Ki Gempia Petenday
Sinulat ni
MARCOS
1
Su Kektituluˈ ni Juan su Memunag Tubig
1 Mendadi, kini su Gempia Petenday mekatag dini Isukristu, kig Bataˈ nu Megbebayaˈ. 2 Duuni sala tawan dengantu pimuunan nu Megbebayaˈ, si Isaias. Sinulat ni Isaias ki tinaluˈ nu Megbebayaˈ ditug Bataˈen kiin, laungen,
“Miktaluˈ su Megbebayaˈ, ‘Mendadi, paunaan ku diniˈa ki pemuunan ku,
puˈ adun pengendamenen sug bianan mu.’a
3 Duuni getaw mektawag diag limawaˈ, laungen,
‘Pengendamay niu sug bianan nu Kaunutan Megbebayaˈ,
pelegdeng niu kig dalanen!’”
4 Naa mendadi, minuud ki sinulat kia ni Isaias, mituaˈ tuˈui sala tawan, si Juan, diag limawaˈ. Kini si Juan, pimbunaganen tubig su nga getaw mukaˈ miktituluˈ dinilan. Kaliˈ pektaluˈ si Juan, “Peksikesuun amu, mukaˈ pekpebunag amu tubig tuˈus dun, adun pedesunen nu Megbebayaˈ ki salaˈ niu.” 5 Mendadi, melaun getaw sakup prubinsya Judea sampay getaw Jerusalem minangay mekineeg ditu ni Juan. Pigukit nilan su nga salaˈ nilan, mukaˈ mikpebunag ilan dayun diniin tubig ditug lawas Jordan.
6 Naa kini si Juan, penepetenen ki ginabel bembul petubuˈen kamelyu. Sug bakesen, panit dadema petubuˈen. Ki gaanen, gapan mukaˈ teneb. 7 Mendadi, kaliˈ pegwali tu nga getaw si Juan, laungen, “Duuni sungu metuaˈ, mbinayaˈ pa dinaan, laak pia maˈantu, metaas pai ginuungen batul danaan. Pia su sepatusen, kanaˈu mbantang megdungguˈ megubad dun diniin. 8 Puˈ naan kini, megbunagu laak tubig diniu. Dagid iin, bunagenen diniu kig Balakat nu Megbebayaˈ.”
Mikpebunag Tubig si Isus
9 Naa mendadi kini si Isus, su saanan ni Juan memunag tubig tu nga getaw, mituaˈ na tuˈu ditu ni Juan, genat tug lunsud Nazaret, sakup prubinsya Galilea. Mikpebunag dini Juan tubig diag lawas Jordan. 10 Lemen laak mikegawen si Isus dia tubig, minitaˈen mipukaˈ sug langit, mukaˈ sug Balakat nu Megbebayaˈ, luminusad, miglanguban di maˈniin palas limuun, minapun dayun diniin. 11 Duun dayuni miktaluˈ ditug langit, laungen, “Yaˈai petailen ku Bataˈu, leliagenu gupia diniˈa.”
Pingindanan nu Palin si Isus
12 Mendadi kini si Isus, benaˈ mibunagan na ni Juan tubig, iwit dayun nug Balakat nu Megbebayaˈ tug limawaˈ. 13 Paat puluˈ gebii dia si Isus, pingindanan namal ni Satanas. Naa kig benwa kia, pegbenwanan mekekaˈid metetubuˈ. Dagid duuni nga sesuguˈen nu Megbebayaˈ getaw langit mituaˈ, pigebangan nilan si Isus.
Pisakup ni Isusi Paat Tawan Menelisedaˈ
14 Laak si Juan kiin, masiˈ pinirisu. Saˈ mipirisu na si Juan, kini si Isus, mipuliˈ ditu Galilea, migukit dayun di Gempia Petenday genat tu Megbebayaˈ. 15 Miktaluˈ si Isus, “Naa mitektak na tuˈu su sesaˈ. Ki Keglekaunutan nu Megbebayaˈ, pikpuunan na! Mendadi peksikesuun amu, petuud niu ki Gempia Petenday!”
16 Naa duuni gendaw mikpanaw si Isus dia geksid Linaw Galilea. Sinegayen mpanaw, duunig duaˈ tawan menelisedaˈ mipegitaˈen, si Simon mukaˈ su pateden si Andres, pekpenadap ilan diag linaw. 17 Mendadi sinabi ilan ni Isus, laungen, “Pegdunut amu dinaan. Kanaˈ na sedaˈi peglaaman niu, puˈ getaw na, adun sumakup ilan dinaan.” 18 Lemen laak midengeg nug duaˈ tawan kini su tinaluˈ ni Isus, bileng nilan dayun su sadap nilan, migdunut ilan tuˈu dini Isus, suminakup nailan diniin.
19 Naa benaˈ minundas kemaikaˈ si Isus, duun pelumi mipegitaˈen duaˈ tawan mekpated dadema, si Santiago mukaˈ si Juan, gamaˈ nilan si Sebedeo. Dia ilan duaˈ sekayan nilan, pengendamen nilan su pukut nilan. 20 Kaliˈ ilan maitaˈ ni Isus, inggaten ilan sumakup diniin. Luminusad ilan dayun, binilin nilan dayun dia sekayan su gamaˈ nilan kia si Sebedeo, dumanen laak su nga tinindananen. Dayun ilan megdunut dini Isus, suminakup nailan dema diniin.
Piuliˈan ni Isusi Getaw Piglegetan Menulay
21 Naa minundas si nga Isus ditug lunsud Capernaum. Benaˈ su Gendaw Pelali, miditu si Isus simbaan nu nga getaw Judea, dayun mikpetuˈun dia. 22 Saˈ mikpetuˈun si Isus, misebuˈan su getaw, puˈ su tituluˈanen, duuni pegbayaˈen. Saˈ iini mektituluˈ dinilan su nga mekpetuˈun di Misulat Palinta nu Megbebayaˈ, naa mamaˈ ndaˈi pegbayaˈ nilan.
23 Mendadi, saanan ni Isus mekpetuˈun, tekaw duuni getaw sumiled dia simbaan, piglegetan menulay. Miktegas dayun, laungen, 24 “Ii, yaˈa Isus kiin, getaw Nazaret, taˈ maig labet mu dinami? Midiniin ka ba mekpatay dinami? Mailalau yaˈa, yaˈa ma su Pimiliˈ nu Megbebayaˈ!”
25 Pimaag ni Isus su menulay, laungen, “Naa ndiˈa pesasak! Pegawaˈa di getaw kiin!”
26 Naa ki menulay kini, pisedileni getaw kia, miktegas mainsan, dayun tuˈu megawaˈ diniin. 27 Mendadi su kelaun getaw dia, misebuˈan ilan dun gupia. Laung nilan, “Alandun ini? Begu tituluˈan masiˈ ini? Ki getaw kini, pia su menenulay, duuni pegbayaˈen mesuguˈen, mekpetuud ilan dayun diniin!”
28 Kaas genat itu, misempun megleleep ditu tibuuk Galilea sug dengegan ni Isus.
Pineguliˈan ni Isusi Melaun Getaw
29 Naa benaˈ gumiwaˈ si nga Isus dia simbaan nu getaw Judea, minangay ilan ditug balay ni Simon mukaˈ ni Andres, duma nilan si Santiago mukaˈ si Juan. 30 Mendadi mitaang dun dema, pegladu ki penugangan ni Simon libun, mipanas. Mendadi, dekag mitulan si Isus, inukit dayun diniin su pegladu kia. 31 Mikpesempel dayun si Isus di pegladu kini, dayunen peguiday di kemet, biwaten. Migwanan dayuni panasen. Migbuat sug libun mukaˈ mikpelutuˈ, migilak dayun dini nga Isus.
32 Naa benaˈ sungu na mesindepi gendaw, pinguit nu nga getaw ditu ni Isus su nga kelaun pegladu dakus su nga piglegetan menenulay. 33 Mukaˈ su kelaunan getaw dig lunsud kia, mikpungun ilan diag liu nug balay kia tinuunan ni Isus. 34 Dayun pineguliˈan ni Isusi melaun getaw, migininisan naig leduunen. Mukaˈ melaun padun piglegetan menenulay, pingutidan ni Isus dinilan su menenulay. Laak ndaˈen begay mektaluˈtaluˈ su menenulay, puˈ adun ndiˈ nilan pesuun ki gasal ni Isus.
Su Kegwali ni Isus tu Prubinsya Galilea
35 Naa benaˈ miksala gendaw, daliˈ endaw pa tanan, milapus megbuat si Isus, migawaˈ diag balay. Miditug limawaˈ, adun menenabi dia. 36 Laak dagid si nga Simon, mipanaw dailan dema, penengaun nilan si Isus. 37 Naa benaˈ mibaangan nilan, laung nilan, “Sir, penengaun ka ma nu ngag launan getaw.”
38 Kaliˈ sembag si Isus, “Mundas ita pelum ditu ngag lain lunsud dig lumibut benwa kini, puˈ adun megwali pau pagid ditu, puˈ iini luminusadu dun dinig lumbang.”
39 Naa saˈ maˈantu, lineep dayun ni Isus su tibuuk prubinsya Galilea, migwali dia nga simbaan nu getaw Judea, mukaˈ pingutidanen di getawi menenulay.
Piuliˈan ni Isusi Getaw Migladu Mekesalebuˈ Nuka
40 Mendadi duuni getaw pegladu mekesalebuˈ nuka mikpesempel dini Isus, minginlulud dayun di gedapanen, kaliˈ penengi diniin, laungen, “Sir, saˈ mauyaˈan mu da, misuunan ku megaga mau pauliˈay.”
41 Milelaat dayun si Isus di pegladu kia. Tinggaleni kemeten, dipenaneni getaw kia, kaliˈ pektaluˈ, “Naa, mauyaˈan ku lai. Mauliˈan ka dadema tuˈu!” 42 Seduˈunduˈun dayun miawaˈi mekesalebuˈ nukanen, miseksud dun tuˈu sug daan lawasen. 43 Mendadi, pipanaw dayun ni Isus su kamun pegladu, 44 laak inunguben pa gupia, laungen, “Petuud mu gupiai taluˈu kini diniˈa. Pia sala tawan, ndaˈiduni ukitan mu di mipenggulaula kini. Segaga angaya ditug belian, pekpebantaya diniin, dayun ilak mu sug betang pinalinta ni Moises dengantu puˈ adun metakesiˈan ka nu getaw, miawaˈ na su kelemuˈay mu.”
45 Naa saˈ maˈantu, mipanaw dayun su getaw, laak palu pa miunguben, ndaˈ. Minamal megukit ditu mipenggulaula diniin, sinigwagen sungkin su gukitan dun. Kaas genat itu si Isus, ndiˈ na mesuˈat mekpaitaˈ ditu ngag lunsud, ditu na laak pegbebenwa limawaˈ. Laak dagid pia maˈantu, pinemalan da gusay peglaaway nu nga getaw dig lumibut benwa kia.