelali? Pepianan ta bai samataw ta di Gendaw Pelali, atawaka pelaatan ta? Guunen ta su ginaanen, atawaka petain ta ba?” 10 Pingenlengan ilan dayun ni Isus diadia, tinaluˈen dayun di getaw kia mingupesi kemeten, “Naa, tenggal mui kemet mu.” Tinggalen dayun, mukaˈ miuliˈan.
11 Mendadi ki nga mekpetuˈun di Palinta kia mukaˈ ki nga Pariseo, mitutung ilan patiˈ gangit. Migyagayaga ilan dayun, endutaˈen nilan dun si Isus.
Tinduˈ ni Isus su Sepuluˈ buˈ Duaˈ Peneliganen
12 Naa ndaˈ maiben, duuni gendaw tumiwad si Isus dig bentud adun menenabi ditu. Benaˈ mitingkag tug bentud, pigendawan dia menenabi ditu Megbebayaˈ. 13 Mendadi benaˈ miglegendaw, sinabi ni Isus su nga sakupen. Saˈ mipungun ilan dia niin, pimiliˈanen ilan, tinduˈen ki sepuluˈ buˈ duaˈ tawan dinilan, ilani gilal ni Isus nga peneliganen. 14 Sug beknanen, si Simon, piningalan dun ni Isus si Pedro. Dayun si Andres, pated ni Simon, mukaˈ si Santiago, si Juan, si Felipe, si Bartolome. 15 Dayun si Mateo, si Tomas, si Santiago, gamaˈen si Alfeo, dayun si Simon, piningalan dun su mingatu tu gubirnu. 16 Dayun si Judas, gamaˈen su sala Santiago. Mendadi su kesepuluˈ buˈ duaˈen, iin si Judas Iscariote, su tumipu pa dini Isus.
Mikpetuˈun si Isus mukaˈ Mineguliˈ tu nga Getaw
17 Naa mindiksun si nga Isus. Benaˈ pegindeg ilan diag datag, mikpungun dia ni Isus su melaun gupia sakupen, dakus melaun getaw genat tu tibuuk Judea dakus Jerusalem sampay genat tu geksid dagat, ditug lunsud paingalan dun Tiro mukaˈ Sidon. Mituaˈi melaun gupia getaw adun mekineeg dini Isus dakus mekpebulung diniin ditug leduun nilan. 18 Sampay su nga piglegetan menulay, pineguliˈan ilan dadema. 19 Su kelaun getaw, diadia pinengawenig bianen megdeluˈ dini Isus, puˈ duuni ginuung gumiwaˈ diniin, kaas ndaˈidun dinilani ndaˈ mauliˈay.
Su Tantu Keliag
20 Mendadi, pingenlengan ni Isus su nga sakupen, kaliˈ pektaluˈ dinilan,
“Naa, yamu nu nga gempusuk getaw, liliag amu,
puˈ mikesakup amu tu Keglekaunutan nu Megbebayaˈ!
21 “Yamu nu nga megutem nemun, liliag amu dadema,
puˈ pebesugen dun amu nu Megbebayaˈ!
“Yamu nu nga pengaduy nemun, liliag amu dadema,
puˈ duuni gendaw, pentuaan amu!”
22 Laung padun ni Isus, “Naa saˈ maˈantu, saˈ bentaan amu nu getaw dakus pemilasen amu nilan mukaˈ tampalaksaan amu, mukaˈ saˈ peksudiˈan amu pa pagid sabaˈ nu kesakup niu dinaan kini, kig Bataˈ nu Kilawan, naa liliag amu! 23 Kaas saˈ maˈniai mbianan niu, pegleliag amu dun, sampay megleksuleksu amu. Puˈ maˈananen, duun pai sugda diniu gembagel ditu gekbus langit. Puˈ iini sama niu, su nga pimuunan nu Megbebayaˈ dengantu, puˈ maˈantu dademai kekpeleget dinilan nu ginepuˈay nu getaw nemun.”
24 Laung padun ni Isus,
“Dagid yamu nu nga medatuˈ getaw, mekelelaatlelaat amu,
puˈ su memis kebetang, migelaˈ na niu malap!
25 “Yamu nga mibesug nemun, mekelelaatlelaat damu dema,
puˈ megutem pamu!
“Yamu nga peketawa nandaw, mekelelaatlelaat amu pagid,
puˈ melegenan pamu, mukaˈ mekengaduy pamu!
26 “Mukaˈ mekelelaatlelaat amu saˈ penalan amu nug launan getaw, puˈ iini sama niu su nga getaw dengantu tautau pimuunan nu Megbebayaˈ, pinalan dailan dema nu ginepuˈay nu getaw nemun.”
Su Kepetail di nga Kuntra
(Mateo 5.38-48; 7.12a)
27 Kaliˈ gusay pektaluˈ si Isus, “Laak yamu nu nga mekineeg, kinii taluˈu diniu nandaw, petail niui nga kuntra niu. Ki nga getaw megbanta diniu, pepianay niu dadema. 28 Ki nga mektuyud diniu, penenebiay niu mpianan, sampay su mekpelaat diniu. 29 Saladuaˈ diniu, saˈ pinenggiˈ depiˈen ka di muluˈ mu dapit lintu, pedapiˈ mu pagid su sedibaluy muluˈ mu ditug duminapiˈ diniˈa. Adin su malap suub mu, begay mu dun pa pagid su kamisita mu, peduma mu padun su suub mu. 30 Ki kelaun menengi diniˈa, begayay mu. Saˈ duuni malap pimetang mu, ndiˈ mu peksaakay puliˈ diniin. 31 Kaas pia taˈ alanduni melabuˈ dig delendeman niu melengas sia gabang nug duma niu diniu, iini baal niu dinilan.”
32 Kaliˈ padun pektaluˈ si Isus, “Saˈ iin da laaki petailen niu su mekpetail diniu, bantang bamu sugdaan nu Megbebayaˈ? Puˈ pia su nga mikesalaˈ getaw, mekpetail dailan dema tu nga mekpetail dinilan! 33 Mukaˈ saˈ iin laaki pepianan niu su mekpepia diniu, naa bantang bamu sugdaan dun? Pia su nga mikesalaˈ getaw, maˈniaig betad nilan! 34 Mukaˈ padun, saˈ iin laaki pedamen niu su laung niu metau meguliˈ pelum diniu gidamen, naa bantang bamu sugdaan dun? Pia su mikesalaˈ getaw, pedamen da nilan dema sug duma nilan, adun biadan nilan puliˈ su miutang! 35 Dagid yamu, petail niu su nga kuntra niu. Pepianay niu su nga samataw niu. Pedam niu ilan di ndaˈi pedetengen niu dun mpuliˈ diniu. Puˈ saˈ maˈniai penggulaulaan niu, naa gembagel gupiai sugda diniu, mengemaˈan amu tu Tampusan Metaas. Puˈ daniin betad, melilelaaten. Pia su getaw ndiˈ metau ebangan sampay su medupang getaw, lelaatanen da gusay. 36 Kaas melilelaaten amu, maaˈ dadema nu Gamaˈ niu Megbebayaˈ, melilelaaten.”
Ndiˈ Mpia Pegdenaˈen su Samataw
37 Kaliˈ pektaluˈ si Isus, “Ndiˈ niu pegdenaˈay su nga samataw niu, mukaˈ ndiˈ amu ukumen nu Megbebayaˈ. Ndiˈ niu peselaˈay su samataw niu, mukaˈ ndiˈ damu dema ukuman nu Megbebayaˈ. Pedasun niu su samataw niu, pedesunen damu dema nu Megbebayaˈ. 38 Begayay niu su samataw niu, dayun begayan damu dema nu Megbebayaˈ. Pebegelen dayun nu Megbebayaˈ sug betanganen tug begayen diniu, tisenenen pa pagid mukaˈ engkugenen dakus pepenuˈenen sampay meglapay. Puˈ adini tepengan niu dig begay niu, iin dademai tepengan nu Megbebayaˈ tug begayen pelum diniu.”
39 Mendadi, miksambingay si Isus di nga getaw, laungen, “Sug buta, mesuˈaten ba egakay dig dalanig dumanen, buta dadema?b Pinenggiˈ egakenen, dayun buus duunig luak dia gunaan nilan, ndiˈ ba megelaˈ ilan dayun melabuˈ dia? 40 Su getaw mektuˈun, kanaˈ metaas pa di mekpetuˈun diniin. Laak adin su metubus na pektuˈunay, melepengen dadema su mikpetuˈun diniin.”
41 Kaliˈ padun pektaluˈ si Isus, “Naa mauma dema saladuaˈ diniu, maitaˈ mu ki maikaˈ puling di mata nug duma mu, laak yaˈa, ndaˈ mu metukaway puˈ duun dademai puling mu, gembagel? 42 Mukaˈ pagid mauma dema teluˈen mu pelum tug duma mu, ‘Uy, Mingumpated, uaˈen ku pa deliˈ ki puling mu kiin,’ asa yaˈa dema, ndiˈ mu maitaˈ puˈ mipulinga dadema gembagel puling? Baa, yaˈa kiin, tautau mekesuun ka! Kaas unaay mu uaˈay ki gembagel puling di mata mu kiin, adun mpalas mu su maikaˈ puling nug duma mu, adun mawaˈ mu.”
Su Gempia Betad mukaˈ su Melaaten
43 Kaliˈ pagid pektaluˈ si Isus, “Ndaˈiduni gempia gayu megbunga melaaten. Mesama dadema di melaat gayu, ndiˈ megbunga melengas. 44 Kaas saˈ peksimaˈen su gayu, iini kimanan, kig bunganen. Sug bunga igera, kanaˈ maupuˈ dig dugi. Kanaˈ dadema maupuˈ dig dugi sug bunga gubas. 45 Maˈniin dadema su mekesuun getaw, gempiai pegbetadenen, puˈ sug betaden, puun di gempia delendemanen. Su pelum medupang getaw, melaati pegbetadenen, puˈ sug betaden, puun dadema di melaat delendemanen. Puˈ ki taluˈ nu getaw, iini megbuas dig delendemanen.”
Su Tituluˈan ni Isus, subay Dunutan nu Sakupen
46 Kaliˈ gusay pektaluˈ si Isus, “Naa, mauma dema gelalen niau Kaunutan, asa ki suguˈan ku diniu, ndiˈ niu pelum petuuden? 47 Adin su getaw medini naan adun mekineeg di teluˈen ku, dayun megdunut dun, maˈniniˈi petenggiˈan ku dun. 48 Penenggiˈan duni getaw migbaal balay. Migengkul medalem, adun entudenen di telektap sug balayen. Naa benaˈ mitubus sug balay, migbaaˈ su tubig, kaas midenlagan nu guluan layas sug balay. Laak ndaˈ tanan pegegdel, sabaˈ gempageni kebaal dun. 49 Laak dagid adini getaw mekedengeg di taluˈu kini laak ndiˈen dunutan, iini maaˈ nu getaw migbaal balayen diag lupaˈ laak, ndaˈi gintudanen dun. Dayun kig balayen kia, benaˈ midenlagan baaˈ, migebaˈ dayun, gembagelig dulebaken.”