Ki Gempia Petenday
Sinulat ni
MATEO
Piuna di Gempia Petenday Sinulat ni Mateo
Mendadi kig libru kini, iin su Gempia Petenday sinulat ni Mateo mekatag dini Isukristu, su Meglegawen di tibaˈan getaw. Miukit dini su pinggulaula ni Isus kampuˈ nu piktuˈunen saananen mekpungun di nga kilawan megbenwa dinig dibabaw lumbang kini.
Mendadi kini si Isus, migigetaw getaw Judea. Sala ngalan nu getaw Judea, sug bansa Israel. Ki getaw Judea kini, ilani pigwekilan di Misulat Palinta nu Megbebayaˈ dengantu, su timpu pa ni Moises, getaw pimuunan nu Megbebayaˈ. Naa pisuun pedaan ditu Misulat Taluˈ nu Megbebayaˈ puˈ saˈ maiben, duuni metuaˈ Tinduˈ nu Megbebayaˈ Meglekaunutan. Kiin, pedetengen nu getaw Judea mengasal menumpat. Mendadi benaˈ mituaˈ si Isus, tinaluˈen puˈ minateng na su Keglekaunutan nu Megbebayaˈ. Dagid ki ngag belian nu getaw Judea mukaˈ su mikpetuˈun di Misulat Palinta nu Megbebayaˈ, pimalaw nilan si Isus, kanaˈ daw iin su Tinduˈ nu Megbebayaˈ Meglekaunutan. Mukaˈ misigi ilan dini Isus. Kaas ki pikumpungan piningalan dun nga Pariseo mukaˈ Saduseo, pia ilani mikpetuˈun di Misulat Palinta nu Megbebayaˈ, mibaal ilan kuntra ni Isus. Maˈantu dadema su ngag belian nu getaw Judea mukaˈ su nga kaunutan nilan. Puˈ laung nilan, piksudiˈan ni Isus su Megbebayaˈ saˈ inangkenen su gelal Tinduˈ nu Megbebayaˈ Meglekaunutan mukaˈ Bataˈ nu Megbebayaˈ. Tigaˈwan, tinipu nu nga getaw Judea si Isus, pipatay nilan tu nga getaw Roma, su miguit tug benwa nilan di timpu kia. Dagid su kangken ni Isus puˈ iin su pidateng Tinduˈ nu Megbebayaˈ Meglekaunutan, mitakesiˈan puˈ metuud, puˈ di ketelu endawen genat matay, mitubuˈ puliˈ si Isus.
Mendadi gembageli pantagen dini Gempia Petenday kini, ki ginukit ni Isus mekatag di Keglekaunutan nu Megbebayaˈ. Kig beknanen, su telipuunay nu Keglekaunutan nu Megbebayaˈ, iin su ketuaˈ ni Isus saˈ migigetaw maaˈ nug betad kilawan. Puˈ iin tuˈu su Tinduˈ nu Megbebayaˈ Meglekaunutan.
Melaun tituluˈan mukaˈ pigwali ni Isus mekatag di kesakup nu getaw tu Keglekaunutan nu Megbebayaˈ. Sug duma, mibetang di Kapitulu 5 sampay Kapitulu 7 (piningalan dun su Pigwali ni Isus tug Bentud). Sug duma pelum, ditu Kapitulu 18. Miukit dadema dinig libru kini ki gempia pegbetaden nu nga suminakup tu Keglekaunutan nu Megbebayaˈ, sampay su mbiananen saˈ sungu melengkebig benwa. Su nga sambingay ni Isus mekatag di Keglekaunutanen sampay su ketulin dun, mibetang di Kapitulu 13. Dayun di Kapitulu 24 buˈ 25, duuni piktuˈun ni Isus mekatag di mpenggulaula saˈ Meglekaunutan na tuˈu su Megbebayaˈ ditug binayaˈ gebii buˈ gendaw.
Mendadi kini si Isus, tinaluˈen puˈ pia taˈ bensaay dun su getaw, mesuˈat sumalig diniin adun megawen di salaˈen, kanaˈ laak sug bansa ni Isus, su nga getaw Judea. Gempantek dini Gempia Petenday kini sinulat ni Mateo, iini minatay dun si Isus, puˈ adun gentiˈanen su salaˈ nu tibaˈan getaw tu nga kelaun bansa dig dibabaw lumbang.