2
Pidasun ni Isus su Salaˈ nu Pilung sampay Piuliˈanen
1 Naa duuni santaˈ gebii, mipuliˈ si Isus ditu Capernaum. Naa benaˈ misuunan nu nga getaw diag lunsud puˈ dia na balay si Isus, 2 melaun dayun getaw mikpungun dia, ndaˈ megelaˈ diag dialem balay su nga getaw. Mikeet dadema sug lenuˈan. Pigukit dayun ni Isus dinilan su Gempia Petenday. 3 Mendadi saanan ni Isus megukit, duuni nga getaw minateng, pegbuligan nilan di sinampuyuan ki pilung, paat tawani pegbulig dun. 4 Naa sabaˈ nu melaun getaw, ndiˈ mesuˈati kekpesempel nilan dini Isus. Laak kaliˈ ilan pegleketau, minaik ilan ditu gatep, giwangan nilan dayun su gatep dia tandaˈ ni Isus. Saˈ miguangan na nilan, tintun nilan dayun su pilung, dia da gusay sinampuyuan nilan dun. 5 Mendadi si Isus, benaˈ minitaˈen ki kesalig nilan diniin, miktaluˈ di pilung kia, “Naung, pidasun na su salaˈ mu.”
6 Naa, duun pelumi nga mekpetuˈun di Misulat Palinta nu Megbebayaˈ, pegingkud ilan dia. Mendadi ki nga mekpetuˈun kini, benaˈ midengeg nilan ki tinaluˈ kia ni Isus, kaliˈ ilan taluˈ dig dialem delendeman nilan, 7 “Paa, ki getaw kini, mauma dema mekakuˈ mektaluˈ di maˈnini? Piksudiˈanen pelum su Megbebayaˈ! Taˈ mai mekepedasun di salaˈ, subay su laak Megbebayaˈ?”a
8 Misuunan dayun ni Isusig dialem nug delendeman nilan kia. Kaliˈ dayun pektaluˈ dinilan, “Mauma dema maˈniini teluˈen niu dig dialem delendeman niu? 9 Puˈ saˈ su kilawan laak, melemu pebelusen saˈ teluˈenen tu mipilung, ‘Pidasun na su salaˈ mu.’ Melemu dadema pebelusen saˈ teluˈenen, ‘Pegbuata, sikwat mui sinampuyuan diniˈa kiin, panawa dayun.’ 10 Dagid naan kini, luminusad nau, miksibaluyu Bataˈ nu Kilawan. Saˈ maˈantu, paitaˈu diniu puˈ duuni pegbayaˈu mekpedasun di salaˈ dinig dibabaw lumbang.” Luminingay dayun si Isus tu pilung mukaˈ miktaluˈ diniin, 11 “Naa, taluˈu tuˈu diniˈa, pegbuata, sikwat mui sinampuyuan diniˈa kiin, mukaˈ uliˈa!”
12 Suminambut tuˈu megbuat su mipilung kia, sinikwaten su sinampuyuan diniin kia, dayun mipanaw dia gedapan nu kelaunan getaw. Naa saˈ maˈnia, mipatiˈ ilan gupia mesebuˈay dun dunut mipenalan nilan gelaˈ su Megbebayaˈ, laung nilan, “Kitu nai kaibenen, iin pa ta maitaˈi mipenggulaula maˈnini kini!”
Pisakup ni Isus si Levi
13 Naa mipanaw na pelum si Isus, mipuliˈ ditu geksid Linaw Galilea. Benaˈ melaun gupia getaw mikpungun ditu niin, piktuˈunanen ilan dayun. 14 Benaˈ mipanaw na puliˈ si Isus, duuni mipekitaˈen sala tawan mendawat buis pegingkud diag bataˈ gupisinanen, ngalanen si Levi, gamaˈen si Alfeo. Sinabi ni Isus si Levi, laungen, “Dunuta dinaan.” Benaˈ midengeg ni Levi, migbuat dayun, migdunut tuˈu dini Isus, suminakup na diniin.
15 Naa duuni gendaw, si Isus mukaˈ su nga sakupen, minaan ilan diag balay ni Levi kia. Melaun mendawat buis mukaˈ duma mekesesalaˈ getaw dumingan dinilan maan. Puˈ melaun getaw maaˈ danilan betad suminakup na dini Isus. 16 Naa mitaang dun, dia dademai nga mekpetuˈun di Misulat Palinta nu Megbebayaˈ, sakup ilan nu pikumpungan nu getaw Judea piningalan dun nga Pariseo. Mendadi ki nga mekpetuˈun kini, benaˈ minitaˈ nilan si Isus dumingan maan di nga mendawat buis mukaˈ di ngag duma mekesesalaˈ getaw, sinaakan nilan dayun su nga sakup ni Isus. Laung nilan, “Paa, mauma dema dumingan main maan di nga getaw, maˈniaig betad nilan?”
17 Kaliˈ medengeg ni Isus su sinaak nilan, simbagen, “Naa su getaw ndaˈig leduunen, ndiˈ kambat mekpebulung, subay su laak duunig leduunen. Naa, naan kini, maˈantu dadema, iini luminusadu dun dinig lumbang, adun pesikesuunen ku su laak mekesesalaˈ getaw, kanaˈ nu nga gandang mekesuun getaw.”
Sinaakan si Isus mekatag di Kekpuasa
18 Naa duuni gendaw, su nga sakup ni Juan kiin su memunag tubig mukaˈ su nga Pariseo, mikpuasa ilan. Mendadi duuni nga getaw minangay tu ni Isus, kaliˈ ilan saak diniin, “Sir, mauma dema maˈantu? Su nga sakup ni Juan mukaˈ nu nga Pariseo, betad nilan, mekpuasa ma. Dagid su ngag daniˈa sakup, ndiˈ mailan mekpuasa.”
19 Kaliˈ sembag si Isus, “Waˈa daan, puˈ penenggiˈan dun sug belaˈi. Su nga suminaup dig belaˈi, kendutaˈen ba nilan pekpuasa, saanan duma pa nilan su menginsawa? Sinegay duma pa nilan iin, ndiˈ mailan mekpuasa! 20 Laak dagid, duuni gendaw mateng, uiˈen na dinilan ki menginsawa, dekag pailan tuˈu mekpuasa.”b
21 Laung pagid ni Isus, “Mesama da saˈ eklebani suub. Duun bai getaw, iini ekleben dig danul suuben kig begu gupia penepeten? Puˈ saˈ pinenggiˈ pemaˈantuunen, saˈ mengeleeˈ sug begu penepeten, mauguten dayun sug danul kia, benaˈ megdegadega dayun su keliwag nu gediten.c
22 “Mukaˈ pa pagid sug betad megbetang penginumen di pemetangan binaal panit petubuˈen, maˈantu dadema.d Duun bai getaw megbetang begu penginumen dig daan pemetangan? Puˈ saˈ pinenggiˈ maˈnia, saˈ tumulin su penginumen, ndiˈ ba megbetu su panit petubuˈen? Deksuˈanen, megulaˈ su penginumen, mukaˈ meglaat dadema su pemetanganen. Kaas sug begu penginumen, subay begu dadema su pemetanganen.”
Kaunutan nu Gendaw Pelali si Isus
23 Naa duuni Gendaw Pelali, minayan si nga Isus di pegimulanan trigo. Naa selian nilan mayan dia, mikpuun su nga sakup ni Isus mengetes tu trigo. 24 Mendadi ki nga Pariseo, benaˈ minitaˈ nilan su kengetes nu nga sakup ni Isus tu trigo, laung nilan diniin, “Paa, bentayay mu pa daan kig baalen ni nga sakup mu kiin! Ki Gendaw Pelali, binandu dinita ditu Misulat Palinta nu Megbebayaˈ duunig baalen ta di gendaw kini!”
25 Kaliˈ sembag si Isus dinilan, “Baa, pia da. Puˈ si David kanugdiin, ndaˈ ba niu mbasa su pinggulaulanen dadema saˈ mitegelan ilan megutem, ilan nu ngag dumanen? 26 Puˈ sumiled si David ditug Balay Pengedapan tu Megbebayaˈ, inaanen su pan ginilak tu Megbebayaˈ, inilasanen dun padun su ngag dumanen. Su pinggulaulanen dun, timpu pa ni Abiatar, su Tampusan Metaas Belian nu getaw Judea. Asa binandu ditu Misulat Palinta nu Megbebayaˈ duuni maan di pan kia, subay su laak ngag belian.”e
27 Diksuˈ ni Isus su sinumpaten di nga Pariseo, “Ki Gendaw Pelali, kanaˈ iini biwat dun nu Megbebayaˈ su kilawan, puˈ adun pegbesaanen su Gendaw Pelali. Iin pasiˈi pinain dun nu Megbebayaˈ su Gendaw Pelali, adun mbaal pepia tu nga kilawan. 28 Mendadi naan kini, kig Bataˈ nu Kilawan, naani Kaunutan megbayaˈ dig baalen nu kilawan, pia su metaang di Gendaw Pelali.”