Ki Gempia Petenday
Sinulat ni
MARCOS
Pinuna Gempia Petenday Sinulat ni MARCOS
Mendadi, kinii Gempia Petenday mekatag dini Isukristu. Miukit dini su nga pinggulaula ni Isus saananen megbenwa dinig dibabaw benwa. Suminulat dun si Marcos, iinig duma ni Pablo, peneligan ni Isus, saˈ mikpanaw si Pablo meksigwag tu Misulat Taluˈ nu Megbebayaˈ.
Ki kebianbian ni Isus kini sinulat ni Marcos, miukit dun puˈ melaun kuntra ni Isus. Bekna kuntranen, su menenulay. Melaun ginukit ni Marcos mekatag di kedaag ni Isus tu menenulay, saˈitada su kengutiden dun di getaw piglegetan dun. Mukaˈ melaun padun mekesalebuˈ pinggulaula ni Isus inukit ni Marcos, ki keneguliˈen tu nga pegladu, sampay su tinituluˈanen tu nga getaw.
Keduaˈen, kuminuntra dadema dini Isus ki nga getaw mekpetuˈun di Misulat Palinta nu Megbebayaˈ, ngalan nu sala pikumpungan dun, su Pariseo. Binanta gupia si Isus nu nga mekpetuˈun kiin, puˈ sabaˈ pilepeng ni Isus sug lawasen tu Megbebayaˈ. Tigaˈwan, duminaag sug delendeman nu nga kuntra ni Isus, kaas pinatay iin, linansang di kurus. Asa tinaluˈ pedaan ni Isus puˈ subay matay iin, puˈ adun melekaten su tibaˈan getaw di ginukuman tu salaˈ nilan.
Laak dagid genat di kepatayen, di ketelu endawen, mitubuˈ puliˈ si Isus, dayun lumintu ditu gekbus langit. Maˈantu, mituˈusan puˈ su kepelepeng ni Isus tu Megbebayaˈ, metuud, kampuˈ nu keglekaten tu nga kilawan di ginukuman nu salaˈ nilan.
Laak ki sinulat ni Marcos kini, duaˈ buukig deksuˈanen, lumbus bitangan marka maˈniniˈ, [ ]. Puˈ delendeman nu nga getaw, kig deksuˈanen kini duaˈ buuk, lumbus sinulat nug lain getaw, kanaˈ daw ni Marcosi suminulat dun.