5
Inggat ni Isus sug Bekna Sakupen
1 Laak duuni gendaw, pegindeg si Isus ditu geksid linaw Genesaret. Mikpungunpungun dini Isus su nga getaw, adun kineegan nilan su Gempia Petenday genat tu Megbebayaˈ. 2 Naa saanan ni Isus megukit dia, minitaˈenig duaˈ buuk sekayan midengguˈ di geksid linaw. Laak su menelisedaˈ, luminusad na, pingugasan nilan sug baling nilan. 3 Saˈ maˈantu, luminulan si Isus di salabuuk sekayan, iini gapuˈen si Simon, dayunen petulaktulakay dini Simon kemaikaˈ. Naa benaˈ miˈigin su sekayan melayuˈlayuˈ di geksid, pegingkud si Isus diag dialem nu sekayan, pituˈunanen gusay su nga getaw dia geksid.
4 Mendadi benaˈ mitubus na megukit, laung ni Isus dini Simon, “Naa, bundas pamu diag laud nug linaw kini, dia amu pemaling, adun mekelaam amu.”
5 “Laak Sir,” laung ni Simon, “piglegendawan mami metegelan memaling, ndaˈ ami tanan mekelaam. Dagid saˈ teluˈen mu memalingu, naa memalingu gusay.” 6 Mimaling ilan dayun diag laud mukaˈ mikelaam ilan, ndiˈ na mbilangi sedaˈ milaam nilan. Naa benaˈ meglegetus na sia su ngag baling nilan, 7 kipayan ni nga Simon su ngag duma nilan diag lain sekayan, mikpaingabang ilan dinilan. Mikpesempel ilan, dayun sug duaˈ buuk sekayan, mipenuˈ gupia, sampay peglened na sia. 8 Laak si Simon Pedro, benaˈ minitaˈen su mipenggulaula, minginlulud di gedapan ni Isus, laungen, “Uu Kaunutan, pelayuˈa dinaan, puˈ mikesalaˈu getaw!”
9 Kaas maˈniai tinaluˈ ni Pedro, puˈ misebuˈan patiˈ, sampay su kelaun dumanen, ditu melaun sedaˈ milaam nilan. 10 Maˈantu dademai ngag duma ni Simon, si Santiago buˈ si Juan, ngag bataˈ ni Sebedeo. Kaliˈ pektaluˈ si Isus dini Simon, “Ndiˈa na mendek. Puˈ genat nandaw, kanaˈ na sedaˈi peglaaman mu, puˈ getaw na, adun sumakup ilan dinaan.”
11 Naa benaˈ midengguˈ nilan su nga sekayan nilan, binilin nilan dayun sug launan pimetang nilan, migdunut ilan dayun dini Isus, suminakup ilan diniin.
Piuliˈan ni Isusi Getaw Pegladu Mekesalebuˈ Nuka
12 Naa selian ni Isus di sala lunsud, mitaang duuni getaw dia, mileep mekesalebuˈ nukaig lawasen. Mendadi, benaˈ minitaˈ nu getaw kini si Isus, miglaub dayun di gedapanen, kaliˈ penengi diniin, laungen, “Sir, saˈ mauyaˈan mu da, suunan ku megaga mau pauliˈay!”
13 Tinggal ni Isusig baingkenen, dipenaneni getaw kia, kaliˈ pektaluˈ, “Naa, mauyaˈan ku lai. Mauliˈan ka dadema tuˈu!” Seduˈunduˈun dayun miawaˈ su mekesalebuˈ nukanen. 14 Laak inungub ni Isus su piuliˈanen kia, laungen, “Pia sala tawan, ndaˈiduni ukitan mu di mipenggulaula kini. Segaga angaya tug belian, pekpebantaya diniin, dayun ilak mu sug betang pinalinta ni Moises dengantu, puˈ adun metakesiˈan ka nu getaw, miawaˈ na su kelemuˈay mu.”
15 Dagid minamal laak mesigwag sug dengegan ni Isus. Kaas melaun gupia getaw mikpungun adun mekineeg diniin dakus mekpebulung diniin di ngag leduun nilan. 16 Laak taang dun, megawaˈ si Isus di tebenan getaw, mangay tu meliaw benwa, adun menenabi dia.
Pidasun ni Isus su Salaˈ nu Pilung sampay Piuliˈanen
17 Naa duuni gendaw, mikpetuˈun si Isus. Duun dademai pemegingkud dia ki nga sakup nu pikumpungan nu getaw Judea piningalan dun Pariseo, mukaˈ nga mekpetuˈun di Misulat Palinta nu Megbebayaˈ. Genat ilan di kelaun lunsud sakup Galilea dakus Judea, sampay genat tu Jerusalem. Naa si Isus, ginuungan meneguliˈ di pegladu, puun tu Kaunutan Megbebayaˈ. 18 Mendadi, duuni nga getaw minateng, pegbuligan nilan di sinampuyuan ki mipilung. Benaˈ midepet ilan diag balay kia, peseleden nilan sia ki mipilung, adun pebeliliden nilan di gedapan ni Isus. 19 Laak dagid sabaˈ nu melaun getaw, ndiˈ mesuˈati keseled nilan diag balay. Kaliˈ ilan pegleketau, minaik ilan tu gatep, inawaˈ nilan dayuni nga santaˈ laad nu gatep kia tisaˈ. Saˈ miguangan su gatep, tintun nilan dayun su mipilung, dia da gusay sinampuyuan dun. Pibelilid nilan dayun dia titengaˈ nu nga getaw, dia gedapan ni Isus. 20 Mendadi si Isus, benaˈ minitaˈen ki kesalig nilan diniin, miktaluˈ di pilung kia, “Naung, pidasun na su salaˈ mu.”
21 Naa mendadi, ki nga Pariseo kini mukaˈ ki nga mekpetuˈun di Misulat Palinta nu Megbebayaˈ, benaˈ midengeg nilan ki tinaluˈ kia ni Isus, kaliˈ ilan taluˈ dig dialem delendeman nilan, “Paa, ki getaw kini, mauma dema piksudiˈanen pelum su Megbebayaˈ? Taˈ mai mekepedasun di salaˈ, subay su laak Megbebayaˈ?”a
22 Misuunan dayun ni Isusig dialem nug delendeman nilan kia. Kaliˈ dayun pektaluˈ dinilan, “Mauma dema maˈniini teluˈen niu dig dialem delendeman niu? 23 Puˈ saˈ su kilawan laak, melemu pebelusen saˈ teluˈenen tu pilung, ‘Pidasun na su salaˈ mu.’ Melemu dadema pebelusen saˈ teluˈenen, ‘Pegbuata, panawa.’ 24 Dagid naan kini, luminusad mau, miksibaluyu Bataˈ nu Kilawan. Saˈ maˈantu, paitaˈu diniu puˈ duuni pegbayaˈu mekpedasun di salaˈ dinig dibabaw lumbang.” Luminingay dayun si Isus tu pilung mukaˈ miktaluˈ diniin, “Naa, taluˈu tuˈu diniˈa, pegbuata, sikwat mui sinampuyuan diniˈa kiin, mukaˈ uliˈa!”
25 Suminambut tuˈu megbuat dia gedapan nu melaun getaw su pilung kia, sinikwaten su sinampuyuan diniin kia, dayun muliˈ, pegenalanen su Megbebayaˈ. 26 Naa su kelaun getaw dia, mipatiˈ ilan mesebuˈay dun, inal nilan gelaˈ su Megbebayaˈ dunut mindek pailan pagid, laung nilan, “Mekesalebuˈ gupiai minitaˈ ta kini nandaw!”
Pisakup ni Isus si Levi
27 Tubus nitu, mipanaw si Isus. Benaˈ mipanaw, duuni mipekitaˈen sala tawan mendawat buis pegingkud diag bataˈ gupisinanen, ngalanen si Levi. Sinabi ni Isus si Levi, laungen, “Dunuta dinaan.” 28 Benaˈ midengeg ni Levi, migbuat dayun, bilengen tanan su kelaun sengkapanen, migdunut tuˈu dini Isus, suminakup na diniin.
29 Naa si Levi, pigbesaanen si Isus di gaan tug balayen, gembibu gupia. Melaun mendawat buis suminaup, melaun dademai getaw dumingan dinilan maan. 30 Mendadi ki nga mekpetuˈun di Misulat Palinta nu Megbebayaˈ mukaˈ ki nga sama Pariseo nilan, pigbensi nilan su nga sakup ni Isus, laung nilan, “Paa, mauma dema dumingan mamu maan di nga mendawat buis kia mukaˈ di ngag duma mekesesalaˈ getaw?”
31 Kaliˈ sembag si Isus, “Naa su getaw ndaˈig leduunen, ndiˈ kambat mekpebulung, subay su laak duunig leduunen. 32 Naa naan kini, maˈantu dadema, iini luminusadu dun dinig lumbang, adun pesikesuunen ku su laak mekesesalaˈ getaw, kanaˈ nu nga gandang mekesuun getaw.”
Sinaakan si Isus mekatag di Kekpuasa
33 Naa mendadi duuni nga getaw, kaliˈ ilan pektaluˈ dini Isus, “Saˈ su nga sakup ni Juan, betad nilan mekpuasa mukaˈ menenabi. Mesama dadema su nga sakup nu nga Pariseo. Dagid su ngag daniˈa sakup, laak maan ilan dakus minum ilan pelum.”
34 Kaliˈ sembag si Isus, “Waˈa daan, puˈ penenggiˈan dun sug belaˈi. Su nga suminaup dig belaˈi, kendutaˈen ba nilan pekpuasa, saanan duma pa nilan su menginsawa? 35 Laak dagid duuni gendaw mateng, uiˈen na dinilan ki menginsawa, dekag pailan tuˈu pekpuasa.”b
36 Naa minalap pelum si Isus penenggiˈan, laungen, “Duun bai getaw sukpay dig begu suuben, adun iini ekleben dig danul suuben kig begu gupia penepeten? Puˈ saˈ pinenggiˈ pemaˈantuunen, mesabaˈen megedit sug begu, asa kig begu gekleb, ndiˈ dadema mbantang ditug daan penepeten.c
37 “Mukaˈ pa pagid sug betad megbetang penginumen di pemetangan binaal panit petubuˈen, maˈantu dadema.d Duun bai getaw megbetang begu penginumen dig daan pemetangan? Puˈ saˈ pinenggiˈ maˈnia, saˈ tumulin sug begu penginumen, ndiˈ ba megbetu su panit petubuˈen? Deksuˈanen, megulaˈ su penginumen, mukaˈ meglaat dadema su pemetanganen. 38 Kaas sug begu penginumen, subay begu dadema su pemetanganen. 39 Laak ndaˈi getaw mitagam na meginum dig daan penginumen, metumuˈen dayun sug begu penginumen. Puˈ laungen, ‘Melengas sug daan.’”