3
Su Kektituluˈ ni Juan su Memunag Tubig
1 Naa benaˈ santaˈ taun, duuni getaw mituaˈ diag limawaˈ tu prubinsya Judea, ngalanen si Juan, piningalan dun nu nga getaw su Memunag Tubig. Kini si Juan, miktituluˈ tu nga getaw, 2 kaliˈ pektaluˈ, “Peksikesuun amu, puˈ ki Keglekaunutan nu Megbebayaˈ, sungu na mektelipuun!” 3 Si Juan kia, iini kenuud nu sinulat dengantu ditu Misulat Taluˈ nu Megbebayaˈ nu pimuunanen si Isaias, laungen,
“Duuni getaw mektawag diag limawaˈ, laungen,
‘Pengendamay niu sug bianan nu Kaunutan Megbebayaˈ,
pelegdeng niu kig dalanen!’”a
4 Naa kini si Juan, penepetenen ki ginabel bembul petubuˈen paingalan dun kamelyu. Sug bakesen, panit dadema petubuˈen. Ki gaanen, gapan mukaˈ teneb. 5 Mendadi, kaliˈ pektituluˈ si Juan, melaun getaw minangay mekineeg diniin, sakup ilan di Jerusalem dakus tu tibuuk prubinsya Judea sampay tu tibuuk benwa mesempel di tubig Jordan. 6 Pigukit nilan su nga salaˈ nilan, mukaˈ mikpebunag ilan dayun dini Juan tubig ditug lawas Jordan.
7 Laak melaun duma getaw minangay mekpebunag dini Juan tubig, sakup ilan nu pikumpungan nu getaw Judea piningalan dun nga Pariseo mukaˈ nga Saduseo. Mendadi kini si Juan, saˈ minitaˈen ilan, miktaluˈ dinilan, “Paa, yamu pa di nga mamak! Taˈ taway duni mikpegad diniu, adun sia peleguyan niu ki ginukuman nu Megbebayaˈ sungu mateng? 8 Subay menggulaula amu gempia, ki mbantang di nga getaw miksikesuun, damikian duni gayu megbunga melengas. 9 Mukaˈ ndiˈ amu pektaluˈ dig dialem ginaa niu puˈ mipemilang namu nu Megbebayaˈ mekesuun puun di kesapuˈ niu dini Abraham. Puˈ taman taluˈu diniu, pia ki ngag batu dinig lupaˈ kini, mesuˈat dadema beluyay nu Megbebayaˈ nga sapuˈ ni Abraham! 10 Dagid nandaw, minuyaˈ na sug wasay, dia na tuˈu puun nu gayu. Kaas adini gayu ndiˈ megbunga gempia, penegaˈen nu Megbebayaˈ, dayun piglakay tu gapuy.
11 “Mendadi naan kini,” laung padun ni Juan, “memunagu laak tubig diniu, tuˈus tu keksikesuun niu. Dagid duuni sungu metuaˈ, mbinayaˈ pa dinaan, laak pia maˈantu, metaas pai ginuungen batul danaan. Pia su sepatusen, kanaˈu mbantang meguit dun diniin. Dagid iin, bunagenen diniu kig Balakat nu Megbebayaˈ, mukaˈ gapuy. 12 Iin, minuyaˈ na mekpalid di ginani. Saˈ metubus mekpalid, pungunenen su trigo, teguˈenen dayun tug lulunen. Laak dagid su gepis mukaˈ gebas, sensulanen tu gapuy ndiˈ na mpaleng.”
Mikpebunag Tubig si Isus
13 Naa mendadi kini si Isus, su saanan ni Juan memunag tubig tu nga getaw, mituaˈ na tuˈu dia prubinsya Judea genat tu Galilea. Benaˈ minateng si Isus, minangay dini Juan dia tubig Jordan, mikpebunag diniin tubig. 14 Dagid belibadan sia ni Juan, laungen, “Baa, Sir, mauma dema mekpebunaga dinaan tubig, asa iin siaig bentanganen, yaˈai megbunag dinaan tubig!”
15 Kaliˈ sembag si Isus, “Baa, petuyangen na. Puˈ subay maˈninii mbianan ta, adun gelaˈen ta petuuday su pimuun nu Megbebayaˈ dinita.” Naa saˈ maˈnia, miliag na si Juan.
16 Lemen laak mitubus bunagay tubig si Isus, guminawen dayun dia tubig. Minitaˈen dayun mipukaˈ masiˈ sug langit, mukaˈ sug Balakat nu Megbebayaˈ, luminusad, miglanguban di maˈniin palas limuun, minapun dayun dini Isus. 17 Duun dayuni miktaluˈ ditug langit, laungen, “Kini na tuˈu sug Bataˈu, ki petailen ku, leliagenu gupia diniin.”